رۋپي كاۋر ەسىمى بۇگىندە الەم وقىرماندارىنا جاقسى تانىس. ء«سۇت پەن بال» ولەڭدەر جيناعى New York Times-ءتىڭ بەستسەللەر كىتابى اتانعان قالامگەر ارۋدىڭ ءتۇپ-تامىرى ۇندىلىك. قازىر كانادادا تۇراتىن ول الەۋمەتتىك جەلىدە بەلسەندى. رۋپي كاۋر الەۋمەتشىل, قوعامدىق احۋالداردى باتىل جازاتىن, جۇرەككە, جان قۇزارىنا ۇڭىلە بىلەتىن اقىن. ء«سۇت پەن بالداعى» قىسقا عانا اق ولەڭدەر ويلى وقىرماندى ءارى-ءسارى كۇيگە تۇسىرەدى.
«سەن
قايسار قادامدارىڭمەن
شەگەلەدىڭ اياعىمدى جەرگە.
سوسىن
تۇرۋدى تالاپ ەتتىڭ...
نەمەسە,
مەن ونى ءسۇيۋدى ۇيرەنەمىن
ءوزىمدى ءسۇيۋ ارقىلى...»
ء«سۇت پەن بال» ءتورت بولىمنەن قۇرالعان. ءبىرىنشى ءبولىم – مۇڭ, ەكىنشى – ماحاببات, ءۇشىنشى – جارىلىس, ءتورتىنشى – ەمدەلۋ ءبولىمى. رۋپي كاۋردىڭ قىسقا دا قوعالى ويلى اق ولەڭدەرىنەن ءلاززات الۋعا سەزىمتالدىلىعىن جوعالتپاعان جۇرەك, بالاڭدىعىن جوعالتپاعان سەرگەك كوڭىل كەرەك. ايتپەگەندە, جان ۇلپاسى سەمىپ, جۇرەگى قاتايعان جاندار ءۇشىن جيناق بوس تسيتاتالار قۇرىلىمى بولىپ كورىنۋى بەك مۇمكىن.
«مەن قارا جەرگە
شىم باتقىم كەلەدى
كوز جاسى, اياعىم
قولىم
تەرەڭگە ەنۋ ءۇشىن...
نەمەسە,
ەڭ ءبىرىنشى
تىلە وزىڭە,
قالعان عۇمىرىڭدى,
ءوز وڭاشالىعىڭدا وتكىزۋدى...»
كاۋر سىني مىسقىل ارقىلى شىعىس ازياداعى ايەلدەر ماسەلەسىن, ولاردىڭ باسىنان ارىلماعان قيتۇرعى ساياساتتى باتىل كوتەرە ءبىلدى. كىتاپتا تۇرمىستىق زورلىق-زومبىلىق, ونىڭ زارداپتارىنان تۋىنداعان پسيحولوگيالىق كومپلەكستەر, جالتاق عادەتتەر, بويدان سۋىرعانمەن ءىزى قالعان جالعان نانىمدار كەستەلەنگەن. ايەل الەمىنىڭ ارنەشىك كۇيى مەن شۇڭعىما سىرلارى كىتاپتا جان-جاقتى كورىنىس تاپقان. كاۋر الدەبىر توپتاردىڭ سويىلىن سوعۋدان, ناسيحاتتالعان ۇعىمداردىڭ جەتەگىنە ەرۋدەن اۋلاق. كەرىسىنشە فيلوسوفيالىق, پسيحولوگيالىق تۇرعىدا ماسەلە ءمانىن اشۋعا ىنتىق.
«سەنىڭ قانىڭ,
مەنىڭ قانتامىرىمنان اعادى.
ايتشى,
مۇنى قالاي
ۇمىتا الارمىن؟»
كەيبىر قىسقا قوس تارماقتاردان دانالىق لەبى سەزىلەدى.
«جۇمساق بولۋ
قۇدىرەتتى بولۋ
دەگەن ءسوز...»
ء «سۇت پەن بال» – ماحاببات, جوعالتۋ, زورلىق-زومبىلىق, تازارۋ, ايەل قۇپياسى جايلى كىتاپ. ءار ءبولىمى ناۋرىزەك مۇڭعا ەندىرىپ قانا قويماي, ودان ەمدەلۋ جولىن نۇسقاپ, جوبا كورسەتەدى. وقىرماندى تەڭىزىنە شومىلدىرعان, ءوزىن تانۋ جولىندا ماياك بولا بىلگەن جيناق قازاق وقىرمانىنا جەتىپ, ءتول تىلگە اۋدارىلسا نۇر ۇستىنە نۇر.
