«اكبار اقىن ءنيزاميدىڭ وتانى – قازاق اۋدانىندا تۋعان. ال شايىر قىپشاق قىزى اپپاققا تالاي جىر ارناعانى ءمالىم. سوندىقتان با, اكباردىڭ ءبىر بۇيرەگى قازاققا بۇرىپ تۇرادى, تۇتاس تۇركى جۇرتىنا جانە ادامزاتقا ورتاق قۇندىلىقتاردى ارقاۋ ەتەدى. بۇگىنگى وقىرمانعا ۇسىنىلعان كىتاپ تا تامىرلاس ۇلتتىڭ ادەبيەتىن دامىتۋعا قوسىلعان سۇبەلى ۇلەس دەپ بىلەمىز», دەدى مينيستر.
كەش تىزگىنىن قولعا العان بەلگىلى اقىن داۋلەتكەرەي كاپ ۇلى اكبار مىرزاعا قوش كەلدىڭ ايتىپ, ەلدىڭ ىقىلاسىن جەتكىزدى. سونىمەن قاتار كەشكە تاناكوز تولقىنقىزى, ميراس اسان, ساعىنىش نامازشاموۆا, گۇلباقىت قاسەن, جانايىم اۋعانبايقىزى, ولجاس قاسىم, ارمان شەريزات سىندى اكبار اقىننىڭ جىرلارىن قازاقشا سويلەتكەن ءبىر توپ اقىن قاتىستى.
«ومىردە اقىندار كوپ. بىراق تۋما ادامدىق بولمىسىن ءومىر بويى ساقتاپ وتەتىن اقىندار از. مەن اكبار گوشالىنى سول ادامدىق بيىك تۇعىرعا قونعان, ءوزى قانداي بولسا, ولەڭى سونداي مارتەبەلى اقىندار ساناتىنا جاتقىزامىن. ءبىز اكبارمەن ەرتە كەزدەن تانىسساق تا, ونىڭ شىعارماشىلىعى جونىندە ماردىمدى دۇنيە بىلمەپپىن. «تۇراننىڭ ءبىر ءتۇپ جۋسانى» اتتى كىتاپتى اۋدارۋ بارىسىندا اكباردىڭ ۇلكەن اقىن ەكەنىنە كوزىم جەتتى», دەدى حالىقارالىق «الاش» ادەبي سىيلىعىنىڭ لاۋرەاتى تاناكوز تولقىنقىزى.
تۇساۋكەسەرگە قاتىسقان اقىندار اكبار گوشالىنىڭ اۋدارما ولەڭدەرىن وقىپ, انشىلەر قازاقتىڭ قارا دومبىراسىمەن حالىق اندەرىن شىرقادى.
«التايدان اۋعان ارعىماق,
ءتىرى جان ونى ءمىندى قاي؟
اق كوبىكتى تەڭىزگە,
جەتكەنشە تاڭنان تاڭ قۇراپ,
جۇيتكىدى جانى تىنشىماي», دەپ جىرلاعان اقىننىڭ تۇركىنىڭ قارا شاڭىراعىندا ەسىمى اسپانداپ, ابىرويى ارتتى.
