كۇنى كەشە عانا ەلوردا تورىندە – ۇلتتىق اكادەميالىق كىتاپحانادا جازۋشى-ساتيريك, قوعام قايراتكەرى كوپەن امىربەكتىڭ «كوپەن كەلە جاتىر!..» اتتى بەستومدىق شىعارمالار جيناعىنىڭ تۇساۋكەسەر ءراسىمى بولىپ ءوتتى.
سالتاناتتى جيىنعا نۇرتورە ءجۇسىپ, باۋىرجان وماروۆ, بەردىبەك ساپارباەۆ, جارىلقاپ بەيسەنباي, دارحان مىڭباي, يسلام ابىشەۆ, ديحان قامزابەك ۇلى جانە باسقا دا بەلگىلى قوعام قايراتكەرلەرى مەن قالامگەرلەر قاتىستى. العاش ءسوز تىزگىنىن العان ساۋىتبەك ابدراحمانوۆ ساتيريك ەسىمىنىڭ دارا سيپاتقا اينالعانىن جەتكىزدى.
– وسى 5 تومدىق شىقتى دەگەن كەزدە تاڭ قالعانىم راس. سەبەبى قاي ۋاقىتتا جازىپ ۇلگەرگەن دەپ ويلادىم. يۋمور بار جەردە ادامنىڭ جاسامپازدىعى كورىنەدى. وسى تۇرعىدان قاراعاندا كوپەن امىربەك وتكەن عاسىردىڭ 70-80-90 جىلدارىندا قازاق مادەنيەتىندە ەلەۋلى ءرول اتقارعان. حالقىمىزعا ەجەلدەن ءتان قالجىڭدى, وتكىر ءسوزدى, سىن-سىقاقتى جاڭا ءبىر بيىككە كوتەرگەن. وسپانحاننىڭ داڭقتى ءداستۇرىن جالعاستىرعان جۇلدىزدى ءىزباسارى. كوپەندى انىق مويىنداۋداعى ءتيىستى دۇنيە ونىڭ ەسىمى. ءبىز مۇقاعالي, فاريزالار, قادىر, ابىشتەردى فاميلياسىز ايتامىز. كوپەن دە سونداي سيرەك داڭققا يە بولدى, – دەدى ول.
ال سەناتور نۇرتورە ءجۇسىپ كوپەن امىربەكتىڭ اتقارعان ەڭبەكتەرىن تىلگە تيەك ەتتى.
– ساتيرا سالاسىندا كوپەن امىربەكتىڭ ورنى دا, اتى دا, ەڭبەگى دە ەرەكشە. 2000 جىلدارى سايلاۋعا كوپەن اعا دا قاتىسقان. جولى بولماي, وتپەدى. سول جاعدايدان كەيىن ءبىر كۇنى كەزدەسىپ قالدىق. ء«وزىڭىزدىڭ ءۇنىڭىزدى تانىتىپ, ساتيرا سالاسىندا ەمىن-ەركىن جۇرە بەرمەيسىز بە» دەپ جۇباتۋ سوزدەرىن ايتقان ەدىم. سودان كەيىن «كوپەن كەلە جاتىر!..» دەگەن جوبا باستالىپ كەتتى. سول اتپەن مىنە حالىققا جاتتالىپ قالدى. «ايقىن» گازەتىندە «ارا» اتاۋىمەن ارنايى قوسىمشا شىعىپ كەلە جاتىر. بۇل دا كوپەن اعاعا كورسەتىلگەن قۇرمەت دەپ بىلەمىز, – دەدى سەناتور.
«كوپەن كەلە جاتىر!..» اتتى بەستومدىق شىعارمالار جيناعىنىڭ لەنتاسىن بەردىبەك ساپارباەۆ, نۇرتورە ءجۇسىپ, باۋىرجان وماروۆ, يسلام ابىشەۆتەر قيدى.
– كوپەننىڭ شىعارماشىلىعى بالا كۇنىنەن, قازاق گازەتتەرىنەن باستاۋ العان. ەڭ العاش سۋرەت سالىپ, «قازاقستان پيونەرىنە» سۋرەتىن جىبەرەدى. بىراق ول باسىلىم بەتىنە شىقپايدى ەكەن. كوپەكەڭ ينتەللەكتۋالدى ساتيرانىڭ يەسى ەدى. كەز كەلگەن نارسەگە دايارلىقپەن كەلەتىن. ل.ن. گۋميلەۆ اتىنداعى ەۇۋ-دە بىرنەشە جيىن بولدى. ول كىسى ساحناعا شىعىپ سويلەگەن كەزدە عىلىمي باياندامانىڭ ساتيرالىق فورماتىن كورسەتىپ كەتەتىن,– دەدى اكادەميك ديحان قامزابەك ۇلى.
مودەراتورلىق ەتكەن جۋرناليست-جازۋشى شارحان قازىعۇل كەش بارىسىن ازىلمەن ادىپتەپ, ساتيريكتىڭ كەشى كوڭىلدى ءوتتى. ءوز كوپەنىمەن كەلگەن ءاربىر زيالى قاۋىم وكىلى پىكىرلەرىنەن جاڭا يدەيالار ءتۇزىلىپ, بولاشاقتاعى اتقارىلار ءىس-شارالاردىڭ سۇلباسى جاسالدى.
