بالا كۇتىمىنە تولەنەتىن جاردەماقىنى ەسەپتەۋ كەزىندە سوڭعى 24 ايداعى ورتاشا ايلىق كىرىس مولشەرى ەسكەرىلەدى. بۇل تۋرالى «مەملەكەتتىك الەۋمەتتىك ساقتاندىرۋ قورى» اق باس ديرەكتورى نۇرسۇلۋ كەمەل «اشىق ديالوگ» پورتالىندا قويىلعان ساۋالعا بەرگەن جاۋابىندا ءتۇسىندىردى.
قور ديرەكتورىنىڭ تۇسىندىرۋىنشە, «مىندەتتى الەۋمەتتىك ساقتاندىرۋ تۋرالى» زاڭنىڭ 24-بابى 4-تارماعىنا سايكەس, بالا كۇتىمىنە بايلانىستى اي سايىنعى الەۋمەتتىك تولەم مولشەرى انانىڭ سوڭعى 24 ايداعى ورتاشا ايلىق كىرىسىنىڭ 40 پايىزىن قۇرايدى.
ورتاشا ايلىق كىرىستى ەسەپتەۋ فورمۋلاسى: ورتاشا ايلىق كىرىس = (اي سايىنعى تابىس №1 + اي سايىنعى تابىس №2 + اي سايىنعى تابىس №3...... + اي سايىنعى تابىس №24) / 24
مىسالى, بالا 2022 جىلى 16 قاراشادا تۋسا, الەۋمەتتىك تولەمنىڭ مولشەرىن انىقتاۋ كەزىندە الەۋمەتتىك ساقتاندىرۋ قورىنا 2020 جىلعى قاراشادان 2022 جىلعى قازانعا دەيىن تۇسكەن الەۋمەتتىك اۋدارىمدار ەسكەرىلەدى. زاڭنىڭ 15-بابىنىڭ 5-تارماعىنا سايكەس, ءبىر جۇمىس بەرۋشىدەن تولەنەتىن الەۋمەتتىك اۋدارىمدار ەڭ تومەنگى جالاقىنىڭ 7 ەسەلەنگەن مولشەرىنەن اسپاۋى ءتيىس. 2020-2021 جىلدارى ەڭ تومەنگى جالاقى – 42 500 تەڭگەنى, 2022 جىلى – 60 مىڭ تەڭگەنى قۇراسا, بيىل ول 70 مىڭ تەڭگەگە تەڭ.
سونىمەن قاتار تاعايىندالعان الەۋمەتتىك تولەمنىڭ 10 پايىزى زەينەتاقى قورىنا اۋدارىلادى.
