ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە قاراعاندا, مەملەكەت باسشىسىنىڭ جولداۋىن ىسكە اسىرۋ شەڭبەرىندە جۇمىسىنان ايىرىلعان جاعدايدا تولەنەتىن الەۋمەتتىك تولەمدى ەسەپتەۋ ءۇشىن قولدانىلاتىن تابىستى الماستىرۋ كوەففيتسيەنتى 40%-دان 45%-عا دەيىن ۇلعايتىلدى. 2023 جىلى 117 مىڭعا جۋىق ازاماتقا جۇمىسىنان ايىرىلعان جاعدايدا تولەنەتىن الەۋمەتتىك تولەم ورتا ەسەپپەن 13%-عا ءوسىپ, ارتتىرىلعان مولشەردە تاعايىندالادى دەپ جوسپارلانىپ وتىر.
سونداي-اق بالا كۇتىمى بويىنشا الەۋمەتتىك تولەمدى جۇزەگە اسىرۋ ۇزاقتىعى 1 جاستان 1,5 جاسقا دەيىن ۇزارتىلدى. بيىل بۇل تولەم 500 مىڭنان استام اتا-اناعا تاعايىندالادى.
بۇدان بولەك, ەڭبەككە قابىلەتتىلىگىنەن ايىرىلعان 78 مىڭ ادامعا جانە اسىراۋشىسىنان ايىرىلعان 55 مىڭ وتباسىعا بازالىق مەملەكەتتىك جاردەماقىلارعا قوسىمشا تاعايىندالاتىن الەۋمەتتىك تولەمدەردىڭ مولشەرى 8,5%-عا ارتتى.
