بيىلعى جىلدىڭ قاراشا ايىندا رەسپۋبليكالىق بيۋدجەتتەن زەينەتاقى تولەمدەرىنە 245,9 ملرد تەڭگە, ونىڭ ىشىندە بازالىق زەينەتاقىنى تولەۋگە – 74,9 ملرد تەڭگە, ىنتىماقتى زەينەتاقىنى تولەۋگە – 171 ملرد تەڭگە ءبولىندى.
1 جەلتوقسانداعى جاعداي بويىنشا قازاقستاندا زەينەتكەرلەر سانى – 2 ملن 276 مىڭ ادامدى قۇرادى. ال زەينەتاقى تولەمدەرىنىڭ ورتاشا مولشەرى - 108 960 تەڭگە.
«2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ, ءار الۋشىعا جەكە تاعايىندالاتىنىن ەسكە سالامىز. بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى. ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا, سونداي-اق ەگەر مۇلدە جوق بولسا, بازالىق زەينەتاقى ەڭ تومەنگى كۇنكورىس دەڭگەيىنىڭ 54 %-ىن قۇرايدى, سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. مىسالى, ەگەر ءسىزدىڭ ءوتىلىڭىز 20 جىل بولسا, بازالىق زەينەتاقى تومەنگى كۇنكورىس دەڭگەيىنىڭ 74 %-ىن, ال 30 جىل بولسا, وندا 94 %-ىن قۇرايدى. ەڭبەك ءوتىلى 33 جىل نەمەسە ودان كوپ بولسا, كۇنكورىس دەڭگەيىنىڭ ەڭ جوعارعى مولشەرىندە بەلگىلەنەدى. ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا, جيناقتاۋشى جۇيەگە قاتىسۋ مەرزىمى ءبىر ايدى قۇرايدى», دەلىنگەن ۆەدومستۆو حابارلاماسىندا.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا, زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.
ىنتىماقتى زەينەتاقىلاردىڭ مولشەرى جىل سايىن ينفلياتسيا دەڭگەيىنەن 2% ارتىپ كوتەرىلۋگە كەپىلدىك بەرىلەدى, بۇل 2014 جىلى قابىلدانعان زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىنا سايكەس كەلەدى.
«2023-2025 جىلدارعا ارنالعان رەسپۋبليكالىق بيۋدجەت تۋرالى» زاڭعا سايكەس جاسىنا جانە ەڭبەك سىڭىرگەن جىلدارىنا بايلانىستى زەينەتاقى تولەمدەرىنىڭ مولشەرى 2023 جىلعى 1 قاڭتاردان باستاپ الىناتىن مولشەردەن 10,5%-عا ارتادى.
مەملەكەت باسشىسى قاسىم-جومارت توقاەۆتىڭ تاپسىرماسىن ىسكە اسىرۋ شەڭبەرىندە ىنتىماقتى زەينەتاقىنى ەسەپتەۋ ءۇشىن قولدانىلاتىن ەڭ جوعارى تابىس مولشەرىن 46-دان 55 اەك-كە دەيىن ۇلعايتۋ كوزدەلگەن.
مەملەكەتتىك بازالىق زەينەتاقى تولەمىنىڭ مولشەرى كەلەسى جىلى 40 567 تەڭگەنى قۇرايتىن, ياعني ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى, سونداي-اق ەڭ تومەنگى مولشەردىڭ ەڭ تومەنگى كۇنكورىس دەڭگەيىنەن 54%-دان 60%-عا دەيىن ۇلعايۋىنا بايلانىستى ارتتىرىلادى.
وسىلايشا, بازالىق زەينەتاقى تولەمىن ەسكەرە وتىرىپ, زەينەتاقىلاردىڭ ەڭ تومەنگى مولشەرى 2023 جىلعى 1 قاڭتاردان باستاپ 68 223 تەڭگەدەن (2022 جىلى) 77 417 تەڭگەگە دەيىن ارتادى.
