اقىن, پارلامەنت ءماجىلىسىنىڭ دەپۋتاتى, حالىقارالىق س.ەسەنين اتىنداعى سىيلىق – «التىن كۇز» وردەنىنىڭ يەگەرى, حالىقارالىق «الاش» ادەبي سىيلىعىنىڭ لاۋرەاتى قازىبەك يسانىڭ 60 جاسقا تولۋىنا وراي تۋعان جەرى شاردارا مەن تۇركىستان, شىمكەنت قالالارىندا مەرەيتويى اتالىپ ءوتتى. اقىننىڭ شاردارا قالاسىندا وتكەن شىعارماشىلىق كەشىنە ادەبيەتشى, فيلولوگيا عىلىمدارىنىڭ دوكتورى قۇلبەك ەرگوبەك, ءماجىلىس دەپۋتاتى سەرىك ەرۋباەۆ, «اق جول» پارتياسى قارجىلىق-رەۆيزيالىق كوميسسياسىنىڭ توراعاسى بولات وتەپباەۆ, اقىن سۇراعان راحمەت, اقىن الماس احمەتبەك ۇلى سىندى زيالى قاۋىم وكىلدەرى مەن وزگە دە قوناقتار قاتىستى.
كەش اۋداندىق مادەنيەت ءۇيىنىڭ الدىندا ورنالاسقان ابايدىڭ ەسكەرتكىشىنە گۇل شوقتارىن قويۋدان باستالدى. سونداي-اق كەشكە قاتىسۋشىلار ق.يسا شىعارماشىلىعىنا ارنالعان كورمەنى تاماشالادى. ءىس-شارا بارىسىندا جەرلەستەرى اقىنعا قۇرمەت كورسەتىپ, اقبوز ات مىنگىزدى. سونىمەن قاتار كەشكە كەلگەن ەل اعالارى مەن ارقالى اقىندار قۇتتىقتاۋ ءسوز سويلەپ, ەستەلىكتەر ايتىپ, ارناۋ ولەڭدەرىن وقىدى. كەشتە ءسوز العان اۋدان اكىمى قايرات جولدىباي:
– قازاق ءتىلىنىڭ مارتەبەسىن كوتەرۋ بويىنشا اتقارىلىپ وتىرعان جۇمىستارىڭىزدى حالىق كورىپ, باقىلاپ وتىر. قازىر پارلامەنت ماجىلىسىندە اتقارىپ وتىرعان جۇمىستارىڭىزدى ەل-جۇرتىڭىز شىن جۇرەكتەن قولدايدى دەپ بىلەمىن. ەلىمىزدىڭ ءوسىپ-وركەندەۋى, رۋحاني تۇلەۋ, قازاق ءتىلىنىڭ مارتەبەسىن كوتەرۋ جولىنداعى قادامدارىڭىز العا باسا بەرسىن. ەل العىسىنا بولەنە بەرىڭىز, – دەپ اقجارما تىلەگىن ءبىلدىردى.
قالىڭ كوپشىلىكتىڭ جۇزىنەن تۋعان توپىراعىنان تۇلەپ ۇشقان اقىنعا دەگەن الپامسا سەزىم, اق ادال ىقىلاس بايقالادى. «بۇل ءان بۇرىنعى اننەن وزگەرەك» دەگەندەي, كەش قۇرىلىمى شىنايى, اسەرلى ءوتتى. كەش ورتاسىندا ەسىمى قالامگەر قۇرمەتىنە قازىبەك دەپ قويىلعان ون شاقتى بالا شىعىپ, اقىن جىرىن جاتقا وقىدى. مىناداي قۇرمەتكە ارقاسى قوزىپ, كوڭىلى تەبىرەنگەن قازىبەك اقىن ءوزى دە بالالاردىڭ ورتاسىندا تۇرىپ جىر وقىدى. شىركىن-اي, ادام تابيعاتى, جۇرەگى, سەزىمى, نيەتى دەگەندى قويساڭشى. ودان اسقان قانداي كۇش, قانداي قۇندىلىق بولۋى مۇمكىن؟ اتاق ساتىپ الساڭ دا, قۇرمەت ساتىپ الا المايسىڭ. شاردارا حالقىنىڭ اقىنعا دەگەن قۇرمەتى كىسى كوڭىلىن تولقىتىپ, ويعا قالدىردى.
مۇنان سوڭ ۇزىنا سوزىلعان مەرەكەلىك شەرۋ جولعا شىعىپ, قازىبەك جارىلقاسىن ۇلىنىڭ تۋعان اۋىلى قىزىلقۇمعا بەت الدى. جولاي ۇزىن اتا كەسەنەسىنە باس بۇرىپ, قاسيەتتى بابامىزدىڭ, كەسەنە ماڭىنداعى قازاق ءۇشىن قان قاساپ زامانداردا تەر توككەن باتىرلارىمىزدىڭ رۋحىنا قۇران باعىشتالدى. قىزىلقۇم اۋىلىنداعى اقىن ءبىلىم العان ورتا مەكتەپتە وقۋشىلار شۇرقىراي قارسى الىپ, قازىبەك يسا اتىنداعى سىنىپتا ولەڭ وقىلدى. قاناتىن قومداپ, قياعا ۇشقان پەرزەنتىن ۇلىقتاعان ءبىلىم ورداسى ءسارۋار ءسوز سويلەپ, العىسىن جەتكىزدى. ءىزىن الا ارىستان باب كەسەنەسىنە ءتاۋ ەتكەن دەلەگاتسيا كيەلى تۇركىستان قالاسىندا بولىپ, كەش جالعاسىن تاپتى. الدىمەن كەلگەن قوناقتار كىتاپ كورمەسىن تاماشالاپ, تۇركىستان ماقامدارى نەگىزىندە جارىق كورگەن «تەكتى ءسوزدىڭ تورەسى» تەرمەلەر جيناعىنىڭ تۇساۋىن كەستى. ودان سوڭ مەرەيتوي يەسىنە ارنالعان «تاۋەلسىزدىك تارلاندارى» دەرەكتى ءفيلمىنىڭ كورسەتىلىمى ءوتتى. اقىننىڭ تۋعان جەرى شاعالالى شاردارادان باستاۋ الىپ, تۇركى الەمىنىڭ رۋحاني استاناسى تۇركىستاندا جالعاسىن تاپقان كەشتى عالىم, ادەبيەت سىنشىسى قۇلبەك ەرگوبەك جۇرگىزىپ وتىردى. تۇركىستان وبلىسى اكىمىنىڭ ورىنباسارى ساكەن قالقامانوۆ ءوڭىر باسشىسىنىڭ قۇتتىقتاۋىن جەتكىزىپ, اقىنعا قۇرمەت كورسەتتى. بۇدان ءارى ر.سەيتمەتوۆ اتىنداعى تۇركىستان سازدى-دراما تەاترىنىڭ ارتىستەرى قازىبەك يسانىڭ ولەڭدەرىن ناقىشىنا كەلتىرىپ وقىدى.
مۇنان سوڭ مەرەيتوي شىرايلى شىمكەنت قالاسىندا جالعاسىن تاپتى. تۇركىستان سارايى كورەرمەنگە تولىپ, اقىننىڭ ولەڭدەرى وقىلىپ, اندەرى شىرقالدى. قازىبەك يسانىڭ بىرنەشە ولەڭىنە ءان جازعان بەلگىلى كومپوزيتور قالدىبەك قۇرمانالى قالامگەردىڭ كىسىلىك كەلبەتىن اشىپ, انا سۇتىمەن دارىعان ابزال قاسيەتتەرىن بايان ەتتى. كەش سوڭى اقىننىڭ جاڭا ولەڭىن وقۋىمەن قورىتىندى-
لاندى.
اقىندىق – تىلسىممەن استاسقان اسپاني الەم. شىن تالانتتىڭ ىرگەتاسى ادىلەت پەن ەركىندىك, ار مەن ۇيات, ادامدىق پەن ىنساپ ارقىلى قالانباق. «اقىن بولۋ ءوز ەركىڭ, ازامات بولۋ مىندەتىڭ» دەگەندەي, قازىبەك يسا ادىلەت ءۇشىن كۇرەسىپ, ۇلت قۇندىلىقتارىن تۇگەندەپ جۇرگەن اقىن. اقىن جولى – كەشەگى سارعايىپ اتىپ ساسكەدە سونگەن الاش ارىستارىنىڭ جولى, اردىڭ جولى. ەلىم دەپ ەمىرەنگەن اعىل-تەگىل بۇل جۇرەك – تۋعان جەرىنىڭ تۇنگى وتتارىنداي ۇلت شاڭىراعىنا ساۋلەسىن تۇسىرە بەرەرى تالاسسىز اقيقات.
