وبلىس اكىمى دارحان ساتىبالدى ازاماتتاردىڭ ەرەن ەڭبەگىن اتاپ ءوتىپ, ءوڭىر حالقى اتىنان العىس ايتتى. ايتا كەتەلىك, ساۋىتبەك ابدراحمانوۆ قازىعۇرت اۋدانىندا ومىرگە كەلگەن. جۋرناليستيكا سالاسىنداعى پرەزيدەنت سىيلىعىنىڭ لاۋرەاتى, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بار. بىرنەشە وردەن, مەدالدارمەن ناگرادتالعان. اباي اتىنداعى مەملەكەتتىك سىيلىقتىڭ, حالىقارالىق «الاش» ادەبي سىيلىعىنىڭ لاۋرەاتى. فيلولوگيا عىلىمدارىنىڭ دوكتورى, پروفەسسور. قازاقستان جۋرناليستيكا اكادەمياسىنىڭ اكادەميگى. قازاق جانە ورىس تىلدەرىندەگى كوپتەگەن كىتاپتىڭ اۆتورى, اۋدارماشى. ال ادەبيەتشى, سىنشى, پۋبليتسيست, فيلولوگيا عىلىمدارىنىڭ دوكتورى, پروفەسسور, حالىقارالىق ش.ايتماتوۆ اكادەمياسىنىڭ اكادەميگى قۇلبەك ەرگوبەك وتىرار اۋدانىندا دۇنيەگە كەلگەن. «پاراسات» وردەنىنىڭ يەگەرى, حالىقارالىق «الاش» ادەبي سىيلىعىنىڭ لاۋرەاتى.
قوس قايراتكەرگە شىعارماشىلىق تابىس تىلەگەن دارحان ساتىبالدى ءوڭىر تۇرعىندارى ۇلىسىمىزدىڭ ۇيىتقىسى – وڭتۇستىك وڭىرىنەن شىققان تۇلعالاردى ءاردايىم ماقتان تۇتاتىنىن جەتكىزدى. «سىزدەر ءبىلىم-عىلىم, جۋرناليستيكا جانە زەرتتەۋ سالالارىندا ۇلكەن جەتىستىككە قول جەتكىزدىڭىزدەر. ەلىمىزدىڭ وركەندەۋىنە, گۇلدەنۋىنە مول ۇلەس قوستىڭىزدار. كاسىبي مامان رەتىندە وزدەرىڭىزدەن كەيىنگى بۋىننىڭ قالىپتاسۋىنا ءبىرىڭىز قالامگەر, ساياسي قايراتكەر رەتىندە, ەندى ءبىرىڭىز عالىم, كورنەكتى ادەبيەت سىنشىسى رەتىندە زور ەڭبەك سىڭىردىڭىزدەر», دەدى وبلىس اكىمى.
