ەكونوميكا • 12 قىركۇيەك، 2022

ۇلتتىق ورتالىق قۇرىلادى

2030 رەت كورسەتىلدى

ەلىمىزدە اۋىل شارۋاشىلىعى ماشيناسىن جاساۋدى دامىتۋدىڭ ۇلتتىق ورتالىعى قۇرىلادى. بۇل تۋرالى يندۋستريا جانە ينفرا­قۇرىلىمدىق دامۋ مينيسترلىگىندە وتكەن جيىندا ءمالىم بولدى.

مينيسترلىككە قاراستى يندۋستريا­لىق دامۋ كوميتەتىنىڭ توراعاسى ءىلياس وسپانوۆتىڭ ايتۋىنشا، بىلتىر قازاقستاندىق زاۋىتتار 183 ملرد تەڭگەگە 13 مىڭنان استام اۋىل شارۋاشىلىعى تەحنيكاسىن شىعارعان. بۇل تاراپتاعى ءوندىرىستىڭ جىلدىق ءوسىمى 130 پايىزدى قۇراپ، 2،3 ەسە ارتقان.

سونىمەن قاتار بيىل اۋىل شارۋاشى­لىعى تەحنيكاسىن جەڭىلدەتىلگەن ليزينگكە بەرۋ باعدارلاماسىن ىسكە اسىرۋعا 40 ملرد تەڭگە ءبولىندى. ونىڭ 30 ملرد تەڭگەسى «جاسىل دامۋ» اق قاراجاتىنان جانە 10 ملرد تەڭگەسى «قازاگروقارجى» اق-نىڭ كاپيتال نارىعىنان تارتىلدى. بۇدان بولەك، ونەركاسىپتى دامىتۋ قورى تراكتورلار مەن كومباينداردى ليزينگتىك قارجىلاندىرۋ ءۇشىن 7 ملرد تەڭگە قاراجات بولمەك.

– ەلىمىزدە اۋىل شارۋاشىلىعى ماشيناسىن جاساۋدى دامىتۋ — باسىمدىققا يە مەملەكەتتىك مىندەتتىڭ ءبىرى. وسى رەتتە وتاندىق اۋىل شارۋاشىلىعى تەحنيكالارىن جاساۋدى قولداۋ ماقساتىندا اۋىل شارۋاشىلىعى ما­شيناسىن جاساۋدى دامىتۋدىڭ ۇلتتىق ورتالىعى قۇرى­لاتىن بولادى. قازىرگى كۇندە بۇل باعىتتا ءتيىستى جۇ­مىستار جۇرگىزىلۋدە. سەبەبى ەلىمىزدە اگرارلىق سەكتوردا رەسۋرستار جەتكىلىكتى جانە بۇل ونىمدەردى تۇتىنۋشىلار سانى باسىم، – دەپ اتاپ ءوتتى كوميتەت توراعاسى.

جيىندا ماماندار سالاداعى بىرقاتار تۇيتكىلدى ماسەلەنى ورتاعا سالىپ، وڭتايلى شەشۋ جولدارىن قاراستىردى. جيىن بارىسىندا كوتەرىلگەن ساۋالدار مەن ۇسىنىستار بويىنشا ارنايى تالداۋ جۇمىستارى جۇرگىزىلەتىن بولادى.

بۇعان دەيىن اۋىل شارۋاشىلىعى مينيسترلىگى جەڭىلدەتىلگەن ليزينگ باعدارلاماسىن ىسكە اسىرعان ءبىر اي ىشىندە «قازاگروقارجىعا» 43،6 ملرد تەڭگەگە 1 089 بىرلىك اۋىل شارۋاشىلىعى تەحني­كاسىن ساتىپ الۋعا ءوتىنىم تۇسكە­نىن حابارلاعان ەدى. بۇل رەتتە 16،6 ملرد تەڭگەگە 369 بىرلىك تەحنيكا قارجى­لان­دىرىلعان.

جەڭىلدىكپەن كرەديت بەرۋ شارتتارى كەلەسىدەي: ليزينگ مەرزىمى – 10 جىلعا دەيىن، جىلدىق سىياقى مولشەرلەمەسى – 6 پايىز، ليزينگ بويىنشا باستاپقى جارنا – 0 پايىز، نەگىزگى قارىزدى قايتارۋ بويىنشا جەڭىلدىكتى كەزەڭ – 1 جىل. ءبىر ليزينگ الۋشىعا قارجىلاندىرۋ سوماسى 205 ملن تەڭگەدەن جانە ءۇش اۋىل شارۋاشىلىعى تەحنيكاسىنان اسپايدى. قارجىلاندىرۋ ەكى جىلدىق كەزەڭ ىشىندە ءبىر-اق رەت بەرىلەدى.

«جەڭىل­دەتىل­گەن نەسيە باعدارلاماسى 20 جىلعا ەسەپ­تەلگەن جانە رەۆولۆەرلىك سيپاتقا يە. ونى ىسكە اسىرۋ ءۇشىن 40 ملرد تەڭگە بولىنگەن. بۇل سوماعا قازاق­ستاندا جاسالعان 1 مىڭعا جۋىق اۋىل شارۋاشى­لىعى تەحنيكاسىن ساتىپ الۋ جوسپارلانىپ وتىر»، دەپ حابارلادى اۋىل شارۋاشىلىعى مينيسترلىگى.

سوڭعى جاڭالىقتار

ۇقساس جاڭالىقتار