سەنات توراعاسى جولداۋدا ادىلەتتى قازاقستان قۇرۋدىڭ جولى ايقىن كورسەتىلگەنىن ايتتى. ماۋلەن اشىمباەۆ مۇنى ستراتەگيالىق باعدارلامالىق قۇجات رەتىندە قاراستىرۋ كەرەك دەپ ەسەپتەيدى.
«جولداۋدا مەملەكەتتىك ساياساتتى ترانسفورماتسيالاۋدىڭ ناقتى قادامدارى كورسەتىلگەن. قازاقستاندىق وتباسىلارعا, بالالارعا ۇلتتىق قوردىڭ رەسۋرستارىنان قوسىمشا كومەك بەرىلەدى. بۇل ۇلتتىق تابىستى بارىنشا ءادىل ءبولۋدى كوزدەيدى. سونداي-اق ءسان-سالتانات سالىعىن ەنگىزۋ تۋرالى ۇسىنىس تا الەۋمەتتىك ادىلەتتىلىكتى قامتاماسىز ەتۋگە ارنالعان ماڭىزدى قادامداردىڭ ءبىرى. جالپى, جولداۋدا سوڭعى جىلداردا قوعامدى الاڭداتقان كوپتەگەن ماسەلەگە جاۋاپ بەرىلگەن», دەدى ماۋلەن اشىمباەۆ.
باسىلىم ءتىلشىسىنىڭ ساۋالىنا جاۋاپ بەرگەن ماۋلەن اشىمباەۆ كەزەكتەن تىس پرەزيدەنت سايلاۋى, ءماجىلىس پەن ءماسليحاتتار سايلاۋىنا دا توقتالىپ, بۇل بيلىكتى دەمونوپولياسىزداندىرۋ ءۇشىن جاسالىپ جاتقانىن ايتتى. سەنات توراعاسى مۇنداي ماڭىزدى قادام ەلىمىزدە تەڭگەرىمدى جانە باسەكەگە قابىلەتتى ساياسي جۇيە قۇرۋعا باعىتتالعان ساياسي رەفورمالاردىڭ جالعاسى ەكەنىن دە تىلگە تيەك ەتتى.
سونىمەن قاتار سەزد حاتشىلىعىنىڭ مەڭگەرۋشىسى الداعى ءدىن ليدەرلەرىنىڭ فورۋمىنا دايىندىقتىڭ سوڭعى كەزەڭدەرى تۋرالى باياندادى. ماۋلەن اشىمباەۆتىڭ ايتۋىنشا, شەتەلدەن كەلگەن دەلەگاتسيالار مەن مەيمانداردىڭ كوپتىگىنە قاراماستان, ۇيىمداستىرۋشىلاردىڭ الدىندا ەلوردا تۇرعىندارى مەن قوناقتارى ءۇشىن كەز كەلگەن قولايسىزدىقتى بارىنشا ازايتۋ مىندەتى تۇر. سونداي-اق ريم پاپاسىنىڭ مەسساسى ءۇشىن قازاقستانعا كەلەتىن ازاماتتار مەن تۋريستەردىڭ ءىس-شاراعا ەركىن قاتىسۋىنا جاعداي جاسالۋدا. اتاپ ايتقاندا, لوگيستيكانى جەڭىلدەتۋ ءۇشىن قاتىسۋشىلاردى مەسسا وتەتىن جەرگە جەتكىزۋ ءۇشىن ارنايى اۆتوبۋستار ۇيىمداستىرىلادى, قاتىسۋشىلاردى تىركەۋدىڭ قولايلى جۇيەسى قۇرىلدى جانە ول قازىردىڭ وزىندە جۇمىس ىستەپ تۇر.
كونگرەسس جۇمىسىنا ريم پاپاسىمەن قاتار يسلام, حريستيان, يۋدايزم, بۋدديزم, يندۋيزم, داوسيزم, سينتويزم جانە باسقا دا الەمدىك دىندەردىڭ كوشباسشىلارى مەن وكىلدەرى قاتىسادى. سەزگە مۇسىلمان الەمىنىڭ كورنەكتى رۋحاني كوشباسشىسى – ءال-ازھاردىڭ جوعارعى يمامى شەيح احمەد ات-تايەب, ءيزرايلدىڭ باس راۆۆيندەرى جانە باسقا دا ءدىن قايراتكەرلەرى كەلەدى. الايدا سەزد حاتشىلىعىنىڭ مەڭگەرۋشىسى بۇل فورۋمدى تەك ءدىني ءىس-شارا رەتىندە قاراستىرماۋ كەرەك ەكەنىن اتاپ ءوتتى.
«رۋحاني كوشباسشىلار حالىقارالىق ۇيىمداردىڭ وكىلدەرىمەن, ساياساتكەرلەرمەن بىرلەسىپ الەمدەگى بۇگىنگى سىن-قاتەرلەرگە قارسى ارەكەت ەتۋ جولدارىن ىزدەيدى. سوندىقتان الەمدىك جانە ءداستۇرلى دىندەر ليدەرلەرىنىڭ سەزى – ەلدەر مەن حالىقتار اراسىنداعى دىنارالىق, وركەنيەتارالىق ديالوگتى دامىتۋ تاسىلدەرى تالقىلاناتىن الاڭ», دەدى ماۋلەن اشىمباەۆ.
