ءىس-شاراعا سەنات پەن ءماجىلىس دەپۋتاتتارى, ۇكىمەت مۇشەلەرى مەن ورتالىق مەملەكەتتىك ورگاندار باسشىلارى, نۇر-سۇلتان, الماتى, شىمكەنت قالالارى مەن وبلىستار ءماسليحاتتارىنىڭ حاتشىلارى, باق جانە ازاماتتىق قوعام وكىلدەرى قاتىستى.
«مەملەكەت باسشىسى حالىققا جولداۋىندا ء«بىزدىڭ بۇگىنگى باستامالارىمىز قازاقستاننىڭ بولاشاعىن ايقىندايدى. ءبىز كۇن سايىن ەسكى مەن جاڭانىڭ, توقىراۋ مەن دامۋدىڭ اراسىنان تاڭداۋ جاسايمىز. بارشاڭىزدى ۇلت مۇددەسى ءۇشىن ۇيىسۋعا شاقىرامىن» دەپ, حالىقتى ادىلەتتى قازاقستاندى بىرگە قۇرۋعا شاقىردى. سوڭعى كۇردەلى جاعدايلارعا بايلانىستى ايماقتاردىڭ جالپىەلدىك ستراتەگيالىق باعىتتارعا جۇمىس ىستەۋ ماڭىزدىلىعى بۇرىنعىدان دا ارتتى», دەدى بىرلەستىك توراعاسى تولەۋبەك مۇقاشەۆ.
«حالىقتىڭ ءال-اۋقاتىن كوتەرۋگە باعىتتالعان تىڭ باعدارلامالار ۇسىنىلعان بۇل جولداۋ يگىلىكتى باستامالاردىڭ باستاۋى, جارقىن بولاشاقتىڭ نىشانى بولارى ءسوزسىز. شىنىندا, ەندى ءبىز جاڭا قازاقستاندى قۇرۋ ءۇشىن ەل تاريحىنداعى ەلەۋلى وقيعاعا بەيجاي قاراماي, بىرلىگىمىز بەن ىنتىماعىمىزدى, تاتۋلىعىمىز بەن تۇراقتىلىعىمىزدى جانە ءوزارا اۋىزبىرشىلىگىمىزدى كوزدىڭ قاراشىعىنداي قاستەرلەپ, جۇمىلا جۇمىس ىستەۋىمىز قاجەت», دەدى ول.
سونداي-اق سپيكەردىڭ ايتۋىنشا, بۇل جولداۋ ساياسي رەفورمالاردى جانە جاڭا ەكونوميكالىق ساياساتتى ىسكە اسىرۋ, اۋىل شارۋاشىلىعى, مەديتسينا, ءبىلىم بەرۋ جۇيەسىن دامىتۋ, ەڭ تومەنگى جالاقى دەڭگەيىن كوتەرۋ, زەينەتاقى جۇيەسىن جاڭعىرتۋ, قوعامدا زاڭ ۇستەمدىگىن بەرىك ورناتۋ سىندى ماسەلەلەردى كوتەرىپ قانا قويماي, الداعى ۋاقىتتاعى ەل وڭىرلەرىنىڭ ساياسي-الەۋمەتتىك, ەكونوميكالىق دامۋ ۆەكتورىن ايقىنداپ بەردى.
پرەمەر-مينيستر كەڭسەسىنىڭ ۇيىمداستىرۋ جۇمىستارى جانە ايماقتىق دامۋ ءبولىمى مەڭگەرۋشىسىنىڭ ورىنباسارى رىسكەلدى ساتباەۆ جيىندا اعىمداعى كوپ تۇيتكىلدى شەشۋدىڭ كىلتى جەرگىلىكتى ءوزىن-ءوزى باسقارۋدا ەكەندىگىنە توقتالدى. ياعني ايماق حالقىنىڭ قالاۋىن, ىقتيارىن بىلدىرەتىن جانە جالپى مەملەكەتتىك مۇددەنى ەسكەرە وتىرىپ, قابىلدانعان شەشىمدەردى جۇزەگە اسىرۋ شارالارىن بەلگىلەيتىن ءارى اتقارىلۋ بارىسىن باقىلايتىن ءماسليحاتتاردىڭ بۇعان بارىنشا اتسالىسۋى اسا ماڭىزدى. باسقوسۋدا سەنات پەن ءماجىلىس دەپۋتاتتارى سالالىق ماسەلەلەردى كوتەرسە, وڭىرلەردىڭ ءماسليحات باسشىلارى ايماقتارداعى احۋالعا شولۋ جاساپ, جولداۋ اياسىندا ءوز اۋماقتارىنىڭ قانداي جۇمىستار اتقارۋعا كىرىسكەنىن جەتكىزدى.
بۇل رەتتە ۇلتتىق ەكونوميكا ۆيتسە-ءمينيسترى باۋىرجان وماربەكوۆ «قر جەرگىلىكتى ءوزىن-ءوزى باسقارۋ تۋرالى» ارنايى زاڭىن قابىلداۋ باعىتىنداعى جۇمىستاردى باياندادى.
«2018 جىلدان باستاپ قولدانىستاعى بيۋدجەت زاڭناماسىنىڭ وزگەرىسكە ۇشىراعانى ءمالىم. بۇرىن بيۋدجەتتىك جۇيە ءۇش دەڭگەيدەن قۇرالىپ, اۋىلدىق وكرۋگتەر اۋداندىق بيۋدجەتتەن قارجىلاندىرىلدى. قازىر 4 دەڭگەيلى جۇيەگە اۋىسىپ, ءار اۋىلدىق وكرۋگتىڭ جەكە بيۋدجەتى بار. بۇدان وزگە نەگىزگى قۇجات – جەرگىلىكتى ءوزىن-ءوزى باسقارۋدىڭ 2025 جىلعا دەيىنگى دامۋ تۇجىرىمداماسى قابىلداندى. بىلتىر اۋىل اكىمدەرىن تىكەلەي سايلاۋى ۇدەرىسى دە ەنگىزىلدى. قازىر اۋدان اكىمدەرىن تىكەلەي سايلاۋدى ەنگىزۋ جۇمىستارى جۇرگىزىلۋدە. وعان دا ءتيىستى زاڭ جوباسى پارلامەنتكە ۇسىنىلدى. مۇنداعى جاڭالىق – اۋداندار اكىمدەرىنىڭ تىكەلەي سايلاۋىن وتكىزۋدى 2023 جىلدان باستاپ 2025 جىلعا دەيىن كەزەڭ-كەزەڭىمەن باستاۋ جوسپارلانىپ وتىر. ونداعى نەگىزگى تالاپتارى مەن تاسىلدەرى اۋىل اكىمدەرىنىڭ سايلاۋىنا ۇقسايدى», دەدى زاڭ تالاپتارىن كەڭىنەن ءتۇسىندىرىپ وتكەن ۆيتسە-مينيستر.
ونىڭ ايتۋىنشا, زاڭ جوباسى ءبىرىنشى كەزەكتە مەملەكەتتىك باسقارۋدىڭ جوعارى دەڭگەيلەرىنە تاۋەلدىلىكتى تومەندەتۋىنە باعىتتالعان. اتاپ ايتقاندا, مۇنىڭ سيپاتى ازاماتتاردىڭ اشىق داۋىس بەرۋى ارقىلى ءتورت جىل مەرزىمگە جەرگىلىكتى ءوزىن-ءوزى باسقارۋدىڭ وكىلدى ورگاندارى – كەڭەستەردىڭ قۇرىلۋىنان كورىنبەك.
ءىس-شارا سوڭىندا قاتىسۋشىلار مەملەكەت باسشىسىنىڭ جولداۋى بويىنشا بارشا قازاقستاندىقتارعا ۇندەۋ جاسادى.
«بۇگىنگى گەوساياسي احۋال – كەز كەلگەن مەملەكەت ءۇشىن سىن. وسى سىندى وتكەرە العان, وتكەرىپ قانا قويماي, بۇل سىنداردان كۇشەيىپ شىققان مەملەكەتتىڭ بولاشاعى جارقىن, ەرتەڭى ەڭسەلى, تۇعىرى بيىك بولارى ءسوزسىز. سوندىقتان زامان اعىمىنان قالماي دامۋدىڭ داڭعىل جولىنا تۇسەمىز دەسەك, حالىقتىڭ ءال-اۋقاتى مەن ساياسي ومىرىنە وڭ وزگەرىستەر الىپ كەلۋگە باعىتتالعان, ۇلكەن وزگەرىستەرگە باستايتىن, ەلىمىزدىڭ وركەندەۋىنە جاڭا سەرپىن جانە ەكپىن بەرەتىن ستراتەگيالىق ماڭىزى بار قۇجات – جولداۋدا ايتىلعان مىندەتتەردى ىسكە اسىرۋعا بارشامىز اتسالىسىپ, جۇمىلا ەڭبەك ەتۋىمىز كەرەك», دەلىنگەن ۇندەۋ ماتىنىندە.
ايتا كەتەيىك, قازاقستان ءماسليحاتتارى دەپۋتاتتارىنىڭ بىرلەستىگى – ەلدەگى بارشا ءماسليحات وكىلدەرىنىڭ باسىن قوسقان بىرەگەي ۇيىم.
