پارتيانىڭ قوستاناي وبلىستىق فيليالىنىڭ اقپاراتى بويىنشا, 5 كۇندە اماناتتىقتار امانقاراعاي, وزەرنوە جانە باسامان اۋىلدارىندا زارداپ شەككەن 731 وتباسىنا ءبىرىنشى كەزەكتە قاجەتتى زاتتار مەن ازىق-ت ۇلىك جەتكىزدى. جالپى العاندا, 270 توننا گۋمانيتارلىق كومەك تاراتىلدى. بۇل جۇمىستىڭ بارلىعىن ەرىكتىلەر اتقارۋدا. «جاستار رۋحى» جاستار قاناتىنىڭ اقمولا وبلىستىق فيليالىنىڭ توراعاسى سۇلتانبەك بەكەشەۆتىڭ ايتۋىنشا, ۆولونتەر بولۋ – قوعامعا پايدا اكەلۋ دەگەن ءسوز. «كوپ ادام جالاقى تولەنبەيتىن جۇمىسقا جانىڭدى سالىپ كىرىسۋدىڭ نە كەرەگى بار دەپ ويلايدى. ومىردە ءبارى اقشامەن ولشەنبەيدى. مۇندا ەرەسەكتەر مەن بالالاردىڭ جۇزىنەن قاراپايىم ريزاشىلىقتى بايقايمىن», دەدى ول.
الايدا مۇنداي جۇمىستى ۇيىمداستىرۋ وڭاي ەمەس. جۇيەلى جۇمىس ءتارتىبىن قالىپتاستىرۋ قاجەت. مىنە, وسى ماقساتتا ماقتاارال اۋداندىق ماسليحاتىنداعى Amanat پارتياسىنىڭ دەپۋتاتى سۇندەت كەنجەباەۆ اۋليەكول اۋدانىنا ۆولونتەر رەتىندە كەلدى. «اۋدانىمىزدا سۋ تاسقىنى بولعان كەزدە ەلىمىزدىڭ تۇكپىر-تۇكپىرىنەن ەرىكتىلەر جينالدى. سول تۇستا ۇيلەستىرۋشىلەردىڭ ءبىرى بولدىم. سەبەبى مۇنداي جاعدايدا گۋمانيتارلىق كومەكتەن بولەك, ادامي رەسۋرستى ءتيىمدى پايدالانۋ ماڭىزدى. وسى تاجىريبەنى قوستانايلىقتارمەن ءبولىسىپ جاتىرمىز», دەدى ول.
«جاقىنىنا كومەككە ۇمتىلعان ادام قاۋىپ-قاتەر تۋرالى ويلانبايدى», دەيدى الديار جۇماباي ەسىمدى ۆولونتەر. سونىڭ دالەلى – قوستاناي وبلىسىنداعى تابيعي ءورت. «زارداپ شەككەندەرگە كومەك كورسەتىپ جاتقانىمىزعا بىرنەشە كۇن بولدى. قازاقستاننىڭ تۇكپىر-تۇكپىرىنەن جۇك كولىكتەرى كەلىپ جاتىر. وندا تيەلگەن زاتتاردى ءتۇسىرىپ ءجۇرمىز. ءبىر وقيعا مەنى ەرەكشە تاڭعالدىردى. كورشىلەرى ءبىر اجەنىڭ ءۇيىن سوندىرەمىز دەپ جۇرگەندە ءوز باسپانالارى ورتەنىپ كەتىپتى. قاريانىڭ ءۇيى ءدىن-امان. وتانداستارىمىز وزگەنىڭ باسىنا تۇسكەن قيىنشىلىققا بەيجاي قاراپ وتىرا المايدى», دەيدى الديار.
ال «جاستار رۋحىنىڭ» بەلسەندىسى جاينا ءالىموۆا بولسا, ۆولونتەر بولۋ ايەل زاتىنا جات دەگەن تۇسىنىكتى جوققا شىعارىپ ءجۇر. «ارينە, 50 كيلو تارتاتىن ءبىر قاپ ۇندى كوتەرە المايمىن. الايدا قىزدار كەلگەن زاتتاردى سۇرىپتاۋعا كومەكتەسىپ ءجۇر. سەبەبى ازىق-ت ۇلىكتى, تاۋارلاردى بىركەلكى تاراتۋ كەرەك. سونداي-اق گۋمانيتارلىق كومەكتىڭ جالپى ەسەبىن جۇرگىزەمىز. تاۋلىك بويى وسىندامىز. وسى جەردە تۇنەيمىز», دەدى ول.
قالپىنا كەلتىرۋ جۇمىسىنا تۇركىستان وبلىسىنىڭ ۆولونتەرلەرى دە قوسىلدى. «ارىس پەن ماقتاارالداعى وقيعالار كەزىندە زارداپ شەككەن ادامدارعا كومەكتەستىك. سول كەزدە وبلىسىمىزعا ەلىمىزدىڭ تۇكپىر-تۇكپىرىنەن ەرىكتىلەر كەلىپ, قالپىنا كەلتىرۋ جۇمىسىنا اتسالىستى. ءبىرىنشى كەزەكتە قاجەتتى ازىق-ت ۇلىك جىبەردى. تابيعي ءورت تۋرالى ەستىگەن كەزدە ۆولونتەرلەر توبىنا قوسىلۋ ءۇشىن بىردەن «جاستار رۋحىمەن» بايلانىسقا شىقتىم. جاعدايدى ءوز كوزىممەن كورىپ, زارداپ شەككەن ادامدارمەن جۇزدەسكەن سوڭ «قوستانايلىقتار – ءبىز سىزدەرمەن بىرگەمىز!», دەگىم كەلەدى», دەپ اتاپ ءوتتى ولجاس مامىر ەسىمدى بەلسەندى.
«جاستار رۋحى» جاستار قاناتىنىڭ توراعاسى نۇرجان جەتپىسباەۆتىڭ مالىمدەۋىنشە, اۋليەكول اۋدانىنا ەلىمىزدىڭ تۇكپىر-تۇكپىرىنەن 300-دەن استام ەرىكتى جينالعان.
«ۆولونتەرلەر گۋمانيتارلىق كومەكتى قويمالارعا جايعاستىردى. ازىق-ت ۇلىك پەن قاجەتتى زاتتاردى تۇرعىنداردىڭ ۇيلەرىنە جەتكىزىپ بەرۋدە. زارداپ شەككەندەر مەن ەۆاكۋاتسيالانعاندارعا جىلى ءسوزىمىزدى ايتىپ, مورالدىق قولداۋ كورسەتۋ دە ماڭىزدى. بۇل – ءبىزدىڭ شىنايى جاناشىرلىعىمىزدى ءبىلدىرۋ عانا ەمەس, سونىمەن بىرگە ولارعا قيىن ساتتە كۇش-جىگەر بەرۋ. سونىمەن قاتار جاستار قالپىنا كەلتىرۋ جۇمىستارىنا, ورتتەن كەيىنگى ۇيىندىلەردى سۇرىپتاۋعا, اۋماقتى تازالاۋعا جۇمىلدىرىلعان. مۇنىمەن قوسا ءبىز ورتتەن زارداپ شەكپەگەن, بىراق قولداۋدى قاجەت ەتەتىن كوپبالالى جانە از قامتىلعان وتباسىلارعا دا ازىق-ت ۇلىك تاراتامىز», دەدى ن.جەتپىسباەۆ. سونداي-اق ول قازىر تۇرمىستىق تەحنيكا مەن قۇرىلىس ماتەريالدارى كوبىرەك كەلىپ جاتقانىن ايتتى.
ۆولونتەر رايىمبەك باقىتجانوۆ قوستاناي وبلىسىنا ەلوردادان كەلگەن. ول اپات تۋرالى ەستي سالا بىردەن ەرىكتى رەتىندە بارۋعا شەشىم قابىلداعانىن ايتتى.
«جۇك تيەلگەن كولىكتەر ساعات سايىن كەلىپ جاتادى, ۇيىقتاماي, دەمالماي جۇمىس ىستەۋگە تۋرا كەلەدى. بىراق ەرىكتى بولۋدىڭ باستى قاسيەتى دە وسى. سەبەبى ءبىز ادامدارعا ناقتى ىسپەن كومەكتەسەمىز. سوندىقتان مۇمكىندىگىم بولا سالىسىمەن وسىندا ەش ويلانباستان كەلدىم. ءبىز مۇندا كومەك, قولداۋىمىز قانشا قاجەت بولسا, سونشا ۋاقىتقا دەيىن جۇمىس ىستەيمىز», دەدى ول.
جەرگىلىكتى تۇرعىن امانجول احمەتوۆ ەرىكتىلەرگە العىسىن ايتىپ, ەڭ باستىسى, ەلىمىزدە تىنىشتىق بولسىن دەگەن تىلەگىن جەتكىزدى.
«بۇكىل قازاقستان حالقى بىزگە كومەكتەسىپ جاتىر. ازىق-ت ۇلىك تاپشىلىعى جوق, بىزگە قاجەتتىنىڭ ءبارىن اكەلدى. بۇل ءورت قازاقستاندىقتاردىڭ قيىن ساتتە ءبىر-بىرىنە كومەكتەسۋگە ءازىر جاناشىرلىعىن كورسەتتى», دەدى ول.
بۇعان دەيىن پارلامەنت ماجىلىسىندەگى پارتيا دەپۋتاتتارى دينارا زاكيەۆا, امانجول ءالتاي جانە پارتيا حاتشىسى رينات كەرتاەۆ قوستاناي وبلىسىندا ورتتەن زارداپ شەككەندەردىڭ جاعدايىن سۇراپ بارىپ, ءورت سوندىرۋگە جۇمىلدىرىلعان قىزمەتكەرلەرىمەن جۇزدەسكەن بولاتىن. سونداي-اق امانقاراعاي, لەسنوە جانە نوۆونەجينكا اۋىلدارىنىڭ بالالارىنا پارتيانىڭ جىل سايىنعى «بالانى مەكتەپكە دايارلايىق!» اكتسياسى اياسىندا مەكتەپ فورماسى, وقۋلىقتار, ريۋكزاكتار جانە كەڭسە تاۋارلارى بار جيىنتىقتار تابىستالدى.
ەسكە سالا كەتەيىك, اماناتتىقتار زارداپ شەككەندەرگە 1 200 توننادان استام گۋمانيتارلىق كومەك جينادى. پارتيا فيليالدارى جانىنداعى گۋمانيتارلىق كومەك جيناۋ پۋنكتتەرى ەلىمىزدىڭ بارلىق 20 وڭىرىندە جۇمىس ىستەيدى. Amanat پارتياسى ورتالىق اپپاراتىنىڭ ۇجىمى دا زارداپ شەككەندەرگە كومەك كورسەتۋ قورىنا بىركۇندىك جالاقىسىن اۋداردى.
