جارىلعىش زات قويىلعانى تۋرالى اقپارات قالاداعى ەكى اۋرۋحاناعا كەلىپ تۇسكەن. جەدەل قىزمەت ناۋقاستار مەن قىزمەتكەرلەردى ەۆاكۋاتسيالادى, كولىك قاۋىپسىز قاشىقتىققا شىعارىلعان. وقيعا ورنىندا ساپەرلار جۇمىس ىستەپ جاتىر.
«قازىر قالانىڭ جەدەل جانە توتەنشە قىزمەتتەرى الماتى اۋماعىنداعى ەكى مەديتسينا مەكەمەسىندە اقپاراتتى تەكسەرىپ جاتىر. وسىنداي حابارلامالارعا قاتىستى العاشقى كەشەندى شارالار جۇرگىزىلۋدە, ونىڭ ىشىندە ادامداردى ەۆاكۋاتسيالاۋ دا بار. وقيعا ورنىندا ساپەر بولىمشەلەرى جۇمىس ىستەپ جاتىر», دەدى پوليتسيا دەپارتامەنتىنىڭ ءباسپاسوز حاتشىسى سالتانات ازىربەك.
كەيىن پوليتسيا وكىلدەرى تەكسەرۋ قورىتىندىسى بويىنشا «بومبا قويىلعانى» تۋرالى اقپارات جالعان بولىپ شىققانىن ايتتى.
«پد جەدەل باقىلاۋ ورتالىعى مالىمەتىنشە, تاڭعى ساعات 10:57-دە ەكى نىساندا جۇمىستار توقتادى. اقپارات جالعان بولىپ شىقتى, جارىلعىش قۇرىلعىلار تابىلمادى. مەديتسينالىق مەكەمەلەر قالىپتى جۇمىس رەجيمىنە كوشتى. قازىر جەدەل بولىمشەلەر اتى-ءجونى بەلگىسىز تۇلعانى ىزدەۋگە كىرىستى», دەدى پد وكىلدەرى.
