دەنساۋلىق ساقتاۋ مينيسترلىگىنىڭ كەشەگى مالىمەتىنە سۇيەنسەك, 19 571 ادام كوروناۆيرۋس ينفەكتسياسىنان ەمدەلۋدە, ولاردىڭ ىشىندە 1 472 پاتسيەنت ستاتسيوناردا, 18 099 ناۋقاس امبۋلاتوريالىق دەڭگەيدە ەم قابىلداۋدا. ىندەتكە شالدىققانداردىڭ اراسىندا 33 ادامنىڭ جاعدايى اۋىر, 12 پاتسيەنتتىڭ جاعدايى وتە اۋىر, 6 ناۋقاس ءوجج اپپاراتىندا جاتىر.
ەلىمىز بويىنشا ەكپە الۋشىلاردىڭ دا قاتارى كۇن سايىن ارتۋدا. ناقتىراق ايتساق, ءبىرىنشى كومپونەنت 10 777 692 ادام ۆاكتسينا سالدىردى, ەكىنشى كومپونەنت – 10 506 711 ادام العان. رەۆاكتسينالانعاندار سانى – 4 977 049 ادام. ال Pfizer ۆاكتسيناسىنىڭ ءبىرىنشى دوزاسىن 1 231 796 ادام سالدىرسا, ەكىنشى دوزاسىن 1 179 694 ادام سالدىردى. ونىڭ ىشىندە ءبىرىنشى كومپونەنت ۆاكتسينا سالدىرعان جاسوسپىرىمدەر – 869 781, جۇكتى ايەلدەر – 41 334, بالا ەمىزەتىن ايەلدەر – 145 108. ال ەكىنشى كومپونەنت سالدىرعان جاسوسپىرىمدەر – 850 809, جۇكتى ايەلدەر – 39 024, بالا ەمىزەتىن ايەلدەر – 140 438 ادام.
دەنساۋلىق ساقتاۋ مينيسترلىگى ۆاكتسينامەن باسقارىلاتىن ينفەكتسيالاردى باقىلاۋ باسقارماسىنىڭ باس ساراپشىسى ايدانا ەرگاسەن كوروناۆيرۋسقا قارسى ۆاكتسينا الۋ اۋرۋدان قورعانۋدىڭ بىردەن-ءبىر جولى ەكەنىن العا تارتتى.
«ادام ەڭ الدىمەن ەكى دوزامەن تولىق ۆاكتسينالاۋدان ءوتۋى كەرەك. سودان كەيىن 6 ايدان كەيىن يممۋنيتەت تومەندەي باستايدى. ونى زەرتتەۋلەر كورسەتىپ وتىر. سوندىقتان 6 ايدان سوڭ 3-دوزانى, تاعى 6 ايدان سوڭ 4-دوزانى الۋدى ۇسىنامىز. ونىڭ ادام اعزاسىنا كەرى اسەرى جوق. قايتا كوروناۆيرۋس ينفەكتسياسىنا قارسى ۇجىمدىق يممۋنيتەتتى ساقتاپ تۇرادى. جاڭا شتامداردىڭ شىعۋىنا توسقاۋىل بولادى», دەدى مامان.
ەلوردادا «وميكرون» جانە «ستەلس-وميكرون» كوروناۆيرۋس شتامدارىنا بايلانىستى ەپيدەميالىق جاعداي ناشارلاپ, قالانىڭ «سارى ايماققا» وتكەنىن جازعان ەدىك. وسىعان بايلانىستى نۇر-سۇلتان قالاسىنىڭ باس مەملەكەتتىك سانيتارلىق دارىگەرى بىرقاتار شەكتەۋ شاراسىن قابىلدادى. دالىرەك ايتساق, ناۋقاسپەن جاقىن بايلانىستا بولعان ادامداردى قاشىقتان جۇمىس ىستەۋگە اۋىستىرۋ, COVID-19-عا قارسى ۆاكتسينالاۋعا ءابسوليۋتتى قارسى كورسەتىلىمدەرى بار قىزمەتكەرلەردى جانە جۇكتى ايەلدەردى قاشىقتان جۇمىس ىستەۋگە اۋىستىرۋ, ادام كوپ جينالاتىن ورىندارعا (ساۋدا ويىن-ساۋىق ورتالىقتارى, ساۋدا ۇيلەرى, جابىق بازارلار, كونتسەرت زالدارى, تەاترلار, كينوتەاترلار, ستاديوندار جانە باسقا دا سپورت عيماراتتارى جانە ت.ب.) بارعان كەزدە, سونداي-اق 5 جاسقا دەيىنگى بالالاردى قوسپاعاندا جانە تاماقتانۋ كەزىندە, قالالىق قوعامدىق كولىكتە جول جۇرگەن كەزدە ماسكا تاعۋ, 10-نان اسا ادامنىڭ قاتىسۋىمەن وتەتىن جيىنداردى ونلاين فورماتقا كوشىرۋ ۇسىنىلدى.
سونىمەن قاتار ەلوردالىق سانيتارلىق-ەپيدەميالىق باقىلاۋ دەپارتامەنتى بارلىق ادامدى ەش سەبەپسىز كوپ جينالاتىن ورىندارعا بارماۋعا, شەكتەۋ شارالارىن ساقتاۋعا شاقىرادى.
