مۇنداي القالى جيىن اقوردادا ەمەس, شاڭ-توپىراعى بۇرقىراپ جاتقان شالعايداعى قازاقتىڭ كيەلى جەرىندە وتكىزۋدىڭ ءوزىنىڭ سيمۆوليكالىق استارى بار.
جۇزدەن اسا ادام تاڭ بوزارا تۇرىپ, جولعا شىعىپ, تاس جولمەن سەلكىلدەپ, اپتاپ ىستىقتا ۇلىتاۋعا توي تويلاۋعا ەمەس, وي قوزعاۋعا باردى. تۇرتسەڭ قازبا شىعاتىن دەيتىن كەندى ولكەنىڭ قازىرگى ايانىشتى جاعدايىن ۇلت جاناشىرلارى كوزبەن كوردى. تاعى ءبىر مارتە قازىر ءسوزدىڭ ەمەس, ءىستىڭ, ءبولىنۋ ەمەس, بىرىگۋ كەزەڭى ەكەنىن سەزىندى.
وبلىس اتاۋىنان عانا ەمەس, بار بايلىعىنان دا ايىرىلعان ءوڭىردى عانا ەمەس, بۇكىل ەلدى تۇلەتۋ, بويىنا قان جۇگىرتىپ, قالت-قۇلت كۇن كەشكەن ەلدىڭ ەڭسەسىن كوتەرىپ, سەلدىرەگەن سەنىمىن, ۇكىلى ءۇمىتىن وياتۋ, ءبىر مۇراتقا جالپاق جۇرتتى جۇمىلدىرۋ ءۇشىن نە جاسالۋى كەرەك؟
مەملەكەت باسشىسى جاي سىن, قۇر دابىرا, ساپىرما ءسوز ەمەس, ناقتى وي, ۇتىمدى ۇسىنىس كۇتتى. ۇلتتى ۇيىستىراتىن, ءبىر مۇراتقا جۇمىلدىراتىن وي-پىكىردى تىڭدادى.
ەل اراسىندا ابىرويلى, اۋزى دۋالى اعالار مەن ويى وزىق زامانداستار تاراپىنان ءبىراز وي ايتىلدى دا. ۇلىتاۋداعى مىنبەدەن سويلەي الماعاندار ءۇشىن ارنايى Qurultay ءموبيلدى قوسىمشاسى جۇمىس ىستەيتىن بولادى. ەندى ەل بۇگىنى مەن ەرتەڭىنە, مەملەكەتتىڭ دامۋىنا, ازاماتتىق قوعامنىڭ بەكۋىنە قاتىستى وي-ۇسىنىستارى بار قازاقستاندىقتار قۇرىلتاي جۇمىسىنا بەلسەنە قاتىسا الادى.
مەملەكەت باسشىسى وسى جولى قوعامدا ايتىلىپ جۇرگەن بارلىق ماسەلەدەن حاباردار ەكەنىن, جاي حاباردار ەمەس, ورىندى سىن-ۇسىنىستار بويىنشا ەڭ جوعارعى دەڭگەيدە وزگەرىس, ناقتى شەشىم قابىلداناتىنىن تاعى ءبىر دالەلدەدى.
ءبىر قۇرىلتايمەن قىرۋار ماسەلە ءبىر كۇندە شەشىلمەسى انىق. قۇرىلتايدان قايتقان جۇرتتىڭ ارقايسىسىنىڭ ساناسىندا جاڭارعان قازاقستان تۋرالى ادەمى ارمان-ءۇمىت, سەنىم قىلاڭ بەرگەنى راس. كيەلى جەردە ايتىلعان تىلەك قابىل بولسىن.
ال ءبىزدىڭ مىندەت – سول ءۇشىن جۇمىس ىستەۋ.
بيبىگۇل جەكسەنباي,
«باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ پرەزيدەنتى
