اكىمنىڭ ايتۋىنشا, وسى جىلدىڭ 5 ايىندا وبلىستىڭ نەگىزگى كورسەتكىشتەرى بويىنشا وڭ ديناميكا بايقالادى. بۇل پاندەميادان كەيىن ەكونوميكانىڭ قالپىنا كەلگەنىن بىلدىرەدى. ونەركاسىپ نەگىزىنەن گاز ءوندىرۋ كولەمىنىڭ جانە گاز كوندەنساتىنىڭ ۇلعايۋى ەسەبىنەن 2,4%-عا ءوستى. وڭدەۋ ونەركاسىبىندەگى ءوسىم سورعى-كومپرەسسورلىق قۇبىرلار, ۇساقتايتىن شارلار, ارنايى تەحنيكا, سيليكات كىرپىش, پوليەتيلەن قۇبىرلارى جانە باسقا دا تاۋارلار ءوندىرىسىن ۇلعايتۋ ەسەبىنەن قامتاماسىز ەتىلگەن.
– نەگىزگى كاپيتالعا سالىنعان ينۆەستيتسيالار 140 ملرد تەڭگەنى قۇرادى. كورسەتكىش سىرتقى جانە بيۋدجەتتىك ينۆەستيتسيالار ەسەبىنەن 2%-عا ۇلعايدى. مۇناي جانە گاز قۇبىرلارىن, تۇرعىن جانە تۇرعىن ەمەس ماقساتتاعى 600-گە جۋىق جاڭا عيماراتتاردى سالۋ ەسەبىنەن قۇرىلىس سەكتورى 2,3%-عا ءوستى. 206 مىڭ شارشى مەتر تۇرعىن ءۇي پايدالانۋعا بەرىلدى. قالاارالىق تاسىمالداردىڭ قايتا جاندانۋىنا جانە اۆتوبۋستاردا ەلەكتروندى بيلەتتەۋدىڭ ەنگىزىلۋىنە بايلانىستى كولىك قىزمەتتەرىنىڭ كولەمى 1 ملرد تەڭگەگە ۇلعايدى. مال بورداقىلاۋ الاڭدارىنىڭ ەت ءوندىرۋىن ازايتۋى سالدارىنان اۋىل شارۋاشىلىعىنداعى جالپى ءونىم كولەمىنىڭ ازداپ تومەندەۋى بايقالادى. سونداي-اق ىشكى ساۋدا كولەمى نەگىزىنەن رەسەيدەن كەلەتىن تاۋارلار يمپورتىنا شەكتەۋلەر ەنگىزۋگە بايلانىستى ازداپ تومەندەدى, – دەدى ع.ەسقاليەۆ.
اكىمنىڭ بايانداۋىنشا, بيىل جالپى قۇنى 230 ملرد تەڭگە بولاتىن 21 جوبانى ىسكە قوسۋ جوسپارلانعان. ناتيجەسىندە, 800-گە جۋىق تۇراقتى جۇمىس ورنى قۇرىلادى دەپ كۇتىلۋدە.
– 2022 جىلى جالپى قۇنى 382 ملرد تەڭگە بولاتىن قاراشىعاناق كەن ورنىن كەڭەيتۋ جوباسى باستالدى. ورالدا اۋە-جۇك تەرمينالىن سالۋ بويىنشا تۇركيانىڭ SSistem Logistics كومپانياسىمەن ۋاعدالاستىققا قول جەتكىزىلدى. بۇل ءوڭىردىڭ ترانزيتتىك الەۋەتتى ىسكە اسىرۋدان تۇسەتىن تابىسىن ۇلعايتۋعا مۇمكىندىك بەرەدى. 2021 جىلى «بيزنەستىڭ جول كارتاسى» باعدارلاماسى بويىنشا 22,6 ملرد تەڭگەگە 943 شارت سۋبسيديالاندى, 4,5 ملرد تەڭگەگە 586 كەپىلدىك شارتىنا قول قويىلدى جانە 124 ملن تەڭگەگە 27 گرانت بەرىلدى. بارلىعى 4,8 ملرد تەڭگە ءبولىندى. باعدارلاما اياسىندا ۇن تارتۋ ءوندىرىسى, جيھاز فابريكاسى, مەديتسينالىق ورتالىقتار, بورداقىلاۋ الاڭدارى جانە باسقا دا جوبالار قولداۋ تاپتى, – دەدى اكىم.
بىلتىر وبلىستاعى اگروقۇرىلىمدارعا 14,2 ملرد تەڭگە كولەمىندە سۋبسيديا تولەنگەن. وبلىس حالقىنىڭ كارتوپ, پياز, قىرىققابات, ءسابىز سەكىلدى ونىمدەر بويىنشا قاجەتتىلىكتەرىن تولىق قاناعاتتاندىرۋ ماقساتىندا «جاسىل بەلدەۋ» جوباسى بويىنشا داقىلداردىڭ القابى 40%-عا دەيىن ۇلعايادى. سونداي-اق جوبادا كوكونىس قويمالارىنىڭ سىيىمدىلىعىن ارتتىرۋ جوسپارلانعان. بىلتىر سىيىمدىلىعى 6 مىڭ توننا بولاتىن 3 قويما سالىنسا, وسى جىلى 13 مىڭ توننالىق 4 كوكونىس قويماسىن سالۋ جوسپارلانۋدا.
– ءسۇت جانە ءسۇت ونىمدەرىنىڭ يمپورتىنا تاۋەلدىلىكتى تومەندەتۋ ماقساتىندا ء«سۇت بەلدەۋى» جوباسى بويىنشا بىلتىر ءسۇت ءوندىرىسى كولەمى 3,1 مىڭ تونناعا ارتسا, بيىل قوسىمشا 5 مىڭ تونناعا ۇلعايادى دەپ كۇتىلۋدە. وسى جۇمىستار ءوڭىر تۇرعىندارىن ازىق-ت ۇلىكپەن قامتاماسىز ەتۋگە جانە باعانى تۇراقتاندىرۋعا ءوز سەپتىگىن تيگىزەتىن بولادى. ءوڭىردىڭ دامۋىنا ۇلكەن سەرپىن بەرەتىن كەلەسى باعىت – ەتتى مال شارۋاشىلىعى. وسىمدىك شارۋاشىلىعىنا قاراعاندا, جىل بويى حالىقتى جۇمىسپەن قامتاماسىز ەتەتىن ەتتى مال شارۋاشىلىعى وبلىسىمىز ءۇشىن ءداستۇرلى سالا. بۇعان بارلىق تۇردەگى مال سانىنىڭ جىل سايىن 10%-عا دەيىن تۇراقتى ءوسۋى دالەل. بۇگىندە وبلىستا 860 مىڭ باس ءىرى قارا, 1,8 ملن باس قوي مەن ەشكى, 300 مىڭ باس جىلقى تىركەلىپ وتىر. ايماق 1,3 ميلليون ادامدى جىل سايىن ەتپەن قامتىپ وتىر. وسى رەتتە, وبلىس ەت ءوندىرىسىن ارتتىرىپ, ساپاسىز ەت يمپورتىن الماستىرىپ, وڭدەلگەن ەت ونىمدەرىنىڭ ەكسپورتىن ۇلعايتا الاتىنىن اتاپ وتكىم كەلەدى. ياعني باتىس قازاقستان وبلىسىنىڭ ەلىمىزدىڭ باسقا دا وڭىرلەرىن ەتپەن قامتاماسىز ەتۋگە الەۋەتى بار, – دەدى اكىم.
سوڭعى جىلدارى مال شارۋاشىلىعى دامىعان اۋدانداردا قۇرعاقشىلىق سالدارىنان مالدىڭ شىعىنعا ۇشىراۋ قاۋپى جوعارى بولعانى ءمالىم. ۇكىمەت قولداۋىنىڭ ناتيجەسىندە بىلتىردان باستاپ رەسەيدەن كەلەتىن سۋ كولەمى 80%-عا ۇلعايتىلىپ, مال شىعىنى ورىن المادى. سونداي-اق بۇگىنگى تاڭدا اگرارلىق ۋنيۆەرسيتەت بازاسىندا ءوڭىردىڭ الەۋەتىن پايدالانا وتىرىپ ەتتى مال شارۋاشىلىعىنداعى ونىمدىلىكتى ارتتىرۋدىڭ عىلىمي نەگىزدەلگەن تاسىلدەرى دايىندالۋدا. سونىمەن قاتار مەملەكەت باسشىسىنىڭ سۋارمالى جەرلەردى ۇلعايتۋ تاپسىرماسىنا سايكەس, وبلىستا 5 جىلدا سۋارمالى جەر الاڭىن 44 مىڭ گەكتارعا دەيىن ارتتىرۋ جونىندە جول كارتاسى بەكىتىلدى. بيىل 5 061 گەكتار سۋارمالى جەردى قولدانىسقا ەنگىزۋ جوسپارلانىپ وتىر.
– سوڭعى 5 جىلدا قۇرىلىس جۇمىستارىنىڭ كولەمى 792,4 ملرد تەڭگەنى قۇرادى. قۇرىلىس جۇمىستارىنىڭ كولەمى 111,8 ملرد تەڭگەدەن 192,8 ملرد تەڭگەگە دەيىن نەمەسە 172,5%-عا ۇلعايدى. وسى جىلى وبلىس بويىنشا تۇرعىن ءۇيدى پايدالانۋعا بەرۋ جوسپارى 600 مىڭ شارشى مەتردى قۇرايدى. سونداي-اق 5 ايدىڭ قورىتىندىسى بويىنشا 206,4 مىڭ شارشى مەتر تۇرعىن ءۇي, 1 026 پاتەر بەرىلدى. قۇرىلىس جۇمىستارىنىڭ كولەمى 39,2 ملرد تەڭگەگە تەڭ, – دەدى ع.ەسقاليەۆ.
اكىمنىڭ ايتۋىنشا, بيىل 27 اۋىلدىق ەلدى مەكەنگە گاز تارتىلادى. وسىلايشا, وبلىس حالقىنىڭ تابيعي گازبەن قامتاماسىز ەتىلۋى 99,8%-دى قۇرايتىن بولادى. بيىل 35 ەلدى مەكەنگە اۋىز سۋ وتكىزىلمەك. بۇعان 7,4 ملرد تەڭگە ءبولىندى. اتالعان جۇمىستاردىڭ ناتيجەسىندە وبلىس حالقىن اۋىز سۋمەن قامتۋ كورسەتكىشى 92,0%-دى قۇرايتىن بولادى.
– جىل قورىتىندىسى بويىنشا وبلىستا نورماتيۆتىك جاعدايداعى جەرگىلىكتى اۆتوجولداردىڭ ۇلەسىن 39%-دان 50%-عا دەيىن ارتتىرۋ جوسپارلانۋدا. مەملەكەت باسشىسىنىڭ تاپسىرماسىنا سايكەس, وڭىردە اۆتوموبيل جولدارىن رەكونسترۋكتسيالاۋ جانە جوندەۋ جۇمىستارى جانداندىرىلدى. 2022 جىلى وبلىستىڭ اۆتوجولدارىن دامىتۋعا 51,2 ملرد تەڭگە ءبولىندى جانە 600 شاقىرىمنان استام جولدى جوندەۋ جوسپارلانۋدا. وسى جىلى قارجىلاندىرۋ كولەمى بۇعان دەيىنگى جىلدارمەن سالىستىرعاندا 2 ەسە ۇلعايدى, – دەدى اكىم.
