ۇسىنىلعان كانديداتتاردىڭ ارقايسىسى جەكە قارالدى. تاعايىنداۋدىڭ بۇل فورماتى ۇزدىكتەردى انىقتاۋعا جانە ولاردىڭ جۇمىسىن لايىقتى تۇردە باعالاۋعا مۇمكىندىك بەرەدى.
ءبىرىنشى كەزەكتە قر ۇلتتىق ۇلانى باس قولباسشىسىنىڭ ورىنباسارى قىزمەتىنە «حالىق قاھارمانى» قايرات ۇمبەتوۆتىڭ كانديداتۋراسى قارالدى.
«وزدەرىڭىز كورىپ وتىرسىزدار, ول بۇكىل ساتىنى ءوتتى. ءبىزدىڭ ۇلاندارعا دۇرىس تاربيەنى «حالىق قاھارمانى» بەرمەسە, باسقا كىم بەرەدى؟ قايرات جارىلقاسىن ۇلى, ۇلاندىقتاردىڭ مورالدىق-پسيحولوگيالىق جاعدايىن شىڭداپ, ساربازدارمەن تاربيە جۇمىستارىن جۇرگىزۋى قاجەت. ءسىزدىڭ ەرلىگىڭىز ولارعا ۇلگى بولادى دەپ ويلايمىن. بۇل تاعايىنداۋمەن ءبىز ۇلتتىق ۇلاندى نىعايتامىز دەپ ۇمىتتەنەمىن», دەدى مينيستر.
2016 جىلى قاراعاندى وبلىسىنداعى اسكەري بولىمدە پولكوۆنيك قايرات ۇمبەتوۆ جاۋىنگەرلىك گراناتانى وكوپقا ءتۇسىرىپ العان جاس ساربازدى ءوز دەنەسىمەن جاۋىپ, اجالدان قۇتقارىپ قالعان بولاتىن. سارباز ءدىن امان, ال پولكوۆنيكتىڭ بويىنان گراناتانىڭ الپىسقا جۋىق جارىقشاعى تابىلدى.
سونداي-اق ۆەدومستۆو باسشىلارىنىڭ كەڭەسى بارىسىندا ىشكى ىستەر ءمينيسترىنىڭ بۇيرىعىمەن:
– نۇر-سۇلتان قالاسى پوليتسيا دەپارتامەنتى باستىعىنىڭ ورىنباسارى لاۋازىمىنا قۋانىش ورىنبەتوۆ;
– پاۆلودار قالاسى پوليتسيا باسقارماسىنىڭ باستىعى لاۋازىمىنا ەرمەك ءالجانوۆ;
– شىمكەنت قالاسى ەڭبەكشى اۋداندىق پوليتسيا باسقارماسىنىڭ باستىعى لاۋازىمىنا الماس امزەەۆ تاعايىندالدى.
