تاۋەلسىزدىكتىڭ 30 جىلدىعىنا جانە وبلىس ورتالىعىنىڭ تالدىقورعان قالاسىنا كوشكەنىنە 20 جىل تولۋىنا وراي ۇيىمداستىرىلعان شاراعا كەلۋشىلەر ءدان ريزا. كورمەگە «قۇرمەت» وردەنى مەن «فوتوونەر قايراتكەرى» مەدالىنىڭ يەگەرى شۇكىرالى شاحاي مەن جۋرناليستەر وداعىنىڭ مۇشەسى جەڭىس ىسقابايدىڭ جانە باسقا دا جەرگىلىكتى فوتوگرافتاردىڭ ءۇش جۇزگە جۋىق سۋرەتى قويىلعان. فوتوسۋرەتتەردە ەلىمىزدىڭ 30 جىل ىشىندەگى ءجۇرىپ وتكەن جولى, دامۋ ساتىلارى, ەلباسىنىڭ قاتىسۋىمەن وتكەن ءتۇرلى تاريحي وقيعالار, ەلىمىزدىڭ داڭقتى ازاماتتارى, تاريحي ەسكەرتكىشتەر – ءبارى قامتىلعان.
– بۇل كورمە شىن مانىندە ەل تاۋەلسىزدىگىنىڭ 30 جىلىنداعى جەتىستىكتەردى سۋرەت ارقىلى كورسەتىپ بەرگەن كەرەمەت شارا بولدى. تاۋەلسىزدىك العان العاشقى جىلدارداعى دۇكەن سورەلەرىنىڭ بوس قالعان, زاۋىت-فابريكالاردىڭ توقتاپ تۇرعان قيىن كەزەڭدەرىن دە, ەلباسىنىڭ ءبىر ماقساتقا جۇمىلدىرعان تاريحي وقيعالارىن دا, ەلگە ەڭبەك سىڭىرگەن قايراتكەرلەردى دە, تابيعاتىمىزدىڭ كەرەمەتتەرىن دە وسى فوتوسۋرەتتەردەن كورىپ, ريزا بولدىق. قازاقستاننىڭ, سونىڭ ىشىندە الماتى وبلىسىنىڭ ءوسىپ-وركەندەگەنى كوز الدارىڭىزدا ءوتىپ جاتىر. ءبىز ەلىمىزبەن ماقتانامىز. وسىنداي شارانى ۇيىمداستىرعان ازاماتتار شۇكىرالى مەن جەڭىسكە كوپ راحمەت ايتامىن. فوتوگرافقا ءار ءساتتى قالت جىبەرمەيتىن بايقامپازدىق كەرەك. بۇگىنگى كورمەدەگى سۋرەتتەر – سونداي شەبەرلىكتىڭ ناتيجەسى. كورمە تالدىقورعاندا ءبىر اي بويى تۇردى. وسىنداي سۋرەتكە باسىلعان تاريحتى تۇرعىندار مەن جاستار كەلىپ كورىپ, كوڭىلگە ءتۇيدى دەگەن ويدامىن, – دەيدى وبلىس اكىمى اماندىق باتالوۆ.
كورمەدە قالا تۇرعىندارى مەن قوناقتارىنىڭ نازارىنا جالپى سانى 300 فوتوسۋرەت ۇسىنىلدى. وندا قازاقستاننىڭ تاۋەلسىزدىك العان العاشقى جىلدارىنان باستاپ, بۇگىنگە دەيىنگى تاريحي كەزەڭدەرى قامتىلعان. اتاپ ايتقاندا, مەملەكەتتىك تۋدىڭ, ەلتاڭبانىڭ العاشقى نۇسقالارىنىڭ ەلباسىنا تانىستىرىلۋ ءساتى, مەملەكەتتىك رامىزدەردىڭ قابىلدانعان كەزى, تۋدىڭ عارىشقا ۇشىرىلعان ءساتى, ەلباسىنىڭ ءتۇرلى حالىقارالىق باسقوسۋلارعا قاتىسقان شاقتارى, شەتەل پرەزيدەنتتەرىمەن بىرگە تۇسكەن سۋرەتتەرى, ەلىمىزگە تايقازاندى الىپ كەلگەن شاق, تۇڭعىش پرەزيدەنتتىڭ وليمپيادا جەڭىمپازدارىمەن كەزدەسۋى جانە باسقا دا ءار كۇنى تاريحقا اينالعان وتىز جىلدىڭ شەجىرەسى وسى كورمە بارىسىندا ايگىلەندى.
الماتى وبلىسى
