قازاقستان پارلامەنتى سەناتىنىڭ دەپۋتاتتارى مەن اپپارات قىزمەتكەرلەرى ورتتەن قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتتى جانە زارداپ شەككەندەردىڭ تەزىرەك ساۋىعىپ كەتۋىنە تىلەكتەستىكتەرىن جەتكىزدى.
«بۇل جاعداي پرەزيدەنتىمىزدىڭ تىكەلەي باقىلاۋىندا. مەملەكەتتىك ورگاندار ريددەر تۇرعىندارىنا بارلىق قاجەتتى كومەكتى كورسەتەدى. بۇل وتە قيىن جاعداي ەكەنى ءسوزسىز. وسىنداي سىن-ساعاتتا ءبارىمىز بىرلەسىپ, كومەككە مۇقتاج ازاماتتارعا قولداۋ كورسەتۋىمىز كەرەك. پارلامەنت سەناتىنىڭ جانە جەكە ءوز اتىمنان ءورت سالدارىنان قايتىس بولعان ازاماتتىڭ جاقىندارىنا قايعىلارىنا ورتاقتاسىپ, كوڭىل ايتامىن. سونداي-اق, زارداپ شەككەندەردىڭ تەزىرەك ساۋىعىپ كەتۋلەرىنە تىلەكتەسپىز», دەدى ماۋلەن اشىمباەۆ.
ەل پرەزيدەنتىنىڭ تاپسىرماسى بويىنشا ۇكىمەت پەن شىعىس قازاقستان وبلىسىنىڭ اكىمدىگى قازىر ورتتەن زارداپ شەككەن قالا تۇرعىندارىنا كومەك كورسەتۋدە جانە ولاردى تۇرعىن ۇيمەن قامتاماسىز ەتۋ جۇمىستارىمەن اينالىسىپ جاتىر.
وسىنداي قيىن كەزەڭدە سەناتورلار ءبىر كۇندىك ەڭبەكاقىسىن ورتتەن زارداپ شەككەندەردىڭ كومەك قورىنا اۋدارۋ جانە ريددەر تۇرعىندارىن قولداۋ جونىندە شەشىم قابىلدادى.
ايتا كەتەيىك, ماجىلىسمەندەر دە ريددەردە زارداپ شەككەندەرگە كومەك كورسەتۋ ءۇشىن ءبىر كۇندىك جالاقىسىن اۋداردى.
پالاتا سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسى ريددەردەگى تۇرعىندارعا كومەك كورسەتۋ ءۇشىن ءماجىلىس دەپۋتاتتارىنىڭ ءبىر كۇندىك جالاقىسىن اۋدارۋ تۋرالى قاۋلى قابىلدادى.
