ۇلتتىق ەكونوميكا ءمينيسترى اسەت ەرعاليەۆتىڭ ايتۋىنشا, بىلتىر بيزنەس سالاسىنا ەرەكشە نازار اۋدارىلدى. ماسەلەن, 2020 جىلى ەنگىزىلگەن ءموراتوريدىڭ ناتيجەسىندە بيزنەس سۋبەكتىلەرىن تەكسەرۋ 4,6 ەسە ازايعان. ونىڭ ىشىندە شاعىن جانە ميكروبيزنەستى تەكسەرۋ 7 ەسە كەمىدى. «بيزنەستىڭ جول كارتاسى – 2025» باعدارلاماسى بويىنشا شاعىن جانە ورتا بيزنەس سۋبەكتىلەرىن سۋبسيديالاۋ 7 ملرد تەڭگەگە ارتتى. سونداي-اق سالالىق شەكتەۋلەر الىنىپ تاستالدى. «قاراپايىم زاتتار ەكونوميكاسى» باعدارلاماسى بويىنشا نەسيەلەۋدىڭ جالپى كولەمى 1 ترلن تەڭگەگە كوبەيگەن. سۋبسيديالاۋ مەرزىمى 10 جىلعا دەيىن ۇزارتىلىپ, تاۋار مەن كورسەتىلەتىن قىزمەت تىزبەسى كەڭەيتىلگەن. كەپىلدىك بەرۋ قۇرالى جاقسارتىلعانىن دا اتاپ وتكەن ءجون.
– بيزنەس-احۋالدى جاقسارتۋ ءۇشىن زاڭنامالىق تۇزەتۋلەردىڭ 8 توپتاماسى قابىلداندى. قازاقستان دۇنيەجۇزىلىك بانكتىڭ Doing business رەيتينگىندە ءۇش ساتىعا كوتەرىلىپ, 192 مەملەكەتتىڭ ىشىنەن 25-ورىنعا يە بولدى. «قابىلدانعان شارالار 2020 جىلى ىشكى جالپى ءونىم قۇرىلىمىنداعى شاعىن جانە ورتا بيزنەستىڭ ۇلەسىنىڭ 30,5 پايىزعا دەيىن ءوسۋىن قامتاماسىز ەتتى, – دەدى اسەت ەرعاليەۆ مينيسترلىكتىڭ القا وتىرىسىندا.
ۆەدومستۆو باسشىسىنىڭ ايتۋىنشا, بىلتىر مەملەكەتتىڭ ەكونوميكاداعى ۇلەسىن تومەندەتۋ جانە باسەكەلەستىكتى دامىتۋ شارالارى قابىلداندى. جەكەشەلەندىرۋدىڭ 2020 جىلعا دەيىنگى كەشەندى جوسپارىن ىسكە اسىرۋ اياقتالىپ, 736 ۇيىمدى باسەكەلى ورتاعا شىعارۋدى كوزدەيتىن 2025 جىلعا دەيىنگى جاڭا جوسپار ازىرلەندى. بۇل رەتتە, مەملەكەتتىڭ ەكونوميكاعا قاتىسۋ ۇلەسى 14,9 پايىزعا قىسقارعان.
– تاريفتىك ساياساتتا تۇرعىندارعا ارنالعان تاريفتەردىڭ ءوسۋىن تەجەۋ بويىنشا جۇمىستار اتقارىلدى. وسى جىلدىڭ باسىندا تۇرعىندارعا ارنالعان ءتاريفتىڭ ءوسۋى تەجەلدى. ونىڭ ىشىندە, سۋمەن جابدىقتاۋ 0,34 پايىزعا, جىلۋمەن جابدىقتاۋ 3,75 پايىزعا, سۋ بۇرۋ 1,37 پايىزعا جانە ەلەكترمەن جابدىقتاۋ 3,92 پايىزعا تومەندەدى. بۇدان بولەك 2020 جىلى توتەنشە جاعداي مەن كارانتين كەزىندە تۇرعىندارعا ارنالعان تاريفتەر ورتاشا ەسەپپەن 7,4 پايىزعا ازايدى. ناتيجەسىندە, حالىقتىڭ 1 ملرد تەڭگەسى ۇنەمدەلدى, – دەدى مينيستر.
ينۆەستيتسيا تارتۋ دا كەنجەلەپ قالعان جوق. 2021 جىلعى 1 قاڭتارعا دەيىن 1,5 ترلن تەڭگەگە 863 مەملەكەت-جەكەمەنشىك ارىپتەستىگى جوباسى جاسالعان. بىلتىر جوبالار سانى 2018 جىلمەن سالىستىرعاندا 86 پايىزعا وسكەن.
– ءىرى قالالاردىڭ توڭىرەگىندەگى ينجەنەرلىك جانە الەۋمەتتىك ينفراقۇرىلىمدى جاڭعىرتۋ جۇمىستارى جالعاستى. 23 ملرد تەڭگەگە 49 جوبا ىسكە اسىرىلدى. 112 شاقىرىم اۆتوجول, 1 مىڭ شاقىرىم ينجەنەرلىك جەلى, 11 الەۋمەتتىك نىسان سالىندى. 19 مونوقالا مەن 7 شاعىن قالادا 670 جۇمىس ورنى قۇرىلىپ, 200 شاقىرىم جول مەن ينجەنەرلىك جەلى جاڭعىرتىلدى. «اۋىل – ەل بەسىگى» جوباسى شەڭبەرىندە 90 ملرد تەڭگەگە 986 جوبا جۇزەگە اسىرىلدى. «ديپلوممەن – اۋىلعا!» جوباسى بويىنشا وتكەن جىلى 8,8 مىڭ مامانعا كوتەرمە جاردەماقى بەرىلىپ, 5 مىڭى تۇرعىن ۇيمەن قامتاماسىز ەتىلدى, – دەدى ءا.ەرعاليەۆ.
2020 جىلى سالىق زاڭناماسىنا بيزنەستى قولداۋ ماقساتىندا بىرقاتار وزگەرىس ەنگىزىلدى. سونىڭ ءبىرى – م ۇلىك سالىعىن تولەۋدەن بوساتۋ. جەكە كاسىپكەرلەر جەكە تابىس سالىعىنان بوساتىلدى. اۋىل شارۋاشىلىعى ءونىمىن وندىرۋشىلەر اۋىل شارۋاشىلىعى ماقساتىنداعى جەر سالىعىن تولەمەيتىن بولدى. الەۋمەتتىك ماڭىزى بار ازىق-ت ۇلىك تاۋارىن ساتۋ مەن يمپورتتاۋ ءۇشىن قوسىمشا قۇن سالىعى مولشەرلەمەسى 12 پايىزدان 8 پايىزعا تومەندەتىلدى.
