وتكەن جىلدىڭ تامىز ايىندا «اتلەتيك» سپورت كەشەنىنىڭ بازاسىندا وڭالتۋ ورتالىعى ىسكە قوسىلدى. بۇگىنگى تاڭدا مۇندا كوروناۆيرۋسپەن اۋىرعان ناۋقاستار ەمدەلۋدە. دەگەنمەن دە الداعى ۋاقىتتا اتالعان ورتالىق كەڭەيتىلىپ, مۇگەدەكتىگى بار ادامداردى وڭالتۋمەن دە اينالىسادى دەگەن جوسپار بار. ماسەلەن, «ايقىن مسب» جاۋاپكەرشىلىگى شەكتەۋلى سەرىكتەستىگىنىڭ دەمەۋشىلىگىمەن كەشەن قۇرىلىسىنا 57 ملن تەڭگە جۇمسالعان. وعان ەشقانداي بيۋدجەت قارجىسى شىعىندالماعان. بىراق بۇل ماقساتقا وبلىس اكىمدىگىنىڭ تاراپىنان 0,9 گەكتار جەر بولىنگەن. ورتالىقتاعى نىسانداردىڭ جالپى اۋدانى 900 شارشى مەتردەن اسادى. كەشەن مۇمكىندىگى شەكتەۋلى جانداردىڭ قوعامعا بەيىمدەلۋىنە, ولاردى كاسىپكە باۋلىپ, وزدەرىنىڭ فيزيكالىق مۇمكىندىكتەرىنە سايكەس تابىس تابۋعا ىقپال ەتۋگە باۋلىپ كەلەدى. ورتالىقتا ءبىر مەزەتتە 60 ادامعا دەيىن وقىپ, جۇمىس ىستەي الادى. كەشەن نەگىزگى جانە بيزنەس-ينكۋباتوردان, ياعني شەبەرحانالاردان تۇرادى. ونىڭ بىرىنشىسىندە 30 بولمە بولسا, بيزنەس-ينكۋباتوردا تاعى 8 بولمە بار. مۇگەدەكتىگى بار ادامدار ءۇشىن جەتى تىگىن, ءۇش توكارلىق, فرەزەرلىك جانە لازەرلىك ستانوكتار, سونداي-اق ۇساقتاعىش قوندىرعىلار ورناتىلعان. ورتالىقتا ءوز بەتىنشە قوزعالىپ نەمەسە وتىرىپ جۇمىسپەن اينالىسا الاتىن كەلۋشىلەر جۇمىسقا ورنالاسۋ نەمەسە ءوز جۇمىسىن باستاۋ ءۇشىن جاڭا كاسىپتەردى يگەرەتىن بولادى. بارلىق بولمە قاجەتتى جيھازدارمەن جابدىقتالعان. ال سپورتپەن شۇعىلدانۋعا نيەتتى جاندار ءۇشىن ۆەلوترەناجەر, تەننيس ۇستەلى جانە جۇگىرۋ جولاقتارى دا قامتىلعان. «ورتالىق ەل تاۋەلسىزدىگىنىڭ 30 جىلدىعىنا وراي اشىلىپ وتىر. الەۋمەتتىك سالادا مەملەكەتتىك قولداۋدىڭ جىل سايىن ارتىپ كەلە جاتقانى بەلگىلى. سوڭعى جىلدارداعى قيىن جاعدايلارعا, الەمدىك ەكونوميكالىق داعدارىسقا جانە كوروناۆيرۋستىق پاندەمياعا قاراماستان, بىردە-ءبىر الەۋمەتتىك پاكەتتىڭ قىسقارۋىنا جول بەرىلگەن جوق. كەرىسىنشە, قولداۋ شارالارى ارتتى», دەيدى «اسار» زاڭدى تۇلعالار بىرلەستىگىنىڭ توراعاسى رۋسلان تولەگەنوۆ.
ال سيۆارا نۋرماتوۆانىڭ ايتۋىنشا, ينۆاتاكسي ديسپەتچەرلىك قىزمەتى كەڭسەسىندە وتكەن جىلدىڭ وزىندە 17 مىڭنان استام كولىكتىك قىزمەت كورسەتىلگەن ەكەن. سونىمەن قاتار «مۇگەدەكتەردىڭ جاستار قوعامى» قوعامدىق بىرلەستىگىنىڭ توراعاسى ايگەرىم داۋلەتباەۆا مۇندا بالالاردى جالپى ءبىلىم بەرەتىن مەكتەپتە وقىتۋعا دايىندايتىنىن, پسيحولوگيالىق قىزمەت, كۇندىزگى ستاتسيونار پالاتالارى, ماسساج, دارىگەرلىك قابىلداۋ جانە ەم-دوم, ەلەكتروفورەز كابينەتتەرى جۇمىس ىستەيتىنىن ايتتى. سونداي-اق بيزنەس-ينكۋباتوردا ەرەسەكتەر اعاش ويۋ, تىگىن, توكارلىق جۇمىستارمەن دە اينالىسا الادى. ال بۇگىندە ىرگەدەگى 2,6 مىڭ شارشى مەتر جەرگە يپپوتەراپيا ورتالىعىنىڭ قۇرىلىسى باستالۋدا. ورتالىقتىڭ اشىلۋ سالتاناتىنا قاتىسقان كەزدە دە جامبىل وبلىسىنىڭ اكىمى بەردىبەك ساپارباەۆ ءوڭىردىڭ ءار اۋدان ورتالىعى مەن قالالارىندا مۇمكىندىگى شەكتەۋلى بالالار مەن ەرەسەكتەرگە ارنالعان وڭالتۋ ورتالىقتارىن اشۋ مىندەتى تۇرعانىن ايتقان ەدى. ەندى مۇنداي مەكەمە بيىل تالاس اۋدانىنىڭ ورتالىعى قاراتاۋ قالاسىندا دا اشىلاتىن بولادى.
جامبىل وبلىسى
