يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتى بويىنشا, العاشقى ەكى ايدا رەسپۋبليكادا بارلىعى 15 807 تۇرعىن ءۇي سالىنىپ ءبىتىپ, تۇرعىندار يگىلىگىنە ۇسىنىلعان. سونىڭ 5 487-ءسى جەكە ۇيلەر ەكەن. قاڭتار-اقپان ايلارىنىڭ قورىتىندىسى بويىنشا تۇرعىن ءۇيدى پايدالانۋ تۇرعىسىنان بارلىق وبلىستا ءوسىم بايقالادى. كورسەتكىش اتىراۋدا – 225,7, قوستانايدا – 123,5, پاۆلوداردا – 119,3, اقتوبەدە – 118,7, ماڭعىستاۋدا – 114,1, قاراعاندىدا – 113,6, باتىس قازاقستاندا – 112,6, اتىراۋدا – 112,4, سولتۇستىك قازاقستاندا – 111,4, اقمولادا – 110,6, شىعىس قازاقستاندا – 107,9, جامبىلدا – 102,8, قىزىلوردادا – 101,9, الماتىدا – 101,6, تۇركىستاندا – 101,5 پايىزعا وسكەن.
سونىمەن قاتار شىمكەنت (456,5), الماتى (110,9) جانە نۇر-سۇلتان (106,4) قالالارى دا تۇرعىن ءۇي قۇرىلىسىمەن بەلسەندى اينالىسىپ جاتىر. مينيسترلىك تۇرعىن ءۇي قۇرىلىسىنا سالىنعان ينۆەستيتسيانىڭ 231,2 ملرد تەڭگەنى قۇراپ وتىرعانىن مالىمدەدى. بۇل بىلتىرمەن سالىستىرعاندا 36,5 پايىزعا كوپ.
قازاقستان بيىل 17 ملن شارشى مەتر تۇرعىن ءۇي سالۋدى جوسپارلاپ وتىر. اقپاننىڭ سوڭىندا وتكەن ۇكىمەت وتىرىسىندا پرەمەر-مينيستر اسقار مامين ەلباسىنىڭ 2030 جىلعا قاراي باسپانامەن قامتاماسىز ەتۋدى 1 ادامعا 30 شارشى مەترگە دەيىن جەتكىزۋ تۋرالى تاپسىرماسىن ورىنداۋ كەرەك ەكەنىن ەسكە سالعان. «بەس جىلدا 100 ملن شارشى مەتر ءۇي سالىپ, 1 ملن-عا جۋىق وتباسىن باسپانامەن قامتيمىز» دەگەن ەدى ۇكىمەت باسشىسى.
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ ايتۋىنشا, 2025 جىلعا دەيىن 100 ملن شارشى مەتردەن استام تۇرعىن ءۇي سالۋ – وتاندىق قۇرىلىس ماتەريالدارى نارىعىن دامىتۋعا دا سەپتىگىن تيگىزەدى.
– قازىرگى كەزدە وتاندىق وندىرۋشىلەر 10 تاۋار پوزيتسياسى بويىنشا ىشكى نارىقتىڭ قاجەتتىلىگىن وتەپ وتىر. 11 پوزيتسيا بويىنشا كاسىپورىندار 50 پايىزدى قامتىسا, لينولەۋم, تۇسقاعاز, سانفايانس سەكىلدى 3 پوزيتسيا بويىنشا ىشكى نارىق ءوندىرىسى بولماي تۇر. ىشكى نارىقتى تولىقتاي وتاندىق قۇرىلىس ماتەريالدارىمەن قامتۋ ءۇشىن قازىر شەتەلدىك ترانسۇلتتىق كومپانيالارمەن قازاقستاندا يمپورتتى الماستىراتىن وندىرىستەر قۇرۋ ماسەلەسىن پىسىقتاپ جاتىرمىز, – دەيدى مينيستر.
مەملەكەتتىڭ جوسپارلاۋىنشا, 2025 جىلعا تامان «نۇرلى جەر» باعدارلاماسى اياسىندا بارلىق قارجىلاندىرۋ كوزى ەسەبىنەن تۇرعىن ءۇيدى پايدالانۋعا بەرۋدىڭ جىلدىق كولەمىنىڭ ۇلعايۋى – 20,7 ملن شارشى مەترگە جەتۋى ءتيىس. سونداي-اق الداعى بەس جىلدا تۇرعىن ۇيمەن قامتۋ كولەمى – ءبىر ادامعا 26 شارشى مەتردەن ءتيىپ, حالىقتىڭ سۋمەن جابدىقتاۋ قىزمەتىنە قولجەتىمدىلىگى 100 پايىزعا جەتۋى قاجەت.
