حوككەي • 17 اقپان، 2021

پلەي-وففتا قاي قارسىلاسقا تاپ بولادى؟

16 رەت كورسەتىلدى

قۇرلىقتىق حوككەي ليگاسىندا (قحل) باق سىناپ جاتقان ەلوردانىڭ «بارىسى» كەشە تۇراقتى بىرىنشىلىكتەگى سوڭعى التى ويىنىنىڭ ءبىرىن وتكىزدى. بۇعان دەيىن پلەي-وفف كەزەڭىنىڭ جولداماسىن يەلەنىپ قويعان قازاقستاندىق كلۋبتىڭ گاگارين كۋبوگى جولىنداعى جارىستا قاي كوماندا قارسىلاسى بولاتىنى ءدال وسى ويىندارعا بايلانىستى بولماق.

قازىرگى تاڭدا جەرلەستەرىمىز بىرىنشىلىكتىڭ «شىعىس» كونفەرەنتسياسىندا 54 ويىننان كەيىن 62 ۇپاي جيناپ، سە­گىزىنشى ورىندا كەلەدى. ماتەماتيكالىق ەسەپ بويىنشا، «بارىس» تۋرنير كەستەسىندە بەسىنشى ورىنعا دەيىن كو­تە­رى­لۋىنە مۇمكىندىك بار. ويتكەنى «بارىستىڭ» الدىن­دا تۇر­عان ء«اۆتوموبيليستىڭ» ەنشىسىندە 63 ۇپاي (7-ورىن)، «تور­پەدو» (6-ورىن) مەن «تراكتوردا» 65-ۇپايدان (5-ورىن) بار.

ەلوردا كلۋبى ەندى الداعى بەس ويىننىڭ ەكەۋىن، ياعني «اۆتوموبيليست» (18 اقپان) پەن «سيبير» (21 اقپان) كلۋبتارىن نۇر-سۇلتاندا، ال «اك بارس» (23 اقپان)، «كۋنلۋن» (25 اقپان) جانە «اۆانگارد» (27 اقپان) كوماندالارىمەن سىرت ايدىندا باق سىناسادى. بۇل جەردە «بارىسقا» «سيبير» جانە «اك بارس» ۇجىمىمەن وتەتىن ويىندا ۇپاي الۋ قيىنعا سوعۋى مۇمكىن. جالپى قالعان قارسىلاستار دا جەرلەستەرىمىزگە ەكى ۇپايدى وڭاي ۇستاتا سالمايتىنى انىق، دەگەنمەن بيىلعى ماۋسىمدا «بارىس» جوعارىدا اتى اتالعان ەكى كومانداعا شاماسى كەلمەدى. ماسەلەن، وسى جىلى «سيبيرمەن» ءۇش مارتە مۇزايدىندا جولىعىپ، سونىڭ ەكەۋىندە 3:1 ەسەبىمەن ەسە جىبەرسە، 5 اقپاندا سىبىردە وتكەن باسەكەدە جەرلەستەرىمىزدىڭ باعى جاندى. بۇل قازاقستاندىق كوماندانىڭ جەتى ويىنعا سوزىلعان جەڭىلىس سەرياسىنان كەيىنگى ءبىرىنشى جەڭىسى ەدى.

ال گاگارين كۋبوگىنىڭ ءۇش دۇركىن جەڭىمپازى قازان­نىڭ «اك بارس» ۇجىمىمەن قازاقستاننىڭ «بارىسى» بيىلعى تۇراقتى بىرىنشىلىكتە ءۇش رەت كەزدەسىپ، سونىڭ تەك بىرەۋىندە عانا جەڭىس تويىن تويلادى. جالپى كەز كەلگەن كلۋب ءۇشىن «اك بارستى» جەڭۋ مارتەبە سانالادى. 2008 جىلدان بەرى ەكى كلۋب مۇزايدىندا 39 مارتە جولىعىپ، سونىڭ تەك جەتەۋىندە عانا جەرلەستەرىمىز جەڭىسكە جەتكەن ەكەن. ال قالعان 32 ويىندا قازاندىقتار باسىم تۇسكەن. ياعني «بارىس» ءار بەس ويىندا قارسىلاسىنان ۇپاي الىپ وتىرعان. ءبىزدىڭ جىگىتتەر سوڭعى رەت 2020 جىلدىڭ 16 قازانىندا «تاتنەفت-ارەنادا» وتكەن ويىندا ايدىن يەلەرىن وۆەرتايمدا تىزە بۇكتىرگەن. نەگىزگى كەزەڭدە حوككەيشىلەر ءبىر-ءبىرىنىڭ قاقپاسىنان ساڭىلاۋ تابا الماعان سوڭ، جەڭىمپاز كوماندانىڭ ەسىمى قوسىمشا ۋاقىتتا انىقتالدى. داررەن ديتستەن تاماشا پاس العان رومان ستارچەنكو قارسىلاستىڭ قاقپاسىن ءدال كوزدەپ، «بارىسقا» جەڭىس سىيلاعان ەدى.

«اۆتوموبيليسپەن» وتكەن كەيىنگى بەس ويىننىڭ ۇشەۋ­ىن­دە ەلوردا كلۋبى باسىم تۇسكەن. ەكاتە­رين­بۋرگ كومانداسى «بارىسپەن» ءبىر دەڭگەيدە دەپ تە ايتۋعا بولادى. دەمەك الداعى ويىندا دا جەرلەستەرىمىز ەكى ۇپايعا قول جەت­كىزەدى دەپ ويلايمىز. قازىر ەكى ۇجىم اراسىن ءبىر-اق ۇپاي ءبولىپ تۇرعانىن ەسكەرسەك، بۇل ماتچ وتە تارتىستى وتپەك. جەڭىلىستىڭ ەكى كومانداعا دا اۋىر سوعاتىنى انىق. ويت­كەنى تۋرنير كەستەسىندە 8-ورىن العان كوماندا پلەي-وفف ەرەجەسى بويىنشا العاشقى كەزەڭدە كوش باسىندا تۇرعان كوماندامەن كەزدەسەدى. ال كوش باسىندا 86 ۇپاي جيناعان «اك بارس» كەلەدى. 77 ۇپايمەن ەكىنشى ورىندا تۇرعان «اۆانگارد» قازان كلۋبىن قۋىپ جەتە المايدى.

قىتايدىڭ «كۋنلۋن» ۇجىمى الدەقاشان پلەي-وفف كەزەڭىنەن ءۇمىت ۇزگەن. تۋرنير كەستەسىندە سوڭعى ورىندا كەلە جاتقان قىتايلىقتار الداعى ويىنداردا ەندى تەك جان­كۇيەرلەر ءۇشىن وينايتىنى ايتپاسا دا تۇسىنىكتى. ەكى كلۋب اراسىنداعى بيىلعى ماۋسىمداعى ءۇش ويىندا دا جەرلەس­تەرىمىزدىڭ مەرەيى ۇستەم بولعان. بۇل ويىن سىرت ايدىندا وتەتىن بولعاندىقتان، «بارىسقا» وڭاي سوقپايتىنى بەلگىلى.

جەرلەستەرىمىز تۇراقتى بىرىنشىلىكتىڭ سوڭعى ويىنىن قوناقتا ومبىنىڭ «اۆانگاردىمەن» وتكىزەدى. قازىر ومبىلىقتاردىڭ قارقىنى كۇشتى. قحل-داعى كەيىنگى بەس ويىننىڭ تورتەۋىندە قارسىلاستارىنان ءىرى ەسەپپەن ايلاسىن اسىرعان. وتكەن جىلى كوماندالار ەكى رەت مۇزايدىندا جولىعىپ، ءبىر-بىردەن جەڭىسكە جەتكەن. 13 قاراشادا ەلوردادا وتكەن ويىندا «اۆانگارد» 5:1 ەسەبىمەن باسىم تۇسكەن بولسا، 23 جەلتوقساندا ومبىدا ۇيىمداستىرىلعان ماتچ­تا جەرلەستەرىمىزدىڭ ايى وڭىنان تۋدى. 3:1 ەسەبىمەن اياقتالعان ويىندا رومان ستارچەنكو، ياكوب ليليا جانە فيل ۆارونە مەرگەندىگىمەن كوزگە تۇسكەن-ءدى. بالكىم، «اۆانگارد» پەن «بارىس» اراسىنداعى ءۇشىنشى كەزدەسۋ كىم مىقتى ەكەنىن انىقتاپ قانا قويماي، پلەي-وففتا قاي كلۋب كىممەن كەزدەسەتىنىن دە انىقتاپ بەرۋى مۇمكىن. سەبەبى، كوپ جاعدايدا بارلىق ناتيجەنى سوڭعى تۋردىڭ ويىندارى شەشىپ جاتاتىنى بەلگىلى.

وسى ماۋسىمدى قوسا ەسەپتەگەندە «بارىس» قحل-دىڭ پلەي-وفف ساتىسىنا وسىمەن 13 مارتە شىعىپ وتىر. بىراق جەرلەستەرىمىز ەكىنشى كەزەڭنەن اسا العان ەمەس. «بارىس» الداعى باسەكەلەرىن ءساتتى وتكىزسە، پلەي-وففتىڭ ءبىرىنشى كەزەڭىندە «اۆانگارد»، «مەتاللۋرگ» نەمەسە «سالاۆات يۋلاەۆقا» قارسىلاس اتانباق. ال ەگەر 5 ويىندا قاجەتتى ۇپايىنا قول جەتكىزە الماسا، وندا ازۋلى «اك بارسقا» تاپ بولادى.

سوڭعى جاڭالىقتار

«شىڭىراۋ» شىڭعا شىقسىن

ونەر • بۇگىن، 00:18

تىڭ تاسىلدەردىڭ ءتيىمدى تۇسى كوپ

مەديتسينا • بۇگىن، 00:14

پاسپورت

رۋحانيات • كەشە

جەكە پەسا جازۋعا لايىق

رۋحانيات • كەشە

انا مەيىرىمى

قوعام • كەشە

دوللار ارزاندادى

قارجى • كەشە

ۇقساس جاڭالىقتار