«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق ءوسۋدى قالپىنا كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا سايكەس ازاماتتاردىڭ زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋ جانە (نەمەسە) تەگىن مەديتسينالىق كومەكتىڭ كەپىلدىك بەرىلگەن كولەمىنە كىرمەيتىن ەمدەلۋگە جانە مىندەتتى الەۋمەتتىك مەديتسينالىق ساقتاندىرۋعا اقى تولەۋ ءۇشىن, سونداي-اق, جەكە باسقارۋشى كومپانيالارعا ينۆەستيتسيالىق باسقارۋعا بەرۋ ءۇشىن پايدالانۋعا قۇقىقتارى بار.
بجزق-دا مىندەتتى زەينەتاقى جارنالارى (مزج) جانە (نەمەسە) مىندەتتى كاسىپتىك زەينەتاقى جارنالارى (مكزج) ەسەبىنەن قالىپتاستىرىلعان زەينەتاقى جيناقتارى بار تومەندەگى ادامدار زەينەتاقى جيناقتارىنىڭ ءبىر بولىگىن ءوزىنىڭ, جۇبايىنىڭ (زايىبىنىڭ) جاقىن تۋىستارىنىڭ تۇرعىن ءۇي جاعدايلارىن جاقسارتۋ ماقساتىندا جانە (نەمەسە) وزدەرى نەمەسە جۇبايى (زايىبى) نە جاقىن تۋىستارى ءۇشىن ەمدەلۋ اقىسىن تولەۋ ءۇشىن پايدالانۋ قۇقىعىن قولدانا الادى:
1) ولاردىڭ زەينەتاقى جيناقتارىنىڭ سوماسى زەينەتاقى جيناعىنىڭ بەلگىلەنگەن ەڭ از جەتكىلىكتىلىك شەگىنەن اسىپ ءتۇسۋى كەرەك.
بۇل رەتتە بىرجولعى زەينەتاقى تولەمى سالىمشىنىڭ (الۋشىنىڭ) مزج جانە (نەمەسە) مكزج ەسەبىنەن زەينەتاقى جيناقتارىنىڭ سوماسى مەن ۋاكىلەتتى وپەراتوردان ەلەكتروندىق حابارلاما العان كۇنگە قازاقستان رەسپۋبليكاسىنىڭ ۇكىمەتى بەكىتكەن زەينەتاقى جيناقتارىنىڭ ەڭ تومەن جەتكىلىكتىلىك شەگىن ايقىنداۋ ادىستەمەسىنە سايكەس ەسەپتەلگەن زەينەتاقى جيناقتارىنىڭ ەڭ تومەن جەتكىلىكتىلىك شەگى اراسىنداعى ايىرما سوماسىنان اسپاۋى ءتيىس;
2) زەينەتاقى مولشەرى الۋشىنىڭ قازاقستان رەسپۋبليكاسىنىڭ ۇكىمەتى ايقىنداعان تارتىپپەن بەلگىلەنەتىن 40 پايىزدان تومەن ەمەس دەڭگەيدەگى ورتاشا ايلىق تابىسىن الماستىرۋ كوەففيتسيەنتىن قامتاماسىز ەتە الۋى كەرەك.
بۇل رەتتە بىرجولعى زەينەتاقى تولەمى ۋاكىلەتتى وپەراتوردان باستاپقى ەلەكتروندىق حابارلامانى العان كۇنگە سالىمشىنىڭ (الۋشىنىڭ) مزج جانە (نەمەسە) مكزج ەسەبىنەن زەينەتاقى جيناقتارى مولشەرىنىڭ 50 پايىزىنان اسپاۋعا ءتيىس;
3) ساقتاندىرۋ ۇيىمىمەن زەينەتاقى اننۋيتەتى شارتىن جاساسقاندار;
بۇل رەتتە بىرجولعى زەينەتاقى تولەمى سالىمشىنىڭ (الۋشىنىڭ) جەكە زەينەتاقى شوتىنداعى مزج جانە (نەمەسە) مكزج ەسەبىنەن جيناقتالعان زەينەتاقى جيناعىنىڭ مولشەرىنەن اسپاۋى قاجەت.
زەينەتاقى جيناقتارىنىڭ ءبىر بولىگىن پايدالانۋ قۇقىعىن ىسكە اسىرۋ ءۇشىن ازاماتتار, ەڭ الدىمەن, وزدەرىنىڭ زەينەتاقى جيناقتارىن تەكسەرىپ, بجزق-داعى جەكە زەينەتاقى شوتىندا الۋعا بولاتىن سومانىڭ بار ەكەنىنە كوز جەتكىزۋلەرى ءتيىس.
قوردىڭ enpf.kz كورپوراتيۆتىك سايتىنداعى جەكە كابينەتتە, سونداي-اق, بجزق-نىڭ جاڭارتىلعان ۇيالى قوسىمشاسىندا, Telegram-دا الۋعا بولاتىن قولجەتىمدى سوما تۋرالى اقپاراتتى ونلاين رەجيمىندە تەكسەرۋ مۇمكىندىگى ىسكە اسىرىلدى.
قوردىڭ كورپوراتيۆتىك سايتىنداعى جەكە كابينەتتە جانە ۇيالى قوسىمشادا اۆتورلانۋدىڭ ەكى ءتاسىلى قولجەتىمدى: جسن مەن ءپارولدى ەنگىزۋ نەمەسە ەلەكتروندىق تسيفرلىق قولتاڭبانى پايدالانۋ. سونداي-اق, ۇيالى قوسىمشاعا كەيىننەن قايتا كىرەتىن بولساڭىز, ۇيالى قۇرىلعىڭىزدا بار بولسا Touch ID نەمەسە Face ID پايدالانۋعا بولادى. ىڭعايلى بولۋ ءۇشىن پايدالانۋشى قىزمەت كورسەتۋدىڭ قازاق نەمەسە ورىس تىلدەرىن تاڭداي الادى.
بجزق-داعى زەينەتاقى جيناقتارىن تەكسەرگەننەن كەيىن زەينەتاقى جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋعا جانە/نەمەسە ەمدەلۋگە پايدالانۋ تۋرالى شەشىم قابىلداعان سالىمشىلار (الۋشىلار) ارنايى شوت اشۋ ءۇشىن ەلەكتروندىق تسيفرلىق قولتاڭبانى (ەتسق) پايدالانا وتىرىپ, بىرجولعى زەينەتاقى تولەمىنە ءوتىنىش (بۇدان ءارى-تولەمگە ءوتىنىش) بەرۋ ءۇشىن ۋاكىلەتتى وپەراتوردىڭ ينتەرنەت – پورتالى ارقىلى ۋاكىلەتتى وپەراتورعا جۇگىنۋلەرى تيىس.
سالىمشى (الۋشى) بىرجولعى زەينەتاقى تولەمىن العان كەزىندە تولەيتىن جەكە تابىس سالىعىن (جتس) تولەۋ ءتاسىلىن وزى تاڭداۋى ءتيىس (جارنالاردى بجزق-عا اۋدارعان كەزدە جتس الىنبايتىنىن ەستەرىڭىزگە سالامىز). ول ۋاكىلەتتى وپەراتورعا تولەمگە ءوتىنىش بەرگەن كەزىندە جتس ۇستاپ قالۋ تۋرالى وتىنىشكە تاڭداعان ءتاسىلدى كورسەتىپ, ەتسق ارقىلى قول قويۋ جولىمەن ىسكە اسىرادى.
ياعني, ازاماتتار بجزق-عا جتس بىرجولعى زەينەتاقى تولەمى سوماسىنان قاي ۋاقىتتا: تولەم ساتىندە تولىق كولەمدە دەرەۋ نەمەسە جتس كەيىنگە قالدىرىلعان كەزەڭدە ۇستاپ قالۋ (زەينەتاقى تولەمدەرىنىڭ كەستەسى بويىنشا زەينەتاقى جاسىنا جەتكەن كەزدە اي سايىن تەڭ ۇلەستەرمەن) كەرەكتىگىن وزدەرى كورسەتەدى.
ۋاكىلەتتى وپەراتور 2 (ەكى) جۇمىس كۇنى ىشىندە بجزق-عا ەلەكتروندىق حابارلاما جىبەرەدى, وندا تولەمگە قابىلدانعان ءوتىنىش تۋرالى مالىمەتتەر, ونىڭ ىشىندە الۋ ماقساتى, ءتاا, تۋعان كۇنى, جسن, سالىمشى (الۋشى) ايقىنداعان مولشەردەگى بىرجولعى زەينەتاقى تولەمىنىڭ سوماسى, جتس ۇستاپ قالۋ ءتاسىلى تۋرالى مالىمەتتەر قامتىلادى, سونداي-اق, سالىمشىنىڭ (الۋشىنىڭ) ەتسق قويىلعان جتس ۇستاپ قالۋ تۋرالى ءوتىنىشى ەلەكتروندىق حابارلاماعا قوسا بەرىلەتىن بولادى.
بجزق ۋاكىلەتتى وپەراتوردان ەلەكتروندىق حابارلاما العاننان كەيىن 5 جۇمىس كۇنى ىشىندە ۋاكىلەتتى وپەراتورعا سالىمشىنىڭ (الۋشىنىڭ) بىرجولعى زەينەتاقى تولەمىنىڭ سوماسىن اۋدارادى, ول ءوز كەزەگىندە بۇل سومانى سالىمشىنىڭ (الۋشىنىڭ) ارنايى شوتىنا اۋدارادى.
بىرجولعى زەينەتاقى تولەمىنىڭ سوماسى ۋاكىلەتتى وپەراتوردا («وتباسى بانك» اق) اشىلعان سالىمشىنىڭ (الۋشىنىڭ) ارنايى شوتىندا 45 جۇمىس كۇنىنەن اسپايتىن مەرزىم ىشىندە ساقتالادى.
وسى مەرزىم ىشىندە سالىمشى (الۋشى) ۋاكىلەتتى وپەراتورعا نىسانالى ماقساتتار بويىنشا قۇجاتتارىن ۇسىنۋى ءتيىس. ەگەر ول كورسەتىلگەن مەرزىمدەردە ۇسىنىلماعان جاعدايدا, ۋاكىلەتتى وپەراتور بىرجولعى زەينەتاقى تولەمىنىڭ سوماسىن بجزق-عا قايتارۋعا ءتيىس, قور ول سومانى سالىمشىنىڭ (الۋشىنىڭ) جەكە زەينەتاقى شوتىنا ەسەپتەيدى.
وسىلايشا ازاماتتاردىڭ تۇرعىن ءۇي جاعدايلارىن جاقسارتۋ جانە (نەمەسە) ەمدەلۋگە اقى تولەۋ ماسەلەلەرى بويىنشا بارلىق وتىنىشتەرى ۋاكىلەتتى وپەراتورعا ء«بىر تەرەزە» قاعيداتى بويىنشا كەلىپ تۇسەدى جانە قارالادى. ازاماتتار تاراپىنان بجزق-عا جەكە ءوتىنىش بەرۋ تالاپ ەتىلمەيدى. تەك سالىمشىلار بجزق-دان الۋعا بولاتىن زەينەتاقى جيناقتارىنىڭ سوماسى تۋرالى مالىمەتتەردى ءوز بەتىنشە ونلاين تارتىبىمەن الۋلارى كەرەك.
زەينەتاقى جيناقتارىن تۇرعىن ءۇي جاعدايلارىن جاقسارتۋ جانە (نەمەسە) ەمدەلۋگە اقى تولەۋ ماقساتىندا الۋدان باسقا, 2021 جىلدان باستاپ ازاماتتار ءتۇرلى ينۆەستيتسيالىق ستراتەگيالاردى ۇسىناتىن ينۆەستيتسيالىق پورتفەلدى باسقارۋشىلاردى (يپب) دەربەس تاڭداۋ ارقىلى مزج جانە (نەمەسە) مكزج ەسەبىنەن وزدەرىنىڭ زەينەتاقى جيناقتارىن باسقارۋعا قاتىسا الادى. زەينەتاقى جيناقتارىنىڭ ءبىر بولىگىن يپب-عا اۋدارۋ ءۇشىن سالىمشى بجزق-نىڭ وڭىرلىك كەڭسەلەرىنە جەكە ءوزى جۇگىنۋ جولىمەن نەمەسە ەلەكتروندىق تسيفرلىق قولتاڭبانى پايدالانا وتىرىپ, بجزق-نىڭ ينتەرنەت-رەسۋرسى ارقىلى قاشىقتىقتان بجزق-نىڭ ىشكى قۇجاتىندا بەلگىلەنگەن نىسان بويىنشا ءوتىنىش بەرۋى قاجەت.
زەينەتاقى جيناقتارىنىڭ ءبىر بولىگىن يپب-عا اۋدارۋ ءۇشىن پايدالانۋ قۇقىعىن بجزق زەينەتاقى اكتيۆتەرىن سەنىمگەرلىكپەن باسقارۋ تۋرالى شارتتار, سونداي-اق, كاستودياندىق شارتتار جاساساتىن, قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى ايقىنداعان, قازاقستاننىڭ قارجى نارىعىندا يپب رەتىندە پايدا بولعاننان كەيىن عانا قولدانۋعا بولاتىنىنا نازار اۋدارامىز.
