سوڭعى كەزدەرى قوعامدا كورپوراتيۆتىك ۆولونتەرلىك قىزمەت تۋرالى ءجيى ايتىلىپ ءجۇر. سول سياقتى بوگدە ۇكىمەتتىك ەمەس ۇيىمدار, مەملەكەت-جەكەمەنشىك ارىپتەستىك, وزگە دە ينستيتۋتتار ۇيىمداستىراتىن حالىققا پايدالى بولۋدى, قايىرىمدىلىقتى ماقسات ەتكەن الەۋمەتتىك ءىس-شارالارعا قىزمەتكەرلەردى ەرىكتى نەگىزدە تارتۋدى مەڭزەيتىن بۇل شارا ەل ىشىندەگى كومپانيالاردا قولدانىسقا ەنە باستادى.
ۇلتتىق ۆولونتەرلىك جەلى قىزمەتكەرلەرىنىڭ ايتۋىنشا, كورپوراتيۆتىك ۆولونتەرلىك – بۇل ۇيىم قىزمەتكەرلەرىنىڭ ءوز كومپانياسىنىڭ قولداۋىمەن ءتۇرلى الەۋمەتتىك باعدارلامالارعا ەرىكتى تۇردە قاتىسۋى. ال اتالعان زەرتتەۋدىڭ ماقساتى قازاقستاندا كورپوراتيۆتىك ۆولونتەرلىكتى دامىتۋدىڭ وڭ تاجىريبەلەرىن زەردەلەۋ.
«8 اي ىشىندە ۇلتتىق ۆولونتەرلىك جەلى قازاقستان كومپانيالارى اراسىندا كورپوراتيۆتىك ۆولونتەرلىكتىڭ ۇزدىك تاجىريبەلەرىن زەرتتەدى. زەرتتەۋگە كورپوراتيۆتىك ۆولونتەرلىكتى دامىتۋعا قاتىسى بار 100-دەن استام ءتۇرلى كومپانيا قاتىستى. ساۋالناماعا 400 كورپوراتيۆتىك ۆولونتەر, 70 ۇكىمەتتىك ەمەس ۇيىم وكىلى جانە كورپوراتيۆتىك ۆولونتەرلىككە جەتەكشىلىك ەتەتىن 30-دان استام باسشى قاتىستى. بۇل قىزمەتكە نەگىزىنەن ءىرى بيزنەس وكىلدەرى تارتىلدى», دەيدى ۆولونتەرلەر.
كونفەرەنتسيادا «تج جانە ەكولوگيالىق باعىتتار كورپوراتيۆتىك ۆولونتەرلىكتە», «كورپوراتيۆتىك ۆولونتەرلىكتەگى الەۋمەتتىك باعىت», «حولدينگتە كورپوراتيۆتىك مادەنيەتتى (كورپوراتيۆتىك ۆولونتەرلىكتى) دامىتۋ» تاقىرىپتارىنا باياندامالار جاسالدى.
«وسى جوبا اياسىندا قازاقستاننىڭ كورپوراتيۆتىك ۆولونتەرلىكتى دامىتۋدا قانداي كەزەڭدە تۇرعانىن جانە كەلەسى ساپالى دەڭگەيگە ءوتۋ ءۇشىن قانداي قادامدار قاجەت ەكەنىن تۇسىنۋگە كومەكتەسەتىن ۇسىنىستار دايىندالدى. زەرتتەۋدىڭ قورىتىندىلارى مەن ۇسىنىمدارى مۇددەلى تۇلعالارعا پايدالى بولادى. ويتكەنى بىرلەسكەن كۇش-جىگەر كورپوراتيۆتىك ۆولونتەرلىكتى دامىتۋعا جانە قازاقستانداعى ۆولونتەرلىكتىڭ جاڭا دەڭگەيىنە قول جەتكىزۋگە ىقپال ەتەدى», دەپ اتاپ ءوتتى اقپارات جانە قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتىنىڭ توراعاسى ماديار قوجاحمەت.
