پلاتفورمانىڭ نەگىزىن قالاۋشىلاردىڭ ءبىرى – امەريكالىق وتباسى اسىراپ العان گۇلميرا. ايتۋىنشا, قازاقستان ونىڭ تۋعان وتباسىنىڭ جىلۋى, وسىنداعى دوستارىنىڭ قۇشاعى ەسەبىندە. «اراعا سان جىل سالىپ, ءوز ەلىمە قايتا ورالۋ – جانىمنىڭ ءبىر بولشەگىن قايتا الۋ سەكىلدى», دەيدى ول اسەرلەنىپ. وسى ىشكى بايلانىس ونىڭ كاسىبي ۇستانىمىنا دا اسەر ەتكەنىن اڭدادىق. ءبىزدى سۇيىندىرگەنى, ول تۋعان ەلى ءۇشىن ءبىر يگى ءىس ىستەۋ ءۇشىن «yoonee.ai» جوباسىن قولعا الىپتى. سول ماقساتتا ول فەرۋزا, ايدانا ەسىمدى دوستارىنىڭ باسىن قوسىپ, ورتالىق ازيا جاستارىنىڭ شەتەلدە ءبىلىم الۋىنا كومەكتەسەتىن «yoonee.ai» جوباسىن جۇزەگە اسىرعان.
كەيىپكەرىمىز اۋەلدە الەمدەگى بەدەلدى اۋە كومپانيالارىنىڭ ءبىرى – «Delta Air Lines» اۆياتسيا جۇيەسىندە ساراپشى بولىپ قىزمەت اتقاردى. وسى ورتالىقتا جۇمىس ىستەي ءجۇرىپ, كۇردەلى دەرەكتەرمەن, قارجىلىق مودەلدەرمەن جانە جاھاندىق لوگيستيكا سالاسىندا ءوز قابىلەتىن شىڭداعان. اۆياتسياداعى ءتارتىپ, دالدىك پەن قاۋىپسىزدىككە نەگىزدەلگەن جۇيەلىك ويلاۋ ونىڭ ارمانىنا قانات ءبىتىرىپتى. گۇلميرا كەيىننەن تەحنولوگيالىق ستارتاپ قۇرۋعا بەلىن بەكەم بايلايدى. «اۆياتسيا ادامداردى فيزيكالىق تۇرعىدا بىرىكتىرسە, IT ولاردى تسيفرلىق كەڭىستىكتە بايلانىستىرادى», دەيدى ول.
وعان ءسوز اراسىندا «قازاق مادەنيەتى مەن قۇندىلىقتارى ءومىر جولىڭىزعا اسەر ەتتى مە؟» دەگەن سۇراق قويدىق. ونىڭ جاۋابى مىناداي بولدى. «امەريكالىق بولىپ وسكەنىمە قاراماستان, مەن ءبارىبىر قازاقپىن. قازاقستانعا ورالماي تۇرىپ-اق مىنەزىمدە كوشپەلىلەرگە ءتان توزىمدىلىك, العا ۇمتىلىس بار ەكەنىن سەزەتىنمىن. قازاقتىڭ قوناقجايلىعىن العاش رەت كورگەنىمدە, تاڭعالدىم. مەنىڭ قانىمدا دا وسىنداي قاسيەت بار ەكەنىن سەزدىم. ءتىپتى مەن بۇل قاسيەتتى اقش-تا وزىممەن بىرگە الىپ جۇرگەنىمدى, ونى بايقاماعانىمدى ءتۇسىندىم. بۇل مەنىڭ بيزنەسكە دەگەن كوزقاراسىمدى دا وزگەرتتى. اقش-تا بيزنەس كوبىنە تەك مامىلە دەڭگەيىندە قالادى. ال قازاقستاندا ول – قارىم-قاتىناس, ءبىر-بىرىنە جاناشىر بولۋ. مەن وسىنى ءاردايىم ءوز بولمىسىما سىڭىرۋگە تىرىستىم. «yoonee.ai» جوباسى دا ءدال وسى ماقساتتا جۇمىس ىستەپ, ستۋدەنتتەرگە قولداۋ كورسەتەتىن جاناشىر پلاتفورما بولۋىن قالايمىن», دەيدى ول.
بۇل جوبا اقش, فرانتسيا جانە قازاقستاننىڭ ءبىلىم بەرۋ جۇيەلەرىنەن وتكەن بىرنەشە جاس ماماننىڭ ورتاق تاجىريبەسىنەن تۋعان. ولاردىڭ پايىمىنشا, كوپتەگەن ستۋدەنت قابىلەتسىزدىگىنەن ەمەس, كۇردەلى قۇجاتتاردى دايىنداۋ سالدارىنان وقۋعا تۇسە الماي قالادى. وسى تۇستا جاساندى ينتەللەكت تالاپكەرلەرگە كومەك قولىن سوزا الادى. اتالعان پلاتفورماعا ستۋدەنتتەر قۇجاتتارىن جۇكتەيدى, ال جۇيە ولاردى اكادەميالىق دالدىكپەن اۋدارىپ, باعالارىن حالىقارالىق ستاندارتقا سايكەستەندىرەدى. ماسەلەن, 5.0 GPA نەمەسە 100 بالدىق جۇيەدەگى باعا اقش جۇيەسىمەن ناقتى سالىستىرىلىپ, تاڭداعان ۋنيۆەرسيتەتتەرمەن سايكەستىك دەڭگەيى كورسەتىلەدى.
جوبانىڭ باستى ميسسياسى – جاھاندىق ءبىلىمدى دەموكراتيالاندىرۋ. «yoonee.ai» كومانداسى حالىقارالىق ستۋدەنتتەر تولەيتىن «گەوگرافيالىق سالىقتى» جويۋدى ماقسات ەتەدى. ياعني ستۋدەنتتىڭ بولاشاعى ونىڭ تۇرعان جەرىنە نەمەسە قارجىلىق مۇمكىندىگىنە ەمەس, تەك الەۋەتىنە بايلانىستى بولۋى ءتيىس. بۇل, اسىرەسە قازاقستاننىڭ ايماقتارىندا تۇراتىن جاستار ءۇشىن ماڭىزدى. سەبەبى اقش ۋنيۆەرسيتەتتەرىنىڭ تالاپتارىن بىلەتىن بىلىكتى اۋدارماشىلاردى تابۋ كوبىنە قيىن ءارى قىمبات.
وسى سەبەپتى پلاتفورما قازاق, ورىس جانە وزبەك تىلدەرىن قولداۋدى جوسپارلاپ وتىر. بۇل تالاپكەرلەرگە ۇزدىك امەريكالىق ۋنيۆەرسيتەتتەر الەمىن ءوز انا تىلىندە, تىكەلەي سمارتفون ارقىلى زەرتتەۋگە مۇمكىندىك بەرەدى. جوبا اۆتورلارىنىڭ ايتۋىنشا, ورتالىق ازيا – اشىلماعان تالانتتارعا باي ءوڭىر. «Silkroad Innovation Hub», «Astana Hub», «Uzbekistan IT Park» سياقتى باستامالار ايماقتاعى الەۋەتتىڭ ايقىن دالەلى.
«yoonee.ai» كومانداسى ءۇشىن تاعى ءبىر ماڭىزدى باعىت – مادەني جانە اكادەميالىق الماسۋ. ۇزاقمەرزىمدى جوسپارلاردىڭ ءبىرى – ء«موبيلدى اۋديتوريا» فورماتىنداعى ەكىجاقتى الماسۋ باعدارلاماسىن ىسكە قوسۋ. بۇل باعدارلاما تەك ورتالىق ازيا جاستارىن باتىسقا جىبەرۋمەن شەكتەلمەي, امەريكالىق ستۋدەنتتەردى دە قازاقستان مەن ءوڭىر ەلدەرىنە تارتۋدى كوزدەيدى. وسى ارقىلى جاڭا جىبەك جولىنىڭ اكادەميالىق جانە مادەني بايلىعىن الەمگە تانىتۋ, بەرىك كاسىبي بايلانىستار ورناتۋ جوسپارلانعان.
گۇلميرانىڭ پىكىرىنشە, «yoonee.ai» – تەك تەحنولوگيالىق ستارتاپ ەمەس, مادەني ديپلوماتيانىڭ دا جاڭا ۇلگىسى. ول ءبىلىم ارقىلى حالىقتاردى جاقىنداستىرىپ, ورتالىق ازيانى جاھاندىق زياتكەرلىك جانە يننوۆاتسيالىق كەڭىستىكتىڭ ماڭىزدى بولىگى رەتىندە كورسەتۋگە باعىتتالعان. ءبىر سوزبەن ايتقاندا, تامىرىن تاپقان تەحنولوگيا وسىلايشا بولاشاققا جول سالىپ وتىر.
