سۋرەت: primeminister.kz
دەنساۋلىق ساقتاۋ مينيسترلىگىنىڭ مالىمەتىنشە, بىلتىر قىزىلشاعا شالدىعۋ دەڭگەيى 2024 جىلمەن سالىستىرعاندا 85%-عا تومەندەگەن. سونىمەن قاتار جىل باسىنان بەرى ەل اۋماعىندا قىزىلشانىڭ 1,9 مىڭ جاعدايى تىركەلگەن. اۋرۋشاڭدىقتىڭ ەڭ جوعارى كورسەتكىشتەرى استانا مەن الماتى قالالارىندا, سونداي-اق جامبىل جانە اتىراۋ وبلىستارىندا بايقالادى. اتالعان جاعدايلاردىڭ باسىم بولىگى 5 جاسقا دەيىنگى بالالار اراسىندا تىركەلگەن. اۋرۋعا شالدىققانداردىڭ كوپشىلىگى – ۆاكتسينا الماعان بالالار. ونىڭ ىشىندە ەكپەدەن باس تارتۋ سەبەپتى ەگىلمەگەندەر دە بار.
كەڭەس بارىسىندا قىزىلشا اۋرۋى كوپ تىركەلگەن وڭىرلەردىڭ اكىم ورىنباسارلارى جاعداي تۋرالى ەسەپ بەردى.
پرەمەر-ءمينيستردىڭ ورىنباسارى وڭىرلىك شتابتار دەڭگەيىندە قىزىلشا بويىنشا ەپيدەميولوگيالىق احۋالدى كۇن سايىن تالداپ وتىرۋدىڭ ماڭىزدىلىعىن اتاپ ءوتىپ, جەرگىلىكتى جەرلەردەگى باسشىلاردىڭ جەكە جاۋاپكەرشىلىگىنە ەرەكشە نازار اۋداردى.
سونداي-اق پروفيلاكتيكالىق ەكپەمەن قامتۋ ماسەلەسى جەكە قارالدى. بىرقاتار وڭىردە جوسپارلى كورسەتكىشتەرگە قول جەتكىزىلمەگەنى ايتىلدى. اسىرەسە ماڭعىستاۋ وبلىسىندا نەگىزگى ۆاكتسينالاردىڭ بارلىق ءتۇرى تومەن دەڭگەيدە قالىپ وتىر. مۇنداي الشاقتىقتار ينفەكتسيالىق اۋرۋلاردىڭ تارالۋ قاۋپىن كۇشەيتەتىندىكتەن, باستاپقى مەديتسينالىق-سانيتارلىق كومەك دەڭگەيىندە نىسانالى ءارى جۇيەلى جۇمىستى كۇشەيتۋ قاجەتتىگى اتاپ ءوتىلدى.
كەڭەس قورىتىندىسىندا ايدا بالاەۆا قىزىلشاعا قاتىستى ەپيدەميولوگيالىق احۋالدى ەرەكشە باقىلاۋعا الۋدى, سونداي-اق حالىق اراسىندا يممۋنداۋدىڭ ماڭىزدىلىعى تۋرالى اقپاراتتىق-ءتۇسىندىرۋ جۇمىستارىن جانداندىرۋدى تاپسىردى. بۇل باعىتتاعى جۇمىستى, ەڭ الدىمەن, ماڭعىستاۋ وبلىسىندا كۇشەيتۋ قاجەت ەكەنى ايتىلدى.
