پرەزيدەنتكە دەگەن ەڭ جوعارى سەنىم دەڭگەيى جاستار اراسىندا تىركەلدى – 91,4%. بۇل ءۇردىس سەنىم سيپاتىنىڭ ساپالىق ەرەكشەلىگىن كورسەتەدى. جاس بۋىن مەملەكەت تارپىنان ۇسىنىلاتىن ءبىلىم گرانتتارى, ءتۇرلى باعدارلامالار, تسيفرلىق قىزمەتتەر جانە وزگە دە قولداۋ تەتىكتەرىن ءجيى پايدالانادى. سونىمەن قاتار بۇگىنگى جاستار ەلدىڭ قارقىندى دامۋ كەزەڭىندە قالىپتاسىپ كەلەدى, بۇل جاعداي پرەزيدەنتكە دەگەن سەنىم دەڭگەيىنە دە ىقپال ەتپەي قويمادى.
پرەزيدەنتكە دەگەن جوعارى سەنىم دەڭگەيى قالا تۇرعىندارى (86,9%) مەن اۋىل حالقى (86,7%) اراسىندا دا انىق بايقالادى. دەگەنمەن سەنىمنىڭ ءمان-مازمۇنى ءارتۇرلى. اۋىل تۇرعىندارى مەملەكەتپەن ينفراقۇرىلىمدىق جوبالار, الەۋمەتتىك باعدارلامالار مەن تولەمدەر ارقىلى تىكەلەي بايلانىس ورناتسا, قالا تۇرعىندارىنىڭ سەنىمى جۇيەلى وزگەرىستەردى قابىلداۋمەن جانە ولاردىڭ ناتيجەلەرىن باعالاۋمەن كوبىرەك بايلانىستى.
ەرلەر دە, ايەلدەر دە پرەزيدەنتكە جوعارى دەڭگەيدە سەنىم بىلدىرەدى. سوعان قاراماستان, ايەلدەر اراسىنداعى سەنىم دەڭگەيى ەرلەرمەن سالىستىرعاندا 3,8 پايىزعا جوعارى.
ءبىلىم دەڭگەيى تۇرعىسىنان جۇرگىزىلگەن تالداۋ پرەزيدەنتكە دەگەن سەنىم كورسەتكىشىندە ەلەۋلى ايىرماشىلىقتاردى انىقتاعان جوق. رەسپوندەنتتەردىڭ ءبىلىم دەڭگەيىنە قاراماستان, بۇل كورسەتكىش تۇراقتى تۇردە جوعارى دەڭگەيدە ساقتالىپ وتىر.
زەرتتەۋ ناتيجەلەرى كورسەتكەندەي, ازاماتتاردىڭ ساتىپ الۋ قابىلەتى ارتقان سايىن پرەزيدەنتكە دەگەن سەنىم دەڭگەيى دە وسەدى. بۇل ەكونوميكالىق جاعدايدى وڭ باعالاۋ مەن مەملەكەت باسشىسىنىڭ جۇرگىزىپ وتىرعان ساياساتىن قولداۋ اراسىنداعى ءوزارا بايلانىستى اڭعارتادى.
وسىلايشا, الىنعان دەرەكتەر پرەزيدەنتكە دەگەن سەنىمنىڭ تۇراقتى سيپاتقا يە ەكەنىن جانە ونىڭ ءبىلىم دەڭگەيىنە تاۋەلدى ەمەستىگىن, قالا مەن اۋىل تۇرعىندارى اراسىندا ايتارلىقتاي ايىرماشىلىق بايقالمايتىنىن, سونداي-اق بارلىق جاس توپتارىندا جوعارى ەكەنىن كورسەتەدى. بۇل ءوز كەزەگىندە ەلدى دامىتۋ ساياساتىنا جۇيەلى قوعامدىق قولداۋدىڭ بار ەكەنىن ايعاقتايدى.
الەۋمەتتانۋلىق ساۋالناما قسزي تاپسىرىسى بويىنشا 2026 جىلعى 10 ءساۋىر مەن 10 مامىر ارالىعىندا جۇرگىزىلدى. ىرىكتەمەلىك جيىنتىق كولەمى – 8 000 رەسپوندەنت. ساۋالناماعا 18 جاستان اسقان, ەلىمىزدىڭ 17 وبلىسى مەن رەسپۋبليكالىق ماڭىزى بار 3 قالاسىنىڭ – استانا, الماتى جانە شىمكەنتتىڭ تۇرعىندارى قاتىستى.
