فوتو: istockphoto.com
«جىبەك جولى» بازارىندا جۇرگىزىلگەن باقىلاۋ-قاداعالاۋ ءىس-شارالارى كەزىندە ماماندار مىندەتتى تاڭبالاۋى جوق جانە ۆەتەريناريالىق ىلەسپە قۇجاتتارمەن راسىمدەلمەگەن جۇمىرتقالاردىڭ ساتىلىمعا شىعارىلعانىن انىقتادى. تاركىلەنگەن ءونىمنىڭ جالپى كولەمى 11 850 دانانى قۇرادى.
زەرتحانالىق ساراپتاما ناتيجەلەرى ءونىمنىڭ قاۋىپسىزدىك تالاپتارىنا جانە قازاقستاننىڭ قولدانىستاعى زاڭناماسىنا سايكەس كەلمەيتىنىن كورسەتتى. وسىعان بايلانىستى جۇمىرتقالاردىڭ بارلىق پارتياسى ارنايى قۇرىلعان كوميسسيانىڭ قاتىسۋىمەن بەلگىلەنگەن تارتىپكە سايكەس جويىلدى.
زاڭ بۇزۋشىلىققا جول بەرگەن تۇلعالارعا قاتىستى اكىمشىلىك قۇقىق بۇزۋشىلىق تۋرالى ءىس قوزعالىپ, تەكسەرۋ ماتەريالدارى ءتيىستى پروتسەسسۋالدىق شەشىمدەر قابىلداۋ ءۇشىن ۋاكىلەتتى مەملەكەتتىك ورگاندارعا جولداندى.
قازاقستان جۇمىرتقا يمپورتىنا شەكتەۋ قويدى: نارىقتا وتاندىق ءونىم ۇلەسى ارتتى
قازاقستان قۇس وسىرۋشىلەر وداعى جۇمىرتقا ونىمدەرىنىڭ زاڭسىز اينالىمىن انىقتاۋ جانە ونىڭ جولىن كەسۋ باعىتىنداعى جۇمىستى مەملەكەتتىك ورگاندارمەن بىرلەسىپ جالعاستىرۋدا. انىقتالعان بارلىق قۇقىق بۇزۋشىلىق فاكتىلەرى اۋىل شارۋاشىلىعى مينيسترلىگىنە, ساۋدا جانە ينتەگراتسيا مينيسترلىگىنە, مەملەكەتتىك كىرىستەر كوميتەتىنە جانە سانيتاريالىق-ەپيدەميولوگيالىق باقىلاۋ كوميتەتىنە جولدانادى.
قولدانىستاعى شەكتەۋ شارالارىنا قاراماستان, ەلىمىزدىڭ بىرقاتار وڭىرلەرىندە رەسەيدەن اكەلىنگەن تاڭبالانباعان جۇمىرتقالاردى ساتۋ فاكتىلەرى ءالى دە تىركەلۋدە. وسىعان بايلانىستى مەملەكەتتىك ورگاندار تۇتىنۋشىلاردىڭ قۇقىقتارىن قورعاۋ جانە نارىقتىڭ اشىقتىعىن قامتاماسىز ەتۋ ماقساتىندا رەسپۋبليكا اۋماعىنداعى بازارلار مەن ساۋدا نىساندارىندا جۇيەلى تەكسەرۋلەر جۇرگىزۋدى جالعاستىرىپ كەلەدى.
ەسكە سالا كەتەيىك, 2026 جىلعى 17 ساۋىردەن باستاپ قازاقستان رەسپۋبليكاسى اۋىل شارۋاشىلىعى ءمينيسترىنىڭ №146 بۇيرىعى كۇشىنە ەنىپ, تاعامدىق تاۋىق جۇمىرتقالارىن قازاقستان اۋماعىنا اكەلۋگە ۋاقىتشا تىيىم سالىندى. بۇل شارا كولەڭكەلى يمپورتتىڭ جولىن كەسۋگە, دەمپينگتىك ساۋدانىڭ الدىن الۋعا جانە ماۋسىمدىق سۇرانىس ارتقان كەزەڭدە ىشكى نارىقتاعى باعا تۇراقتىلىعىن ساقتاۋعا باعىتتالعان.
جۇمىرتقا يمپورتىنا ۋاقىتشا شەكتەۋ ەنگىزۋ تاجىريبەسى قازاقستاندا بىرنەشە جىلدان بەرى قولدانىلىپ كەلەدى. مۇنداي شارالار وتاندىق قۇس فابريكالارى ىشكى نارىق سۇرانىسىن تولىق قامتاماسىز ەتكەن كەزەڭدەردە قابىلدانادى. بۇل قازاقستاندىق وندىرۋشىلەردى دەمپينگتىك يمپورتتان قورعاۋعا, وتاندىق ءونىم وندىرۋشىلەر ءۇشىن ءادىل باسەكەلەستىك ورتا قالىپتاستىرۋعا جانە تۇتىنۋشىلار ءۇشىن باعانىڭ تۇراقتىلىعىن قامتاماسىز ەتۋگە مۇمكىندىك بەرەدى.
