جوباعا قازاقستاننىڭ بارلىق وڭىرىنەن 400-گە جۋىق پەداگوگ قاتىستى. ولار بۇعان دەيىن 400 مىڭعا جۋىق مۇعالىمدى قامتىعان ء«بىلىم بەرۋدەگى جاساندى ينتەللەكت: يننوۆاتسيالىق تەحنولوگيالار مەن وقۋ ۇدەرىسىنىڭ تسيفرلىق ترانسفورماتسياسى» رەسپۋبليكالىق ونلاين كۋرسىن اياقتاپ, ىرىكتەۋدەن وتكەن ماماندار قاتارىنان جينالعان.
حاكاتون بارىسىندا قاتىسۋشىلار جاساندى ينتەللەكتىنى وقۋ پروتسەسىنە ەنگىزۋ, ءبىلىم بەرۋ كونتەنتىن ازىرلەۋ, باعالاۋ جۇيەسىن اۆتوماتتاندىرۋ, جەكەلەندىرىلگەن وقىتۋ مودەلىن قۇرۋ جانە مەكتەپ مەنەدجمەنتىن جەتىلدىرۋ باعىتتارىندا جوبالار ازىرلەدى. ۇيىمداستىرۋشىلاردىڭ ايتۋىنشا ۇسىنىلعان شەشىمدەر ناقتى مەكتەپ تاجىريبەسىنە بەيىمدەلگەن پراكتيكالىق مودەلدەر رەتىندە باعالانعان. بۇل رەتتە «Daryn Ustaz» ورتالىعىنىڭ جەتەكشىسى اسقار ماقسات پەداگوگتەردىڭ حالىقارالىق تاجىريبە الماسۋ مۇمكىندىگىنە توقتالدى. ونىڭ ايتۋىنشا ۇزدىك 20 پەداگوگ وڭتۇستىك كورەيادا تاعىلىمدامادان ءوتىپ, جاساندى ينتەللەكتىنى ءبىلىم بەرۋ جۇيەسىنە ەنگىزۋدىڭ وزىق ۇلگىلەرىمەن تانىسادى.
«حاكاتون قورىتىندىسى بويىنشا ۇزدىك 20 پەداگوگ «Daryn Ustaz» ورتالىعى قاراجاتى ەسەبىنەن وڭتۇستىك كورەياعا جىبەرىلەدى. بۇل ەل جاساندى ينتەللەكت تەحنولوگيالارىن ورتا ءبىلىم بەرۋ جۇيەسىنە ءتيىمدى ەنگىزگەن جەتەكشى مەملەكەتتەردىڭ ءبىرى. پەداگوگتەرىمىز I-Scream Media سياقتى ءىرى تەحنولوگيالىق كومپانيالاردىڭ تاجىريبەسىن زەردەلەپ, جاساندى ينتەللەكت شەشىمدەرىنىڭ مەكتەپ جۇيەسىنە ناقتى قالاي ەنگىزىلىپ جاتقانىن كورە الادى», دەدى ول.
قاتىسۋشىلاردىڭ ايتۋىنشا حاكاتوننىڭ ەڭ قۇندى تۇسى ءار وڭىردەن كەلگەن مۇعالىمدەردىڭ قىسقا ۋاقىتتا ءبىر كومانداعا بىرىگىپ ورتاق جوبا ازىرلەۋى.
«ەڭ الدىمەن ۇيىمداستىرۋشىلارعا العىسىمدى بىلدىرەمىن. ءبىز كەلگەن ساتتەن باستاپ جان-جاقتى قولداۋ كورسەتىلدى. ءبىزدىڭ توپتا ءار وڭىردەن كەلگەن بەس پەداگوگ بولدى. بۇرىن ءبىر-ءبىرىمىزدى تانىمايتىنبىز, سوعان قاراماستان از ۋاقىت ىشىندە تەز ءتىل تابىسىپ, بىرلەسىپ جۇمىس ىستەدىك», دەيدى قاتىسۋشىلاردىڭ ءبىرى.
ونىڭ ايتۋىنشا ولاردىڭ جوباسى جاساندى ينتەللەكت نەگىزىندەگى ءاداپتيۆتى ءبىلىم بەرۋ پلاتفورماسىن قۇرۋعا باعىتتالعان. بۇل جۇيە وقۋشىنىڭ ءبىلىم دەڭگەيىن انىقتاپ, سوعان سايكەس جەكە تاپسىرمالار ۇسىنۋعا مۇمكىندىك بەرەدى.
جەڭىمپازداردىڭ پىكىرىنشە, ماراپات جاريالانعان ساتتەگى قۋانىشتى ەموتسيانى سوزبەن جەتكىزۋ مۇمكىن ەمەس. ولار بۇل ءساتتى ۇلكەن تولقىنىسپەن قابىلداعانىن ايتادى. قۇرالاي ساعىندىقوۆا بايقاۋ بارىسىندا ءار وڭىردەن كەلگەن پەداگوگتەر از ۋاقىت ىشىندە ءبىر كومانداعا بىرىگىپ ورتاق جوبا ازىرلەگەنىن اتاپ ءوتتى. ال اسىل بولاتحان ۇلىنىڭ پىكىرىنشە, بايقاۋ كاسىبي دامۋ تۇرعىسىنان العاندا ماڭىزدى تاجىريبە بەرگەن. ول قاتىسۋشىلار دەڭگەيىنىڭ جوعارى بولعانىن اتاپ ءوتتى. جەڭىمپازداردىڭ پىكىرىنشە, بۇل حاكاتون تەك جارىس ەمەس, تاجىريبە الاڭى بولدى جانە مۇنداي جوبالار جالعاسىن تابۋعا ءتيىس.
ساراپشى تولەگەن كاكىم ۇلى مۇنداي فورماتتاعى بايقاۋلار پەداگوگتەردىڭ كاسىبي دامۋىنا سەرپىن بەرەتىنىن اتاپ ءوتتى.
«قىسقا ۋاقىت ىشىندە ءار وڭىردەن كەلگەن پەداگوگتەر ءبىر كومانداعا بىرىگىپ, ورتاق جوبا ازىرلەدى. ەڭ ماڭىزدىسى − يدەيانى تاجىريبەدە جۇزەگە اسىرۋ», دەدى ول.
«EduAI: پەداگوگيكالىق حاكاتون» ەلىمىزدەگى ءبىلىم بەرۋ جۇيەسىنە جاساندى ينتەللەكتىنى ەنگىزۋگە باعىتتالعان ماڭىزدى باستامالاردىڭ ءبىرى رەتىندە باعالاندى. ۇيىمداستىرۋشىلار مۇنداي جوبالار الداعى ۋاقىتتا دا جالعاسىپ, پەداگوگتەردىڭ تسيفرلىق قۇزىرەتتەرىن ارتتىرۋعا جانە جاڭا ءبىلىم بەرۋ تاسىلدەرىن دامىتۋعا ىقپال ەتەتىنىن اتاپ ءوتتى.
جاناسىل زايتيمحان,
ەۇۋ ستۋدەنتى
