بۇگىندە ەلىمىزدە 7 445 مادەنيەت ۇيىمى بار. بۇل سالادا 56 مىڭنان استام مامان جۇمىس ىستەيدى. مەملەكەت جاڭا مادەنيەت نىساندارىن سالۋعا, قولدانىستاعى مەكەمەلەردى جاڭعىرتۋعا جانە ولاردىڭ ماتەريالدىق-تەحنيكالىق الەۋەتىن نىعايتۋعا جۇيەلى تۇردە كوڭىل ءبولىپ كەلەدى.
كەيىنگى بەس جىلدا ەلىمىزدە 274 مادەنيەت نىسانى پايدالانۋعا بەرىلىپ, تاعى 1 293 نىسانعا جوندەۋ جۇمىستارى جۇرگىزىلدى. ال 2026 جىلى 64 نىساننىڭ قۇرىلىسى جالعاسىپ, تاعى 130 نىسان جاڭارتىلىپ جاتىر.
تەاتر ونەرىن دامىتۋ – سالاداعى نەگىزگى باسىمدىقتىڭ ءبىرى. كەيىنگى جىلدارى استانا, تۇركىستان جانە پەتروپاۆل قالالارىندا جاڭا تەاتر عيماراتتارى سالىندى. قازىر اقتوبە مەن قوناەۆ قالالارىندا دراما تەاترلارىنىڭ قۇرىلىسى جالعاسىپ جاتىر. سونىمەن قاتار شىمكەنت, قىزىلوردا جانە سەمەي قالالارىندا جاڭا تەاترلار سالۋ جوسپارلانعان. بۇعان قوسا مۇحتار اۋەزوۆ اتىنداعى قازاق ۇلتتىق دراما تەاترى مەن ناتاليا ساتس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترى عيماراتتارىن جاڭعىرتۋ جۇمىستارى جۇرگىزىلىپ جاتىر.
مۋزەي سالاسىندا دا بىرقاتار جوبا قولعا الىندى. 2025 جىلى استانادا جاڭا ونەر مۋزەيى اشىلدى. تۇركىستان جانە الماتى وبلىستارىندا «ساۋران», «گاۋھار انا» جانە «ەسىك» ۆيزيت-ورتالىقتارىنىڭ قۇرىلىسى جالعاسىپ جاتىر. سونىمەن قاتار كونە بوزوق قالاشىعىنىڭ نەگىزىندە اشىق اسپان استىنداعى ۇلتتىق پارك قۇرۋ جوباسى جۇزەگە اسىرىلىپ جاتىر.
ءابىلحان قاستەەۆ اتىنداعى ۇلتتىق ونەر مۋزەيى, الماتىداعى ورتالىق مەملەكەتتىك مۋزەي جانە اباي اتىنداعى قازاق ۇلتتىق وپەرا جانە بالەت تەاترى جاڭارتىلدى. مۇنداي جوبالار تاريحي-مادەني مۇرانى ساقتاۋعا قولايلى جاعداي جاساپ قانا قويماي, كورمە جانە ساحنا جۇمىستارىنىڭ ساپاسىن ارتتىرۋعا دا مۇمكىندىك بەرەدى.
سالاداعى باستى باعىتتاردىڭ ءبىرى – مادەنيەت ۇيلەرىن دامىتۋ. بۇل ماقساتتا «قازاقستان حالقىنا» قوعامدىق قورىمەن بىرلەسىپ, وڭىرلەردەگى مادەنيەت وشاقتارىنىڭ ماتەريالدىق-تەحنيكالىق بازاسىن نىعايتۋ جۇمىستارى جۇرگىزىلىپ جاتىر.
مادەني ينفراقۇرىلىمدى دامىتۋ بىلىكتى ماماندار دايارلاۋ ىسىمەن دە تىعىز بايلانىستى. وسى باعىتتا الماتى قالاسىندا شىعارماشىلىق باعىتتاعى وقۋ ورىندارى ستۋدەنتتەرىنە ارنالعان 500 ورىندىق جاتاقحانانىڭ قۇرىلىسى باستالدى. الەكساندر سەلەزنەۆ اتىنداعى الماتى حورەوگرافيالىق ۋچيليششەسىنىڭ عيماراتى جاڭعىرتىلىپ جاتىر. بۇدان بولەك الماتى مەن استاناداعى ءۇش مامانداندىرىلعان مۋزىكا مەكتەبىنە ارنالعان جاڭا عيماراتتار سالۋ ماسەلەسى پىسىقتالادى.
مەملەكەت باسشىسىنىڭ تاپسىرماسىنا سايكەس, شىمكەنت قالاسىندا جاڭا مادەنيەت جانە ونەر ۋنيۆەرسيتەتىن قۇرۋ جۇمىستارى قولعا الىندى. جاڭا وقۋ ورنىندا مادەنيەت سالاسىنداعى زاماناۋي جانە تەحنيكالىق ماماندىقتاردى دامىتۋعا باسىمدىق بەرىلمەك.
سونىمەن قاتار پەتروپاۆل قالاسىندا كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ فيليالىن اشۋ جوباسى جۇزەگە اسىرىلىپ كەلەدى. بۇل باستامالار ساپالى بىلىمگە جول اشىپ, مادەنيەت سالاسىنىڭ كادرلىق الەۋەتىن نىعايتۋعا مۇمكىندىك بەرەدى.
