ونجىلدىقتىڭ ەڭ اۋقىمدى جوباسىن وتكەن عاسىرداعى تاريحي باستامالاردىڭ ءبىرى – تۇركىستان-ءسىبىر تەمىرجولىمەن سالىستىرساق, LRT-نى تۇركسىبتىڭ زاڭدى جالعاسى دەسەك تە بولادى. حح عاسىردا تۇركسىب قازاقستان ەكونوميكاسى مەن كولىك سالاسىنىڭ دامۋىنا سەرپىن بەرگەن ستراتەگيالىق جوبا بولدى. ول ايماقتاردى بايلانىستىرىپ, جاڭا ءوندىرىس پەن ساۋدا باعىتتارىنىڭ قالىپتاسۋىنا جول اشتى. بۇگىنگى LRT دە ەلوردانىڭ جاڭا كولىك جۇيەسىن قالىپتاستىرىپ, قالالىق موبيلدىلىكتى جاڭا دەڭگەيگە كوتەرۋدى ماقسات ەتەدى.
بۇگىن استانالىق تۇرعىندار بىرەگەي جاڭا كولىك ءتۇرىنىڭ العاشقى جولاۋشىلارى اتاندى. جوبا اياسىندا جولاۋشىلاردىڭ جايلىلىعىنا ەرەكشە نازار اۋدارىلعان. ستانتسيالاردا ەسكالاتورلار, ليفتىلەر, اۆتوماتتاندىرىلعان بيلەت جۇيەلەرى مەن كۇتۋ زالدارى قاراستىرىلعان. سونىمەن قاتار, مۇمكىندىگى شەكتەۋلى ازاماتتارعا ارنالعان بارلىق قاجەتتى جاعداي جاسالعان.
مامانداردىڭ پىكىرىنشە, LRT جەلىسىندەگى رەيستەر ويداعىداي ءوتىپ جاتىر.
«جوبانىڭ ەلوردا دامۋى ءۇشىن ستراتەگيالىق ماڭىزى زور. العاشقى رەيستەر جوسپارداعىداي ءوتىپ جاتىر. LRT استانانىڭ جاڭا كەلبەتىنىڭ ءبىر بولىگىنە اينالادى. قالانىڭ حالىقارالىق ءيميدجى جاقسارىپ, ينۆەستيتسيالىق جانە تۋريستىك تارتىمدىلىعى ارتادى», دەيدى «ۋنيۆەرسيتەت» ستانساسىنىڭ باسشىسى رۇستەم قۇتتىباي ۇلى.
ستانسا باسشىسىنىڭ ايتۋىنشا, قاۋىپسىزدىك ماسەلەسى دە نازاردان تىس قالماعان. جۇيە حالىقارالىق ستاندارتتارعا سايكەس كەلەتىن SIL 4 دەڭگەيىندەگى قاۋىپسىزدىكپەن جابدىقتالعان. بەينەباقىلاۋ, تۇراقتى مونيتورينگ, كۇزەت جانە توتەنشە جاعدايلارعا ارەكەت ەتۋ جۇيەلەرى ەنگىزىلگەن. مۇندا پيلوتسىز باسقارۋ ەلەمەنتتەرى, تسيفرلىق ديسپەتچەرلەۋ, PSD قاۋىپسىزدىك ەسىكتەرى مەن اۆتوماتتاندىرىلعان جۇيەلەر جۇمىس ىستەيدى.
ايتا كەتەيىك, LRT جوباسىن ىسكە اسىرۋعا حالىقارالىق سەرىكتەستەر مەن تەحنيكالىق كەڭەسشىلەر قاتىسقان. قازىرگى تاڭدا جۇيەنىڭ جۇمىسىن قامتاماسىز ەتۋ ءۇشىن شامامەن مىڭعا جۋىق مامان تارتىلعان.
تاريحي وقيعانىڭ كۋاسى بولعان ەلوردا تۇرعىندارىنىڭ دا قۋانىشىندا شەك جوق.
«ستانتسيالار وتە ىڭعايلى جاسالعان. بارلىعى اۆتوماتتاندىرىلعان. بۇل استانانىڭ دامىپ كەلە جاتقانىن كورسەتەدى», دەيدى استانالىق تۇرعىن ارۋاي قۇلمىرزاەۆا.
ەل تاريحىنداعى ەلەۋلى وقيعانىڭ كۋاسى بولۋ ءۇشىن وزگە قالالاردان كەلگەندەر دە بار. سولاردىڭ ءبىرى الماتىلىق زەينەتكەر شولپان اندابەكوۆا ءوزىنىڭ العاشقى جولاۋشىلاردىڭ ءبىرى بولعاندىعىنا قۋانىشتى ەكەندىگىن جەتكىزدى.
«بۇگىن كوپتەن كۇتكەن LRT-نىڭ العاشقى جولاۋشىسى اتانىپ وتىرمىز. ليفت پەن ەسكالاتورلاردىڭ بولعانى جاقسى. قوعامدىق كولىكتە مۇنداي قولايلىلىق وتە ماڭىزدى», دەيدى ول.
وسىلايشا, ءبىر عاسىر بۇرىنعى تۇركسىب قازاقستاندى جاڭا دامۋ كەزەڭىنە جەتەلەسە, بۇگىنگى LRT استانانىڭ زاماناۋي ءارى تەحنولوگيالىق مەگاپوليس رەتىندە قالىپتاسۋىنا جول اشاتىن جاڭا كولىك ءداۋىرىنىڭ باستاۋى بولماق.
الداعى ۋاقىتتا LRT جەلىسىن كەڭەيتۋ جوسپارلانعان. كوسشى باعىتى بويىنشا ەكىنشى كەزەڭنىڭ قۇرىلىسى باستالىپ, جاڭا جەلىلەر سالۋ جۇمىستارى قولعا الىنعان. سونىمەن قاتار ەسكى ۆوكزال باعىتىن بايلانىستىراتىن جاڭا تارماق جوبالانىپ جاتىر.
