فوتو: دەنساۋلىق ساقتاۋ مينيسترلىگى
قازاقستانعا تۋريست رەتىندە كەلگەن يتاليا ازاماتى الماتى قالالىق ورتالىق كلينيكالىق اۋرۋحاناسىنىڭ دارىگەرلەرىنە شىنايى العىسىن ءبىلدىردى. دارىگەرلەر وعان شۇعىل ءارى كۇردەلى وتا جاساپ, ءومىرىن ساقتاپ قالدى.
پاتسيەنتتىڭ ايتۋىنشا, ول قازاقستانعا كەلىپ, ەلدىڭ مادەنيەتىمەن, حالقىمەن تانىسۋدى كوپتەن ارمانداعان. الايدا الماتىعا كەلگەننەن كەيىن ءۇش كۇن وتكەن سوڭ ونىڭ جاعدايى كۇرت ناشارلاپ, ءىشى قاتتى اۋىرىپ, جەدەل تۇردە اۋرۋحاناعا جەتكىزىلگەن.
دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ مالىمەتىنشە, تەكسەرۋ بارىسىندا دارىگەرلەر كونتراستپەن كومپيۋتەرلىك توموگرافيا جاساپ, اسا قاۋىپتى دياگنوز − قولقانىڭ ينفرارەنالدىق بولىگىندەگى انەۆريزمانىڭ جارىلۋىن انىقتادى. مۇنداي پاتولوگيا شۇعىل حيرۋرگيالىق كومەكسىز ادام ومىرىنە تىكەلەي قاۋىپ توندىرەدى. سەبەبى ول ىشكى قان كەتۋمەن قاتار جۇرەدى.
پاتسيەنتتى پروفەسسور سەرىك تۇرسىنباەۆ پەن حيرۋرگيا بولىمشەسىنىڭ مەڭگەرۋشىسى راحمان ساپارباەۆ قاراپ شىقتى. دارىگەرلەر شۇعىل وتا جاساۋ تۋرالى شەشىم قابىلدادى.
دارىگەرلەردى دايارلاۋدىڭ جاڭا مودەلى: وقۋ مەرزىمى مەن تالاپتار قالاي وزگەرەدى؟
وتا شامامەن ءتورت ساعاتقا سوزىلدى. وتا بارىسىندا دارىگەرلەر انەۆريزمانىڭ جارىلعانىن راستادى جانە پاتسيەنتكە جاساندى قانتامىرلىق پروتەز ورناتتى. مۇنداي وتالار تامىر حيرۋرگياسىنداعى ەڭ كۇردەلى وتالاردىڭ ءبىرى بولىپ سانالادى جانە جوعارى دالدىكتى, جەدەل شەشىم قابىلداۋدى ءارى مەديتسينالىق كوماندانىڭ ۇيلەسىمدى جۇمىسىن تالاپ ەتەدى.
«مەن ءومىرىمدى ساقتاپ قالعان دارىگەرلەرگە, سونداي-اق قازاقستان بويىنشا كۇن سايىن ادام ءومىرىن اراشالاپ جۇرگەن بارلىق مەديتسينا قىزمەتكەرلەرىنە زور العىسىمدى بىلدىرەمىن. كاسىبيلىكتەرىڭىز, كومەكتەرىڭىز بەن ادامگەرشىلىكتەرىڭىز ءۇشىن راقمەت», دەدى تۋريست.
قازىرگى ۋاقىتتا ناۋقاستىڭ جاعدايى تۇراقتى دەپ باعالانىپ وتىر. ول ءارى قاراي امبۋلاتوريالىق ەم قابىلدايدى.
