فوتو: e-history.kz
سىرعالاردىڭ ەكى ءتۇرى بار. ەركەك لاقتارعا رەتتىك ءنومىرى بار قاراپايىم سىرعا تاعىلسا, ۇرعاشىلارىنا ەلەكتروندىق, GPS ارقىلى باقىلاۋعا بولاتىن سىرعا تاعىلادى. سىرعانىڭ ەرەكشەلىگى كۇن ساۋلەسىمەن قۋاتتالىپ, ءۇش جىلعا دەيىن جۇمىس ىستەيدى.
عالىمدار سالماعى 32 گرامم بولاتىن سىرعانىڭ قۇرالايعا زيانى جوق دەيدى. زاماناۋي قۇرىلعى ارقىلى كيىكتەردىڭ جۇرگەن جولىن باقىلاپ, ورتاشا جاسىن انىقتايدى. كۇنىنە 4 رەت بەلگى بەرەتىن چيپ ارقىلى اقبوكەن ءۇيىرىن ونلاين رەجىمدە كورۋگە بولادى.
ء«ۇش كۇن بۇرىن سىرعا سالعان قۇرالاي بۇگىنگە دەيىن 7 شاقىرىم جەرگە ۇزاپ ۇلگەرگەنىن كوردىك. كيىك تولدەرى ساعات ساناپ ءوسىپ, كۇن وتكەن سايىن بەلسەندى بولا تۇسەدى. قازىر قۇستاي ۇشقان ەرەسەك كيىكتەرگە ىلەسە الادى», دەيدى باتىس وڭىرلىك «تابيعي ورتا» ەكولوگيالىق ۇەۇ بىرلەستىگىنىڭ ديرەكتورى ايبات مۇزباي.
زوولوگيا ينستيتۋتى ماماندارى مۇعالجار, بايعانين مەن شالقار اۋداندارىنىڭ شەكاراسى توعىسقان تۇسقا ارنايى كەلدى. سەبەبى بۇل اۋداندار ءۇستىرت كيىگىنىڭ كەڭ تاراعان جەرى. يەن دالادا ەركىن كوسىلەتىن اقبوكەندەر تولدەۋگە وسى ماڭعا جينالادى.
اتىراۋ وبلىسىنىڭ ءۇش تۇرعىنى اقتوبەدە كيىك ۇشاسىمەن ۇستالدى
«جالپى ءۇستىرت كيىگى اقتوبە وبلىسى جانە ماڭعىستاۋ وبلىسىنىڭ جەرلەرىندە مەكەندەيدى. كەيبىر ۋاقىتتاردا ءۇستىرت كيىگى كورشىلەس ەلدەرگە, ياعني وزبەكستان ەلىنە وتكەن ۋاقىتى بولعان. قازىرگى تاڭدا ونداي جاعداي بايقالمايدى. سەبەبى وسى جەرلەر قازىرگى تاڭدا كيىكتەرگە قولايلى بولىپ تۇر. جالپى قازىرگى تاڭدا وسى ءۇستىرت كيىگىنىڭ ماسساسى وسى جەردە دەۋگە بولادى. شامامەن ەسەپتەۋىمىز بويىنشا 60-70 پايىزى تولدەپ بولدى», دەدى «وحوتزووپروم» رمقك مەكەمەسىنىڭ اعا ينسپەكتورى شوقان اقىلبەكوۆ.
مامانداردىڭ سوڭعى ساناعى ۇستىرتتە 78 مىڭنان استام كيىك بار ەكەنىن انىقتادى. قۇرالايى قوسىلعان سوڭ, سايىن دالا ەركەسىنىڭ ءۇيىرى ءبىرشاما وسەدى. ودان بولەك ورال مەن باتپاقدالا اقبوكەندەرى دە جىلدىڭ مامىراجاي مەزگىلىندە اقتوبە وڭىرىنە بەت بۇرادى.
