تسيفرلىق ەمحانانىڭ ونلاين كەڭەسى

قالاي باستالدى؟

ءنۇرالي يسماعۇلوۆ «Metaclinic.kz» يدەياسى ءوز قاجەت­­تىلىگىنەن تۋىن­دا­عانىن ايتادى. ول سوزىلمالى اۋرۋدىڭ سالدارىنان اۋرۋحاناعا ءجيى باراتىن بولىپتى.

بىردە ول دارىگەردەن: «كەيىن تۇسىن­بە­گەنىمدى «WhatsApp» ارقى­لى ناقتىلاۋعا بولا ما؟» دەپ سۇ­رايدى. دارىگەر كەلىسەدى. بىراق «مۇندايعا اۋرۋحانا اكىمشىلىگى رۇقسات ەتپەيدى», دەپ جاۋاپ بەرەدى. ياعني كەڭەس بەرۋدىڭ ءوزى بار, بىراق ول كوبىنە بەيرەسمي, زاڭدى مارتەبەسى انىق ەمەس كەڭىستىككە كىرىپ كەتەدى.

وسى اڭگىمەدەن كەيىن ءنۇرالي «ەگەر ادامدارعا ونلاين كەڭەس كەرەك بولسا, ونى نەگە زاڭدى ءارى جۇيەلى قىز­­­­مەت­كە اينال­دىر­مايمىز؟» دەپ ويلانادى. سەبەبى ماسە­لە تەك دارىگەر كەڭە­سىنىڭ قولجەتىمدى بولۋىن­­دا عانا ەمەس. بۇل – پاتسيەنت قاۋىپ­سىز­دىگى, دارى­گەر­دىڭ زاڭ الدىندا قور­عال­ۋى جانە قىزمەت ساپاسىنىڭ ءبىر ستاندارتقا ءتۇسۋى دەگەن ءسوز.

جوبانى ول بيزنەس-سەرىكتە­سى­مەن بىرگە باستاعان. ەكەۋى دە كوممەرتسيالىق مەديتسينا سالاسىنان. ءنۇرالي تسيفرلىق ءونىم جاساۋعا, ماركەتينگكە جانە بيزنەس قۇرۋعا جاۋاپ بەرەدى. ال ارىپ­تە­سى مەديتسينالىق باسقارۋ مەن كلي­نيكالىق ۇدەرىستەردى جولعا قويا­دى. سەبەبى ولاردىڭ ءوز وفلاين كلينيكاسى دا بار. ياعني بۇل ستارتاپ سىرتتان قاراپ جاسالعان يدەيا ەمەس, مەديتسينانىڭ ىشكى جۇ­مىسىن تۇسىنەتىن ادامداردىڭ پراك­تيكالىق قاجەتتىلىگىنەن تۋعان جوبا. سودان كەيىن ستارتاپ «Astana Hub» قاتىسۋشىسى رە­تىن­­دە تىركەلىپ, جۇيەلى دامۋعا كىرىس­كەن. 

قازىر قاي كەزەڭدە؟

قازىر «Metaclinic.kz» – دارى­گەر­دىڭ ونلاين-قابىلداۋىن زاڭدى فور­ماتقا تۇسىرگەن تسيفرلىق ەمحانا رەتىندە جۇمىس ىستەپ تۇر. سەرۆيس ارقىلى پايدالانۋشى ماماندى تاڭداپ, ىڭعايلى ۋاقىتقا جازى­لادى, تولەم جاسايدى, كەيىن دارىگەر قوڭىراۋ شالىپ كەڭەس بەرەدى. قاجەت بولسا, رەسمي مە­­­دي­­تسينالىق قورىتىندى دا جىبە­رى­­لەدى.

جوبانىڭ نەگىزگى باعىتى ەكى ارناعا سۇيەنەدى. ءبىرىنشىسى – ءبىر رەتتىك كونسۋلتاتسيا, ەكىنشىسى – جازىلىم جۇيەسى. قولدانۋشىلار ءۇشىن ەڭ قولجەتىمدى قىزمەت رە­تىن­دە كەزەكشى تەراپەۆت نەمەسە پەدياتردىڭ 15 مينۋتتىق كەڭەسى 1000 تەڭگەگە ۇسىنىلادى. مۇنداي كونسۋلتاتسياعا جازىلعاننان كەيىن دارىگەرلەر ادەتتە 10 مينۋت­تىڭ ىشىندە بايلانىسقا شىعادى. ال باسقا مامانداردىڭ ونلاين-قابىل­داۋى دارىگەردىڭ باعىتى مەن تاجىريبەسىنە قاراي ورتا ەسەپپەن 5–10 مىڭ تەڭگە ارالىعىندا.

ء«بىزدىڭ دارى­گەر­لەردىڭ شاما­مەن تورتتەن ءبىرى – دەكرەتتەگى ايەلدەر. ولار كلي­نيكاعا كۇن­دە بارىپ جۇ­مىس ىستەي ال­مايدى. بىراق بىلىكتىلىگىن دە, تابىسىن دا جوعالتقىسى كەلمەيدى. سوندىقتان قاشىقتان كەڭەس بەرۋ فورماتى ولار ءۇشىن وتە ىڭعايلى. كەيبىر ماماندار اپتاسىنا نەبارى ءبىر-اق ساعات ۋاقىت بولەدى. مىسالى, ەكى رەت 30 مينۋتتىق قا­بىلداۋ قو­يىپ, ونلاين كەڭەس بەرىپ وتىرادى. جۇمىس با­رى­سىندا ءبىز­­دى ەرەكشە قۋانت­قان جاع­­­داي­لار دا بول­دى. سونىڭ ءبىرى – الىس اۋىل­­­دا تۇ­را­تىن ەگدە جاس­تاعى دا­­رى­گەر. پلات­فور­ماعا قوسىلعاننان كەيىن ول ءبىر ايدىڭ ىشىندە تابىسىن ەكى ەسە ارتتىردى. بۇل جاي عانا ستاتيس­تيكا ەمەس. ول كىسى ارنايى حابارلاسىپ, العىسىن ايتتى. مۇنداي مىسالدار ءبىزدى شابىتتاندىرادى. ويتكەنى سەرۆيس جاس مامانعا عانا ەمەس, جاسى ۇلكەن دارىگەرگە دە تۇسىنىكتى, قولدانۋعا جەڭىل ەكەنىن كورسەتەدى», دەيدى ءنۇرالي يسماعۇلوۆ.

«Metaclinic.kz» جۇمىسىندا ەڭ باستى تالاپ – زاڭدىلىق پەن ساپا باقىلاۋى. پلاتفورماعا كەز كەلگەن دارىگەر قوسىلا سالمايدى. الدىمەن قاتاڭ تەكسەرىس جۇرگىزىلەدى. ولاردىڭ ديپلومى قارالادى, سەرتيفيكاتىنىڭ جارامدىلىعى رەسمي دەرەككوزدەر ارقىلى انىقتالادى, قۇجاتتار راسىمدەلەدى. بۇدان كەيىن دارىگەر وقىتۋ كەزەڭىنەن وتەدى. تەك ستان­دارت­تارعا ساي بولعان مامان عانا پاتسيەنت قابىلداۋعا كىرىسەدى. كوماندا «ليتسەنزياسى جوق مەكەمەمەن» جانە «سەرتيفيكاتى ەسكىرگەن دارىگەرمەن» جۇمىس ىستەمەيتىنىن اشىق ايتادى.

بۇگىندە جۇيەدە شامامەن 370 دارىگەر تىركەلگەن. ونىڭ 100–150-ءى كۇن سايىن بەلسەندى قابىلداۋ جۇرگىزەدى. وسى ۋاقىتقا دەيىن پلات­فور­مانى 3 مىڭنان استام پاتسيەنت پايدالانعان. 

ەندىگى مەجە قانداي؟

«Metaclinic.kz» كومانداسى ەندىگى كەزەڭدە ءونىمدى كەڭەيتۋدى جانە سەرۆيستى ۇلكەن جۇيەلەرمەن بىرىكتىرۋدى باستى ماقسات ەتىپ وتىر. سونىڭ ءبىرى – دارىگەرگە جانە پاتسيەنتكە ارنالعان ەكى بولەك ءموبيلدى قوسىمشا جاساۋ. تاجىريبە كورسەتكەندەي, دارىگەرلەرگە ۆەب-نۇسقا ءاردايىم ىڭعايلى بولا بەرمەيدى. كوپ مامانعا قابىلداۋدى تەلەفوننان جۇرگىزۋ جەڭىل. سوندىقتان كوماندا ۋاقىتشا بەيىمدەلگەن نۇسقامەن شەكتەلمەي, تولىققاندى جەكە قوسىمشا ازىرلەۋدى جوسپارلاعان.

ء«بىزدىڭ بايقا­عانىمىز – ادامداردى ونلاين مە­دي­تسيناعا اكەلە­تىن باس­تى سەبەپ قاشىق­تىق ەمەس, ۋا­قىت تاپ­شى­­لىعى. العا­شىن­دا نە­گىزگى فاكتور اۋىل مەن قالا اراسى, جولدىڭ الىستىعى بو­لادى دەپ وي­­­­لا­دىق. بىراق دەرەكتەر كەرىسىنشە شىقتى. كليەنتتەرىمىزدىڭ باسىم بولىگى – قالا تۇرعىندارى. ەمحاناسى بار, دارىگەرى بار. بىراق كەپتەلىستىڭ, قار­بالاس جۇمىستىڭ سالدارىنان قالا تۇرعىندارىندا ۋاقىت تىعىز. ادام اۋىرعان كەزدە وعان ءدال سول ساتتە جىلدام كەڭەس كەرەك. ونلاين-قابىلداۋ وسى سۇرانىستىڭ قاجەت­تىلىگىن وتەيدى», دەيدى جوبا جەتەكشىسى.

ەكىنشى ۇلكەن باعىت – سەرىكتەستىك ارقىلى ءوسۋ. كوماندا سەرۆيستى تەك جەكە سايت رەتىندە ەمەس, ءىرى ەكوجۇيەلەردىڭ ىشىنە كىرەتىن ءونىم رەتىندە قاراستىرادى. بۇدان بولەك, فيتنەس يندۋسترياسىنداعى ءىرى كومپانيامەن كەلىسسوز باستالعان. مۇنداي ارىپتەستىك «Metaclinic»-ءتىڭ اۋديتورياسىن كەڭەيتىپ قانا قويماي, مەديتسينالىق كەڭەستى باسقا قىزمەتتەرمەن بىرىكتىرەتىن جاڭا ونىمدەرگە جول اشۋى مۇمكىن.

ءۇشىنشى ماقسات – جاڭا نارىقتى بايقاپ كورۋ. كوماندا جاقىن ۋاقىتتا وزبەكستان نارىعىندا قاناتقاقتى جوبا جاساۋدى جوس­پارلاپ وتىر. بۇل باستاما سىرت­تان ۇسىنىس رەتىندە كەلگەن. دەگەن­مەن نەگىزگى نازار ازىرگە ەل ىشىندە قالا بەرەدى. كوماندا الدىمەن ىشكى نارىقتا ءوسىپ, قىزمەتتىڭ ساپاسىن كۇشەيتىپ الۋدى ماڭىزدى سانايدى.

ءتورتىنشى, ەڭ كۇردەلى ماقسات – جاساندى ينتەللەكتىنى ساپانى باقىلاۋعا پايدالانۋ. كوماندا جي-دى «دارىگەردىڭ ورنىنا» ەمەس, دارىگەر شەشىمدەرىن كلينيكالىق حاتتامالارمەن سالىستىراتىن كومەكشى رەتىندە قاراستىرادى.

«قاي باعىتتا وسسەك تە, ءبىز ءۇشىن ەڭ ماڭىزدىسى – «Metaclinic» ارقىلى پاتسيەنت الاتىن مەدي­تسينالىق كومەكتىڭ ساپاسى. سون­دىقتان قازىر دارىگەر­­دىڭ قابىل­داۋىن جاساندى ينتەللەكت كو­مە­گىمەن قوسىمشا باقىلاپ كورۋ­گە كىرىستىك. جۇيە دارىگەر قابىلداعان شەشىمدەردى ۇلتتىق كلينيكالىق حاتتامالارمەن جانە حالىقارالىق ۇسىنىمدارمەن سالىستىرادى. ياعني جي «دارىگەردىڭ ورنىنا» شەشىم شىعارمايدى. ول تەك قابىلداۋدىڭ تالاپقا ساي ەكەنىنە نازار اۋدارىپ, ساپانى تۇراقتى دەڭگەيدە ۇستاۋعا كومەكتەسەتىن كومەكشى قۇرال بولادى», دەيدى ءنۇرالي يسماعۇلوۆ.