بۇل مەرەكە حالىقارالىق ەلەكتر بايلانىسى وداعى (حەو) بەكىتكەن دۇنيەجۇزىلىك ەلەكتر بايلانىسى جانە اقپاراتتىق قوعام كۇنىنە ورايلاستىرىلعان.
«بۇگىندە ءدال وسى تەحنيكالىق ماماندار جەلىلىك ينفراقۇرىلىمنىڭ ۇزدىكسىز جۇمىسىن, تەلەكوممۋنيكاتسيالىق تەحنولوگيالاردىڭ دامۋىن جانە ەلدى مەكەندەردى زاماناۋي بايلانىس قىزمەتتەرىمەن قامتاماسىز ەتۋدى جۇزەگە اسىرىپ وتىر. ولاردىڭ كاسىبيلىگى بايلانىس ساپاسىنا, ينتەرنەتتىڭ قولجەتىمدىلىگىنە جانە ەلدىڭ تسيفرلىق ينفراقۇرىلىمىنىڭ تۇراقتىلىعىنا تىكەلەي اسەر ەتەدى», دەدى جاساندى ينتەللەكت جانە تسيفرلىق دامۋ ۆيتسە-ءمينيسترى دوسجان مۇساليەۆ.
قازىرگى تاڭدا قازاقستاننىڭ تەلەكوممۋنيكاتسيا سالاسىندا شامامەن 35 مىڭ ادام ەڭبەك ەتەدى. سوڭعى جىلدارى ەلىمىزدە بايلانىس ينفراقۇرىلىمىن دامىتۋ, ءموبيلدى ينتەرنەت قامتۋ اياسىن كەڭەيتۋ جانە اۋىلدىق ەلدى مەكەندەردى جوعارى جىلدامدىقتى ينتەرنەتپەن قامتاماسىز ەتۋ باعىتىندا اۋقىمدى جۇمىستار اتقارىلدى.
قازاقستان بايلانىس ساپاسى كورسەتكىشتەرى بويىنشا دا تۇراقتى ءوسىم كورسەتىپ كەلەدى. ءموبيلدى ينتەرنەتتىڭ ورتاشا جىلدامدىعى 94,54 مبيت/س-قا جەتتى. ينفراقۇرىلىمدى جاڭعىرتۋ اياسىندا اۋىلدىق وڭىرلەر كەزەڭ-كەزەڭىمەن ەسكىرگەن 3G جەلىسىنەن زاماناۋي 4G ستاندارتىنا كوشىرىلىپ جاتىر. ال 5G تەحنولوگياسى بۇگىندە مەگاپوليستەردى, وبلىس ورتالىقتارىن, سونداي-اق الاتاۋ مەن قورعاس قالالارىن قوسا العاندا, 20-دان استام قالادا ەنگىزىلدى.
كاسىبي مەرەكە قارساڭىندا استانادا تەلەكوممۋنيكاتسيا سالاسىنىڭ تەحنيكالىق ماماندارى اراسىندا جىل سايىنعى سالالىق بايقاۋ ءوتتى. بيىل جارىسقا قازاقستاننىڭ 9 تەلەكوممۋنيكاتسيالىق كومپانياسىنىڭ ماماندارى قاتىستى. قاتىسۋشىلار تۇراقتى ءارى ساپالى بايلانىستى قامتاماسىز ەتۋدەگى نەگىزگى باعىتتاردىڭ ءبىرى سانالاتىن تالشىقتى-وپتيكالىق بايلانىس جەلىلەرىن (توبج) دانەكەرلەۋ بويىنشا تاجىريبەلىك داعدىلارىن كورسەتتى.
بايقاۋ قورىتىندىسى بويىنشا ءبىرىنشى ورىندى «قازاقتەلەكوم» اق قىزمەتكەرلەرى, ەكىنشى ورىندى «ترانستەلەكوم» اق, ءۇشىنشى ورىندى «كار-تەل» جشس يەلەندى.
مەرەكەلىك ءىس-شارالار تەلەكوممۋنيكاتسيا سالاسىنىڭ دامۋىنا ۇلەس قوسقان قىزمەتكەرلەردى سالتاناتتى ماراپاتتاۋ راسىمىمەن اياقتالدى. ۇزدىك ماماندارعا مەملەكەتتىك جانە سالالىق ناگرادالار, سونىڭ ىشىندە «قۇرمەت», «ەڭبەك ارداگەرى» جانە «بايلانىس سالاسىنىڭ ۇزدىگى» اتاقتارى تابىستالدى.
بايلانىس قىزمەتكەرلەرى كۇنىن اتاپ ءوتۋ سالا ماماندارىنىڭ تسيفرلىق ەكونوميكانى دامىتۋعا, زاماناۋي تەحنولوگيالاردى ەنگىزۋگە جانە قازاقستان ازاماتتارىنىڭ ءومىر ساپاسىن ارتتىرۋعا قوسقان ۇلەسىن ايشىقتاي تۇسەدى.
