فوتو: بايان سۇلەيمەنقىزى/ Egemen.kz
قالا كوشەلەرىنىڭ تازالىعى مەن كوممۋنالدىق تەحنيكالاردىڭ ۇزدىكسىز جۇمىسىن قامتاماسىز ەتەتىن «استانا تازالىق» مەكەمەسىنىڭ وندىرىستىك بازاسىندا قىزۋ جۇمىس ءجۇرىپ جاتىر. ءبىر بوكستا قار تازالايتىن تەحنيكا جوندەلسە, ەندى بىرىندە كوشەلەرگە سۋ شاشاتىن ماشينالاردىڭ اگرەگاتتارى قالپىنا كەلتىرىلۋدە. وسى جۇمىستاردىڭ اراسىندا كوللەدج ستۋدەنتتەرى دە تاجىريبەلى ماماندارمەن بىرگە ەڭبەك ەتىپ ءجۇر.
كاسىپورىن شەبەرى نۇرجان نۇرسەيتوۆتىڭ ايتۋىنشا, ستۋدەنتتەر مۇندا جاي باقىلاۋشى ەمەس, ناقتى وندىرىستىك پروتسەسكە قاتىسۋشىلار رەتىندە تاجىريبە جيناقتايدى.
ء«بىز كوللەدجبەن مەموراندۋم جاسادىق. ادەتتە وندىرىستىك پراكتيكا كوپ جەردە اقىسىز وتەدى. ال بىزدە ستۋدەنتتەرگە اي سايىن شامامەن 150 مىڭ تەڭگە كولەمىندە جالاقى تولەنەدى. ولار كۇنىنە ءتورت ساعات جۇمىس ىستەيدى جانە سول ەڭبەگى ءۇشىن اقى الادى. بۇل بالالاردىڭ ماماندىققا دەگەن قىزىعۋشىلىعىن ارتتىرىپ, جاۋاپكەرشىلىگىن كۇشەيتەدى», دەيدى شەبەر.
شەبەردىڭ سوزىنشە, ستۋدەنتتەر تەحنيكالىق قىزمەت كورسەتۋ مەن جوندەۋ جۇمىستارىنىڭ بارلىق نەگىزگى كەزەڭدەرىمەن تانىسادى. ولار اعا مامانداردىڭ باقىلاۋىمەن ششەتكالاردى اۋىستىرۋ, ستارتەر جوندەۋ, رادياتورلاردى قالپىنا كەلتىرۋ, ماي اۋىستىرۋ جانە ءتۇرلى تەحنيكالىق اقاۋلاردى انىقتاۋ جۇمىستارىن اتقارادى.
ء«بىز ستۋدەنتتەردى بىردەن كۇردەلى جوندەۋ جۇمىستارىنا جىبەرمەيمىز. قاۋىپسىزدىك تالاپتارى ءبىرىنشى ورىندا. العاشىندا باقىلاپ, ۇيرەنەدى. كەيىن تاجىريبە جيناقتاعان سوڭ قاراپايىم جۇمىستاردى وزدەرى ورىنداي باستايدى. قازىر ولاردىڭ كوبى تەحنيكانىڭ قۇرىلىمىن جاقسى مەڭگەرىپ كەلەدى», دەيدى نۇرجان نۇرسەيتوۆ.
استانادا 100-گە جۋىق كوممۋنالدىق قىزمەتكەر ءانۇراندى شىرقادى
مەكەمەدە پراكتيكادان ءوتىپ جاتقان استانا قالاسىنداعى كاسىپتىك-تەحنيكالىق كوللەدجدىڭ ءۇشىنشى كۋرس ستۋدەنتى الىبەك ەركەنوۆ بۇل تاجىريبەنىڭ ءوز ماماندىعى بويىنشا ۇلكەن مۇمكىندىك ەكەنىن ايتادى.
ء«تۇرلى تەحنيكالارمەن جۇمىس ىستەۋدى ۇيرەندىك. ششەتكالاردى, پىشاقتاردى اۋىستىرۋدى جانە باسقا دا تەحنيكالىق جۇمىستاردى مەڭگەرىپ جاتىرمىز. ەڭ باستىسى – بۇل پراكتيكا اقىلى. كوپ جەردە ستۋدەنتتەر تەگىن تاجىريبەدەن وتەدى, ال ءبىز جۇمىس ىستەپ قانا قويماي, ەڭبەكاقى الىپ ءجۇرمىز», دەيدى ول.
الىبەكتىڭ ايتۋىنشا, مۇنداعى تاجىريبە بۇرىنعى وندىرىستىك پراكتيكالاردان الدەقايدا اۋقىمدى.
«مۇندا تەحنيكالار كوپ, جۇمىس كولەمى دە ۇلكەن. شەبەرلەر ءار نارسەنى ەگجەي-تەگجەيلى ءتۇسىندىرىپ, ءىس جۇزىندە كورسەتەدى. قازىر كوشەلەرگە سۋ شاشاتىن تەحنيكانىڭ تاراتۋ جۇيەسىن جوندەۋگە قاتىسىپ جاتىرمىز. وسىنداي جۇمىستار ارقىلى ناقتى تاجىريبە جيناقتايمىز», دەيدى ستۋدەنت.
بۇگىندە كاسىپورىندا التى ستۋدەنت وندىرىستىك تاجىريبەدەن ءوتىپ جاتىر. ولار ءۇش ايلىق وندىرىستىك جانە ديپلومالدى پراكتيكا باعدارلاماسى اياسىندا جۇمىس ىستەيدى. پراكتيكا اياقتالعاننان كەيىن ستۋدەنتتەر ديپلوم الىپ, ەڭبەك نارىعىنا دايىن مامان رەتىندە شىعۋدى جوسپارلاپ وتىر.
مۇنداي تاجىريبەلىك باعدارلامالاردى ۇيىمداستىرۋعا كاسىپورىننىڭ تەحنيكالىق الەۋەتى مۇمكىندىك بەرەدى.
توقاەۆ: «تازا قازاقستان» تۇجىرىمداماسىن ىسكە اسىرۋ – كونستيتۋتسيالىق مىندەت
مەكەمەنىڭ تەحنيكانى پايدالانۋ دەپارتامەنتىنىڭ ديرەكتورى تيمۋر احمەتوۆتىڭ ايتۋىنشا كاسىپورىن تەك قالانىڭ سانيتارلىق تازالىعىن قامتاماسىز ەتىپ قانا قويماي, بولاشاق مامانداردى دايارلاۋعا دا ەرەكشە كوڭىل ءبولىپ وتىر.
«قازىرگى تاڭدا كاسىپورىن بالانسىندا 438 ارنايى تەحنيكا بار. ونىڭ ىشىندە تراكتورلار, اۆتوگرەيدەرلەر, ساموسۆالدار, جول سىپىراتىن جانە شاڭسورعىش تەحنيكالار جۇمىس ىستەيدى. ءبىز تەحنيكالىق پاركتى 2021 جىلدان بەرى كەزەڭ-كەزەڭىمەن جاڭارتىپ كەلەمىز. وسىنداي اۋقىمدى وندىرىستىك بازا ستۋدەنتتەردىڭ تاجىريبە جيناقتاۋىنا جاقسى مۇمكىندىك بەرەدى.ء بىز ءۇشىن كادر دايارلاۋ ماڭىزدى باعىتتاردىڭ ءبىرى. وندىرىستىك پراكتيكا كەزىندە ستۋدەنتتەر شىنايى جۇمىس پروتسەسىن كورەدى, تەحنيكالارمەن جۇمىس ىستەۋدى ۇيرەنەدى. ەرتەڭ ولار ەڭبەك نارىعىنا شىققاندا دايىن مامان رەتىندە قالىپتاسادى», دەيدى تيمۋر احمەتوۆ.
دەپۋتات «تازا قازاقستان» جالپىۇلتتىق قوزعالىسىن قۇرۋدى ۇسىندى
بۇگىندە جۇمىسشى ماماندىقتارىنا سۇرانىس ارتىپ كەلەدى. وسى تۇرعىدان العاندا, «استانا تازالىق» كاسىپورنىنىڭ تاجىريبەسى ستۋدەنتتەرگە تەوريالىق ءبىلىمدى وندىرىستىك تاجىريبەمەن ۇشتاستىرىپ قانا قويماي, ەڭبەك جولىن ەرتە باستاۋعا مۇمكىندىك بەرەتىن ءتيىمدى جوبا رەتىندە باعالانىپ وتىر. ال تاجىريبە كەزىندە تولەنەتىن 150 مىڭ تەڭگە كولەمىندەگى جالاقى جاستار ءۇشىن قوسىمشا ىنتالاندىرۋ بولماق.
