مەملەكەتتەر باسشىلارى ۇلى عۇلاما, اۋليە قوجا احمەت ياساۋي مەن كەسەنە اۋماعىندا جەرلەنگەن باسقا دا بەلگىلى تاريحي تۇلعالاردىڭ رۋحىنا زيارات ەتتى.
پرەزيدەنتتەرگە كەسەنەنىڭ XIV عاسىر سوڭىندا ءامىر تەمىردىڭ بۇيرىعىمەن سالىنعانى, كولەمى جاعىنان ءارتۇرلى 35 بولمەدەن تۇراتىنى جونىندە اقپارات بەرىلدى.
عيماراتتىڭ ىشكى بيىكتىگى 39 مەتردى, ال سىرتقى بيىكتىك ولشەمى 41 مەتردى قۇرايدى.
مارتەبەلى مەيماندار قابىرحانانى, ورتالىق بولمەدە ورنالاسقان قازاندىقتى, تايقازاندى جانە قولا لاۋحانى ارالاپ كوردى.
سونداي-اق ەكسپوزيتسيادا تۇركى-يسلام الەمىنىڭ بەلگىلى ويشىلدارى مەن شايىرلارىنىڭ ەڭبەكتەرىنەن تۇراتىن 45 كىتاپ قويىلعان. ولاردىڭ اراسىندا قوجا احمەت ءياساۋيدىڭ «ديۋاني حيكمەت», ءنيزاميدىڭ «حامسا», ءناۋايدىڭ عازالدارى, باقىرعانيدىڭ شىعارمالارى, ءفيردوۋسيدىڭ «شاحناما», ءفيزۋليدىڭ ء«لايلى مەن ءماجنۇن» داستانى, سونىمەن بىرگە «ماناس» جىرىنىڭ ۇزىندىلەرى جانە باسقا دا سيرەك كەزدەسەتىن تۋىندىلار بار.
ەسكە سالا كەتەيىك, تۇركىستاندا تۇركى مەملەكەتتەرى ۇيىمىنىڭ بەيرەسمي ءسامميتى ءوتتى. سامميت الدىندا قاسىم-جومارت توقاەۆ پەن شاۆكات ميرزيوەۆ قازاقستان مەن وزبەكستان اراسىنداعى باۋىرلاستىق بايلانىس جانە رۋحاني ىنتىماقتاستىق نىشانى رەتىندە تۇركىستاندا بوي كوتەرگەن مەشىتپەن تانىستى.
