پرەزيدەنت ۇيىمنىڭ باستى ماقساتى – تۇركى الەمىنىڭ بىرلىگىن نىعايتۋ جانە ساۋدا-ەكونوميكالىق, تسيفرلىق, تەحنولوگيالىق ءارى مادەني-گۋمانيتارلىق ىنتىماقتاستىقتى دامىتۋ ەكەندىگىنە باسا ءمان بەردى.
«ەڭ باستىسى, جاڭا فورماتتاعى جۇمىس ۇيىمنىڭ ماقسات-مىندەتتەرىنە ساي بولىپ, وعان كەرى اسەرىن تيگىزبەۋى كەرەك. مىسالى, سوڭعى كەزدە ۇيىمىمىزدى اسكەري اليانس رەتىندە سيپاتتايتىن وي-پىكىرلەر ايتىلىپ ءجۇر. ولاردىڭ تەرىس پەيىلى بىزگە انىق, ماقساتتارى – ەلدەستىرۋ ەمەس ەكەنى دە بەلگىلى. قازاقستان ونداي ۇستانىمدى جوققا شىعارۋ كەرەك دەپ سانايدى», دەدى قاسىم-جومارت توقاەۆ.
پرەزيدەنت قازاقستان ءۇشىن تۇركى الەمىنىڭ بىرلىگىن نىعايتۋ اسا ماڭىزدى, كەزەك كۇتتىرمەيتىن باسىمدىق ەكەندىگىنە توقتالدى.
«تۇركى مەملەكەتتەرى ۇيىمى – گەوساياسي جوبا ەمەس, اسكەري ۇيىم دا ەمەس. بۇل – باۋىرلاس ەلدەردىڭ ساۋدا-ەكونوميكالىق, جوعارى تەحنولوگيالىق, تسيفرلىق جانە مادەني-گۋمانيتارلىق ىنتىماقتاستىعىن نىعايتاتىن بىرەگەي الاڭ. مۇنداي ۇستانىم ەلىمىز ءۇشىن – ماڭىزدى باسىمدىق, سەبەبى, بۇل ۇلتتىق مۇددە تۇرعىسىنان دا ءتيىمدى ەكەنى انىق. «التاۋ الا بولسا, اۋىزداعى كەتەدى, تورتەۋ تۇگەل بولسا, توبەدەگى كەلەدى» دەگەن اتالى ءسوز – بارىمىزگە ورتاق. تۇركى الەمى ءاردايىم تاتۋ بولىپ, العا قويعان ماقساتىنان اۋىتقىماي, بىرلەسە دامي بەرۋى كەرەك», دەدى مەملەكەت باسشىسى.
پرەزيدەنت: الماعايىپ كەزەڭدە تۇركى مەملەكەتتەرىنىڭ اۋىزبىرشىلىكتە بولۋى – وتە ماڭىزدى
بۇدان بولەك, سامميت وتىرىسىندا قاسىم-جومارت توقاەۆ تۇركى تىلدەرىنە ورتاق تەرمينولوگيالىق نەگىز قالىپتاستىرۋ قاجەتتىگىن ايتتى.
