ءىس-شاراعا پارلامەنت سەناتىنىڭ توراعاسى, الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمباەۆ, اتالعان كىتاپتىڭ اۆتورى, پارلامەنت دەپۋتاتتارى, ديپلوماتتار, ءدىن وكىلدەرى جانە قوعام قايراتكەرلەرى قاتىستى. م.اشىمباەۆ سالتاناتتى راسىمگە قاتىسۋشىلارعا ءىلتيپات بىلدىرە كەلىپ, مەملەكەت باسشىسى قاسىم-جومارت توقاەۆتىڭ جارلىعىمەن مۇحاممەد ابدەلسالام جاھاندىق دەڭگەيدە كونفەسسياارالىق جانە مادەنيەتارالىق ديالوگتى نىعايتۋعا, الەمدىك جانە ءداستۇرلى دىندەر كوشباسشىلارى سەزىنىڭ يدەيالارى مەن ماقساتتارىن ىلگەرىلەتۋگە, سونداي-اق قازاقستان مەن ءال-ازھار ۋنيۆەرسيتەتى اراسىنداعى ىنتىماقتاستىقتى ارتتىرۋعا قوسقان ۇلەسى مەن وسى جولداعى تاباندى ءارى جۇيەلى ەڭبەگى ءۇشىن ءى دارەجەلى «دوستىق» وردەنىمەن ماراپاتتالعانىن اتاپ ءوتتى.
ايتا كەتسەك, پرەزيدەنت مۇسىلمان اقساقالدار كەڭەسىنىڭ باس حاتشىسى مۇحاممەد ابدەلسالامدى قابىلداعان ەدى. سەنات توراعاسى مەملەكەت باسشىسى قازىر ادامزات بۇرىن-سوڭدى بولماعان سىن-قاتەرلەرمەن بەتپە-بەت كەلىپ وتىرعانىن, گەوساياسي احۋال, مادەني جانە ءدىني الاۋىزدىق, كليماتتىق داعدارىس پەن الەۋمەتتىك تەڭسىزدىك ۋشىعا تۇسكەنىن بىرنەشە رەت اتاپ وتكەنىن دە ايتتى. وسىعان بايلانىستى بۇگىندە باۋىرلاستىققا باستايتىن ديالوگ پەن رۋحاني ديپلوماتيانىڭ ماڭىزى ارتا ءتۇستى.
– ەلىمىزدە ادامزاتتىڭ ىنتىماعىن كوزدەيتىن باستامالارعا ۇنەمى باسا ءمان بەرىلىپ كەلەدى. پرەزيدەنت قاسىم-جومارت توقاەۆ مادەنيەتارالىق جانە وركەنيەتارالىق ديالوگتى دامىتۋعا ۇلكەن كوڭىل ءبولىپ وتىر. مەملەكەت باسشىسى اتاپ وتكەندەي, سىندارلى جانە ءوزارا قۇرمەتكە نەگىزدەلگەن ديالوگ – ورنىقتى دامۋدىڭ كەپىلى. سوندىقتان ەلىمىز الەمدەگى بەيبىتشىلىكتى جانە سەنىم مەن ىنتىماقتاستىقتى نىعايتۋعا ارنالعان باستامالاردى دايەكتى تۇردە قولدايدى. بۇل رەتتە بەيبىتشىلىك پەن ديالوگ مادەنيەتىن ىلگەرىلەتۋگە جانە ءوزارا تۇسىنىستىك پەن قوعامدىق كەلىسىمدى نىعايتۋعا ۇندەيتىن جوبالاردىڭ ماڭىزى زور, – دەدى م.اشىمباەۆ.
سونىمەن قاتار سەنات توراعاسى 2019 جىلى قابىلدانعان «ادامزاتتىڭ باۋىرلاستىعى تۋرالى قۇجات» بارشا ادام بالاسىن ورتاق قۇندىلىقتارعا تابان تىرەپ, بەيبىت قاتار ءومىر سۇرۋگە شاقىرعان بىرەگەي ۇندەۋ بولعانىن اتاپ ءوتتى. كوپشىلىككە تانىستىرىلعان كىتاپتا سول تاريحي قۇجاتتىڭ ءمان-ماڭىزىن تەرەڭ تۇسىندىرەتىن تىڭ ويلار, ساراپتامالىق تۇجىرىمدار جانە فيلوسوفيالىق پايىمداۋلار جۇيەلەنىپ بەرىلگەن.
ەڭبەك قازاقتىلدى وقىرماندارعا العاش رەت ۇسىنىلىپ وتىر. م.اشىمباەۆ بۇل قادام ەلىمىزدىڭ جاھاندىق دەڭگەيدە بەيبىتشىلىك پەن كەلىسىمدى نىعايتۋ جولىندا ماڭىزدى رولگە يە ەكەنىن كورسەتەتىنىن ايتىپ ءوتتى. بۇعان ەلىمىزدىڭ باستاماسىمەن تۇراقتى وتكىزىلىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزى جانە قازاق جەرىندە كوپتەگەن ەتنوس وكىلدەرىنىڭ تاتۋ-ءتاتتى ءومىر ءسۇرىپ وتىرعانى ايقىن دالەل بولادى. سوندىقتان جاڭا كىتاپ قازاقستاننىڭ دىنارالىق ديالوگتى نىعايتۋ باعىتىنداعى تاجىريبەسىن ودان ءارى دارىپتەۋگە ۇلەس قوسپاق.
ءىس-شارا بارىسىندا كىتاپ اۆتورى مۇحاممەد ابدەلسالام ادامزاتتىڭ باۋىرلاستىعىن كوزدەيتىن باستاماعا قولداۋ بىلدىرگەنى ءۇشىن العىس ءبىلدىردى. سونداي-اق كەزدەسۋدە قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى, مەملەكەت جانە قوعام قايراتكەرى ءادىل احمەتوۆ, قاسيەتتى تاقتىڭ قازاقستان رەسپۋبليكاسىنداعى اپوستولدىق ءنۋنتسيى دجوردج پانامتۋنديل جانە كونفەسسياارالىق جانە دىنارالىق ديالوگتىڭ حالىقارالىق ورتالىعىنىڭ باسقارما توراعاسى گۇلسانا قوجاباي ءسوز سويلەدى.
