اماناتقا ادالدىق

رۋحانيات • 24 قاراشا، 2020

اماناتقا ادالدىق

25 رەت كورسەتىلدى

«Atamnyn Amanaty» قوعامدىق بىرلەستىگى – ەكىنشى دۇنيەجۇزىلىك سوعىس كەزىندە ءىز-ءتۇزسىز كەتكەن قازاقستاندىق ساربازداردىڭ جەرلەنگەن ورىندارىن انىقتاپ، مۇراعاتتىق-ىزدەستىرۋ جۇمىستارىمەن جۇيەلى اينالىساتىن ءارى ولاردىڭ تاريحي قاھارماندىق جولىن ۇرپاق جادىندا ماڭگى قالدىرۋ ماقساتىندا ناتيجەلى ەڭبەك ەتىپ جاتقان قازاقستان اۋماعىنداعى بىردەن-ءبىر ۇيىم. العاش رەت 2019 جىلدىڭ كۇزىندە قورعانىس مينيسترلىگىنىڭ اتسالىسۋىمەن قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا ەكىنشى دۇنيەجۇزىلىك سوعىسقا قاتىسقان ەلدەر ەلشىلەرىنىڭ قاتىسۋىمەن «Atamnyn Amanaty» قوعامدىق بىرلەستىگىنىڭ تۇساۋكەسەرى وتكەن بولاتىن.

Egemen Qazaqstan

اتالمىش ۇيىمنىڭ ماقساتى – ەكىنشى دۇنيەجۇزىلىك سوعىس كەزىندە حابارسىز كەتكەندەردىڭ دەرەگىن تابۋ عانا ەمەس، ءۇزىلىپ قالعان ۇرپاقارالىق ساباقتاستىقتى جالعاۋ، تاريحىمىزدى تۇگەندەۋ. قازىرگى تاڭدا ءبىزدىڭ ۇيىم زەينەتكەرلەر مەن ارداگەرلەردەن بولەك، قاتارىمىزعا جاستاردى دا بەلسەندى تۇردە تارتۋ ىسىنە دەن قويىپ، ۇرپاق ساباقتاستىعىن جالعاستىرۋ جولىندا دا بەلسەندى جۇمىس اتقارىپ كەلەدى.

ەلىمىزدە ءتيىستى دەڭگەيدە ناسيحاتتالماي جۇرگەن قازاقستاندىق قاھارماندار لەگى قانشاما! ەكىنشى دۇنيەجۇزىلىك سوعىستا باتىر اتانعان 500-گە جۋىق قازاقستاندىقتىڭ، ونىڭ ىشىندە 105 الاش باتىرىنىڭ ساناۋلىسى عانا ناسيحاتتالادى. باتىرلاردىڭ ەرلىك شەجىرەسىنەن بۇگىنگى ۇرپاق بەيحابار. سول سەبەپتى كەشەگى باتىر اتالارىنىڭ ەرلىگىنەن جاس بۋىن جان-جاقتى حاباردار بولۋى ءتيىس.

ەكىنشى دۇنيەجۇزىلىك سوعىستا 1،5 ميلليون قازاقستاندىقتىڭ 270 مىڭى حابار-وشارسىز كەتكەن. ارادا 75 جىلدان استام ۋاقىت ءوتتى. سول كەزدەگى كۋاگەرلەردىڭ كوبى بۇگىندە ومىردە جوق. ياعني دەرەكتەردىڭ جويىلعانىنا بايلانىستى ءىز-ءتۇزسىز كەتكەندەردى تابۋ تىم قيىن. مەن اتالمىش ۇيىم تۋراسىندا بىلمەگەنىمدە، جالپى بۇل مۇمكىن دەپ تە ويلاماپپىن. سوعان قاراماستان «Atamnyn Amanaty» ۇيىمى زور تاباندىلىق تانىتىپ، تالاي ساربازدىڭ دەرەگىن تابۋ جولىندا تىنىمسىز ەڭبەك ەتىپ كەلەدى.

ىزدەستىرۋ جۇمىستارىنا بەيجاي قارامايتىن بارلىق ادامدار، قازاقستان جانە وزگە ەلدەردەن دە ىزدەۋشىلەر مەن ەرىكتىلەر شاقىرىلىپ، ەكىنشى دۇنيەجۇزىلىك سوعىس كەزىندە حابار-وشارسىز كەتكەندەردى ىزدەۋگە وتىنىشتەردى قابىلداۋ جۇزەگە اسىرىلادى. قازىرگى ەسەپ بويىنشا 3094 ءوتىنىش كەلىپ ءتۇستى جانە ءبىزدىڭ ۇيىمنىڭ ارقاسىندا 692 قازاقستاندىق جاۋىنگەردىڭ جەرلەنگەن ورىندارى انىقتالدى، ءۇش وتباسى مۇشەلەرى ماجارستان استاناسى بۋداپەشتكە، سونداي-اق رەسەيدىڭ ۆولگوگراد جانە سانكت-پەتەربۋرگ قالالارىنداعى باۋىرلاستار زيراتىنا بارىپ، تاعزىم ەتىپ قايتتى. وسىلايشا تاباندى ەڭبەگىنىڭ ارقاسىندا «Atamnyn Amanaty» قوعامدىق بىرلەستىگى بيىلعى جىلى ماسكەۋ قالاسىندا بۇكىلرەسەيلىك «ىستىق جۇرەك» سىيلىعىنىڭ لاۋرەاتى اتاندى.

ۇرپاقتار ساباقتاستىعى دەمەكشى، ءبىز جاستارىمىزدىڭ بويىنا ءتول مادەنيەتىمىز بەن سالت-ءداستۇرىمىزدى، جالپى ادامگەرشىلىك رۋحاني دۇنيەتانىمىمىزدى دارىتۋ ماسەلەسىن دە الدىمىزعا ماقسات رەتىندە قويىپ وتىرمىز. سوندىقتان دا ادامگەرشىلىك پەن سالت-ءداستۇردى ءبىزدىڭ ەلدىڭ تىرەگى رەتىندە تۇسىنەتىن ۇرپاق تاربيەلەۋدى ماقسات تۇتۋىمىز قاجەت. ول ءۇشىن ءبىز ۇلتتىق جۇيەلەردىڭ بارلىعىنا باسا نازار اۋدارۋعا ءتيىسپىز.

ريزا ىسقاق،

«Atamnyn Amanaty» قوعامدىق بىرلەستىگىنىڭ ءباسپاسوز حاتشىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز