– قازىر رەسپۋبليكالىق ەپيدەمياعا قارسى توپتىڭ ماماندارى اۋىلداعى 1800 باس قۇستىڭ ءبارىن جويۋدا. بارلىق قاجەتتى كارانتيندىك شارالار قابىلداندى. اۋىل تۇرعىندارىنا ولاردىڭ قاجەتتىلىگى, قۇس تۇماۋىنا شالدىعۋ قاۋپى ءتۇسىندىرىلدى, – دەيدى ن.ماقاشەۆ.
سوڭعى 3 كۇندە اۋىلدا قۇس ءولىمى تىركەلمەگەن. اۋدان اۋىلدارىنداعى 20 مىڭعا جۋىق ءۇي قۇستارىنا ۆاكتسينا سالىندى. ال بىرنەشە ءتۇرلى قۇس وسىرەتىن جەلەزين اۋدانىنىڭ اقتاۋ اۋىلدىق اۋماعىندا قۇس تۇماۋىنا تەكسەرىلگەن ناتيجەلەرگە وراي كارانتيندىك شارالار ەنگىزىلسە, جاڭاجۇلدىز اۋىلىندا الدىن الا ساقتىق شارالارى جۇرگىزىلۋدە.
– كارانتيندىك شارالارعا تۇرعىندار تۇسىنىستىكپەن قارايدى, – دەيدى اقتاۋ اۋىلدىق اۋماعىنىڭ اكىمى جانار ورىنبەكوۆا. – اۋىلداعى 103 اۋلادا 1622 باس تاۋىق, قاز, ۇيرەك, كۇركەتاۋىق بار. قازىر جىلجىمالى ورتەۋ قۇرالى ورناتىلدى. ولگەن قۇستار جويىلدى. اۋىلدى اينالدىرىپ جەردى جىرتىپ, بەكەتتەر مەن توسقاۋىلدار قويىلدى.
سونىمەن بىرگە ەرتىس اۋدانىنىڭ اعاشورىن اۋىلىندا دا قازىر الدىن الا تەكسەرۋ شارالارى جۇرگىزىلۋدە. وبلىستىق دەنساۋلىق ساقتاۋ باسقارماسى تەرميالىق وڭدەۋدەن وتپەگەن قۇس ەتى ونىمدەرى مەن جۇمىرتقالارىن تۇتىنۋ ارقىلى قۇس تۇماۋى جۇعاتىنىن, جابايى نەمەسە اۋرۋ قۇستارعا قول تيگىزۋگە, ءولى نەمەسە اۋرۋ قۇستاردى شيكىدەي, تولىق پىسىرىلمەگەن ەت پەن جۇمىرتقانى جەۋگە بولمايتىنىن حابارلادى. سوندىقتان اۋىلدارعا بارلىق قۇس ونىمدەرىن شىعارۋعا تىيىم سالىندى. اڭ اۋلاۋعا شىقپاۋعا جانە اۋلانعان اڭ ەتىن جەمەۋگە كەڭەس بەرىلۋدە. مەملەكەت جويىلعان قۇس يەلەرىنە نارىقتاعى باعا بويىنشا وتەمىن تولەيدى. وڭىرگە قۇس تۇماۋىنا قارسى ۆاكتسينانىڭ 456 مىڭ دوزاسى جەتكىزىلگەن.
پاۆلودار وبلىسى
