ايماقتار • 08 شىلدە، 2020

ءدارى-دارمەك باعاسىن نەگىزسىز كوتەرگەندەر انىقتالدى

223 رەت كورسەتىلدى

شارا قابىلداۋ ءۇشىن ماتەريالدار فارماتسەۆتيكالىق باقىلاۋعا تاپسىرىلدى، دەپ حابارلايدى نۇر-سۇلتان قالاسى اكىمدىگىنىڭ رەسمي سايتى.

"استانا – ادالدىق الاڭى" جوباسىنىڭ مەنەدجەرلەرى سىبايلاس جەمقورلىققا قارسى قىزمەت دەپارتامەنتى جانىنداعى ارنايى مونيتورينگتىك توپپەن جانە پارتيالىق باقىلاۋ كوميسسياسى مۇشەلەرىمەن بىرلەسىپ، قالاداعى بىرنەشە دارىحاناعا مونيتورينگ جۇرگىزدى. بۇعان ازاماتتاردىڭ ءدارى-دارمەكتەر مەن دارىحانالارعا قاتىستى شاعىمدارى نەگىز بولدى.

اتاپ ايتساق، نۇر-سۇلتان تۇرعىنى "DDM PHARM"-دان (رەسپۋبليكا داڭعىلى، 7) قۇنى 3 705 تەڭگە تۇراتىن 10 مگ "املوديمەد" پرەپاراتىن ساتىپ العان. ءدارىنىڭ بىرلىگى 327 تەڭگەدەن اسىپ كەتكەن. ال "Sanario" ءدارىحاناسىندا (الماتى كوشەسى، 13) قۇنى 2 500 تەڭگە تۇراتىن تسەف-3 پرەپاراتىنىڭ باعاسىن كوتەرۋ فاكتىسى انىقتالدى. 10 بىرلىككە 2 950 تەڭگە ارتىق تولەنگەن.

"استانا – ادالدىق الاڭى" جوباسىنىڭ جەتەكشىسى ميراس شەكەنوۆ ءتارتىپ بۇزۋشىلىق فاكتىسىن مويىنداعان ءدارىحانا باسشىلارىمەن سويلەستى.

"بۇگىن ءۇش ءدارىحانا تەكسەرىلدى، ولاردىڭ ەكەۋىندە باعا كوتەرىلگەنى انىقتالدى. شارا قابىلداۋ ءۇشىن ناتيجەلەردى فارماتسەۆتيكالىق باقىلاۋعا جىبەرەمىز. سونداي-اق ەرتەڭنەن باستاپ قالادا بارلىق ءدارىحانالاردى تەكسەرەتىن پارتيالىق ارنايى مونيتورينگتىك توپتار جۇمىس ىستەي باستايتىنىن اتاپ وتكىم كەلەدى. سونىمەن قاتار بارلىق ازاماتتاردى ءدارى-دارمەك باعاسىنىڭ كوتەرىلۋى بويىنشا WhatsApp نومىرىنە (+7 702 000 24 94) حابارلاما جىبەرۋگە شاقىرامىن. مەديتسينالىق ءدارى-دارمەكتەردىڭ باعاسىن نەگىزسىز كوتەرۋ دەنساۋلىق ساقتاۋ ءمينيسترىنىڭ بۇيرىعىن بۇزۋ بولىپ ەسەپتەلەدى"، - دەپ اتاپ ءوتتى م.شەكەنوۆ. ەگەر ءدارى-دارمەك باعاسى تۋرالى كۇمان تۋىنداسا، DARI.KZ قوسىمشاسى ارقىلى، ndda.kz سايتى نەمەسە قازاقستان رەسپۋبليكاسى دەنساۋلىق ساقتاۋ ءمينيسترىنىڭ بەكىتىلگەن بۇيرىعى (adilet.zan.kz) ارقىلى تەكسەرە الاسىز.

بۇرىن حابارلانعانداي، ەلوردالىق پوليتسەيلەر مەديتسينالىق پرەپاراتتاردى زاڭسىز ساتۋ فاكتىلەرى بويىنشا رەيد جۇرگىزۋدە. ەكى كۇن ىشىندە جالپى سوماسى 6 ملن تەڭگەگە جۋىق ءدارى-دارمەك تاركىلەندى.

سوڭعى جاڭالىقتار

ۇقساس جاڭالىقتار