نۇر-سۇلتاندا 8 جىلعا سوزىلعان قۇرىلىس اياقتالدى

ايماقتار • 05 شىلدە، 2020

نۇر-سۇلتاندا 8 جىلعا سوزىلعان قۇرىلىس اياقتالدى

25 رەت كورسەتىلدى

نۇر-سۇلتاندا ەلوردا كۇنى قارساڭىندا قۇرىلىسى ۇزاققا سوزىلعان نىسان پايدالانۋعا بەرىلدى. سەگىز جىل بويى سالىنعان "ستوليچنىي-2" تۇرعىن ءۇي كەشەنىنىڭ قۇرىلىسى اياقتالىپ، 200-دەن استام ۇلەسكەردىڭ ماسەلەسى شەشىلدى. بۇل تۋرالى قالا اكىمدىگىنىڭ رەسمي سايتى حابارلادى، - دەپ جازادى Egemen.kz

اقمارال اعزامقىزى

ەلوردا اكىمى التاي كولگىنوۆتىڭ ايتۋىنشا، بيىل كوپپاتەرلى 20 تۇرعىن ءۇي كەشەنى پايدالانۋعا بەرىلەدى، دەمەك 8 مىڭ ۇلەسكەر كوپتەن كۇتكەن پاتەرلەرىن الادى.

"ستوليچنىي-2" تۇرعىن ءۇي ۇلەسكەرلەرى 8 جىلدان استام ۋاقىت ءوز پاتەرىن كۇتتى. ءار ۇزاق سالىنىپ جاتقان قۇرىلىسپەن ءبىز جەكە جۇمىس جاساپ جاتىرمىز. نىسانداردى ارالاپ كورەمىز، قۇرىلىس قالاي ءجۇرىپ جاتقانىن تەكسەرىپ، قانداي شەشىم قابىلداۋ قاجەت ەكەنىن ەسكەرىپ وتىرامىز. سىزدەرمەن دە كەزدەسىپ، ۇسىنىستارىڭىزدى تىڭدادىق. وتكەن جىلى سىزدەردە سەنىمسىزدىك بولعانى ەسىمدە. ال قازىر سىزدەر ەرەكشە قۋانىپ تۇرسىزدار. ەندى ءوز پاتەرىڭىزگە كىرە الاسىزدار. ۇلەسكەرلەردىڭ ماسەلەسى مەملەكەت باسشىسىنىڭ باقىلاۋىندا. پاندەمياعا قاراماستان، قۇرىلىسشىلار قاتاڭ سانيتاريا نورمالارىن ساقتاي وتىرىپ، قۇرىلىس جۇمىستارىن جالعاستىرۋدا. بيىل تاعى 8 مىڭ ۇلەسكەردىڭ ماسەلەسىن شەشەمىز، كوپپاتەرلى 20 تۇرعىن ءۇي كەشەنىن سالىپ، پايدالانۋعا بەرەمىز.

تاعى ءبىر ماسەلە – "تەرريتوريا كومفورتا-1" تۇرعىن ءۇي كەشەنى. ول 2004 جىلدان بەرى تۇر. تەحنيكالىق تەكسەرىس عيمارات اپاتتى جاعدايدا ەكەنىن انىقتادى. تۇرعىنداردىڭ قاۋىپسىزدىگى ءۇشىن عيماراتتى بۇزۋ تۋرالى شەشىم قابىلداندى. ورنىنا جاڭا تۇرعىن ءۇي كەشەنىنىڭ قۇرىلىسى جۇرگىزىلۋدە. 500-دەن استام ادام ۇلەسكەر اتاندى. سونىمەن قاتار، ۇزاق ۋاقىت سالىنىپ جاتقان "شىعىس"، "جاعالاۋ" تۇرعىن ۇيلەرى دە بار. ءار نىسان بويىنشا ناقتى جوسپار بار»، – دەدى قالا اكىمى التاي كولگىنوۆ.

"ستوليچنىي-2" تۇرعىن ءۇي كەشەنىنىڭ ۇلەسكەرى جانار دۇيسەنوۆا ۋاقىت وتە، ءتىپتى، ۇيدەن ءۇمىتىن ۇزگەنىن ايتادى. "كوپ جىل بويى ءوز پاتەرىمىزدى كۇتىپ، ءتىپتى ءۇمىتىمىز ءۇزىلدى. 8 جىل بويى بۇل ماسەلەمەن بارماعان جەرىمىز قالمادى. مىنە، 2020 جىل – ءبىز ءۇشىن ەرەكشە جىل بولدى. ءبىز ءوز پاتەرىمىزدى الدىق. قاتتى قۋانىپ ءجۇرمىز. بارشاڭىزدى كەلە جاتقان ەلوردا كۇنىمەن قۇتتىقتايمىن! ومىردە قۋانىشتى ساتتەر كوپ بولسىن"، – دەيدى ۇلەسكەر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز