بۇگىندە ماڭعىستاۋ وبلىسىندا 54 مىڭعا جۋىق بيزنەس سۋبەكتىسى بار. وبلىستاعى «قاراپايىم زاتتار ەكونوميكاسى» بويىنشا جوبالار قۇنى- 57 ملرد تەڭگەگە جەتىپ, رەسپۋبليكادا 1-ورىنعا شىققان. «باستاۋ بيزنەس» جوباسى بويىنشا 1705 جۇمىسسىز ادام وقىتىلسا, «جاس كاسىپكەر» ارقىلى 700 ادام بيزنەس ءبىلىم الدى. ولاردان 626-سى جەكە كاسىبىن اشتى. ىسكە اسقان جوبالار قۇنى- 826 ملن تەڭگەنى قۇرايدى.
بيىلدان باستاپ العاش رەت وڭىرلىك كاسىپكەرلەر پالاتاسىنىڭ ديرەكتورى بيزنەس الدىندا 2019 جىلى اتقارىلعان جۇمىستار بويىنشا ەسەپ بەرىپ, اۋدان, قالالاردى ارالاپ, كاسىپكەرلەرمەن كەزدەسىپ, تولعاندىرعان ماسەلەلەرى جايىندا پىكىر الماستى.
- وتكەن جىلى ماڭعىستاۋ وبلىسىنىڭ كاسىپكەرلەر پالاتاسىنا 134 ىسكەر اراشا سۇراپ, ارىزداندى. ولاردان 76-سى وڭ شەشىمىن تاۋىپ, كاسىپكەرلەردىڭ قۇقىعى قورعالدى. ناتيجەسىندە 1,8 ملرد تەڭگە بيزنەسكە ءوندىرىلدى. كۇردەلى ماسەلەلەر نەگىزىنەن جەر قاتىناستارى, ساتىپ الۋلار, سەرۆيستىك قىزمەت, مەملەكەتتىك ورگانعا شاعىمدانۋ بولىپ كەلەدى, دەيدى مو كاسىپكەرلەر پالاتاسىنىڭ ديرەكتورى نۇربەك قاراساەۆ.
ال, «اتامەكەن» ميكروقارجى ۇيىمىنىڭ ديرەكتورى - بوتاگوز سىناباەۆانىڭ ايتۋىنشا, ەلىمىزدە تسيفرلاندىرۋ جۇيەسىنە قوسىلۋ ماقساتىندا جۇزەگە اسقان «Atameken services» ەلەكتروندى قىزمەتى كومەگىمەن 5 مىڭعا جۋىق شاعىن جانە ورتا كاسىپكەرلىك نىسانى تىركەلىپ, 6 مىڭعا جۋىق ىسكەرگە ەلەكتروندى قىزمەت كورسەتىلگەن.
ماڭعىستاۋدا «قاراپايىم زاتتار ەكونوميكاسىمەن» 71 جوبا قاراستىرىلدى. سونىڭ 38-ءى ناقتىلانىپ, قۇنى 57 ملرد تەڭگە بولاتىن مال ءوسىرۋ, كوكونىس ەگۋ, قويما قىزمەتى, پلاستيك شىعارۋ, مەديتسينالىق قىزمەتتەر باعىتىندا كاسىپتەر اشىلدى.
مو كاسىپكەرلەر پالاتاسىنىڭ كۇشىمەن وڭىرلىك سكرينينگ ءوتتى. وعان وبلىستاعى ءۇي شارۋاسىندا وتىرىپ, كاسىپپەن اينالىسقان 95 مىڭنان استام ادام قاتىستى. ونىڭ قورىتىندىسى كاسىپكەرلەردىڭ الەۋمەتتىك سالالارىن انىقتاۋ, ەلدى مەكەندەردىڭ ەكونوميكالىق بازاسىن انىقتاۋ, اۋدانداردىڭ مامانداندىرۋ كارتالارىن قالىپتاستىرۋ, جاپپاي كاسىپكەرلىكتى دامىتۋعا ارنالعان بيزنەس-جوبالاردى جاساقتاۋعا كومەگىن تيگىزبەك دەيدى ماماندار.
