سۋرەتتى تۇسىرگەن – اياۋجان وتەۋلينوۆا
«Jan ana» قوعامدىق بىرلەستىگى ءوز جۇمىسىن 2019 جىلى ەرىكتى انالار توبى رەتىندە باستاعان. بۇگىندە كوپبالالى جانە از قامتىلعان وتباسىلارعا قولداۋ كورسەتىپ, مەملەكەتتىك باعدارلامالاردى جۇزەگە اسىرۋعا باعىت-باعدار بەرىپ, قۇقىقتىق جانە پسيحولوگيالىق كومەك كورسەتىپ كەلەدى. سونداي-اق قوعامدىق ءىس-شارالارعا بەلسەنە قاتىسادى.
بيىل دا ءداستۇردى دارىپتەۋ ءۇشىن ناۋرىز مەرەكەسى قارساڭىندا ەرەكشە ءىس-شارا ۇيىمداستىرىپ, قالا تۇرعىندارىنا كوتەرىڭكى كوڭىل كۇي سىيلادى. ايتا كەتەيىك, قوعامدىق بىرلەستىك وبلىس كولەمىندە, ءار اۋدانمەن جۇمىس جۇرگىزەدى.
«قاتارىمىزدا كوپبالالى انالاردان بولەك, اقجاۋلىقتى اجەلەر دە بار. بۇگىنگى ءىس-شاراعا ۇلان اۋدانىنىڭ «اسىل اجەلەر» توبى بەلسەنە قاتىسىپ جاتىر. بىزدە تىگىن تسەحى جۇمىس ىستەيدى. كورمەگە سول تسەحتان, ياعني ءبىزدىڭ بىرلەستىك مۇشەلەرىنىڭ قولىنان شىققان ۇلتتىق كيىمدەر, بۇيىمدار قويىلدى. قوعام جاناشىرى ءارى انا بولعاندىقتان, ۇلتتىق قۇندىلىقتاردى بولاشاق ۇرپاققا دارىپتەۋ – ءبىزدىڭ مىندەت», دەدى قوعامدىق بىرلەستىك جەتەكشىسى گۇلجامال بەرشىمبەكوۆا.
سالتاناتتى ءىس-شارادا ءان شىرقالىپ, جينالعان كوپشىلىك بي بيلەدى. سونداي-اق قوناقتار ءسابيدى بەسىككە بولەۋ ءراسىمىن كورىپ, اجەلەردىڭ ۇرشىق يىرگەنىن, ۇلتتىق كيىمدەر دەفيلەسىن تاماشالادى.
«حالىقتى قولونەرمەن, ۇلتتىق كيىمدەرىمىزبەن تانىستىرىپ, سالت-داستۇردەن ءۇزىندى كورسەتىلدى. ەجەلگى داستۇردەن باستالعان دۇنيە, اتا-بابامىزدان قالعان وسيەت ءوز ساباقتاستىعىن تابۋى كەرەك. سوندىقتان مۇنداي ءىس-شارالاردىڭ ماڭىزى زور», دەدى ۇلان اۋدانىنان كەلگەن گۇلزيعا راحىمقاليقىزى.
اجەلەردىڭ باستاماسىمەن, قالا اكىمدىگىنىڭ قولداۋىمەن ۇيىمداستىرىلعان ءىس-شارا كوپتىڭ كوڭىلىنەن شىعىپ, ىستىق ىقىلاسىنا بولەندى.
وسكەمەن
