تۇرعىنداردىڭ ايتۋىنشا, قاراقۇرتتار بالالار جانە ويىن الاڭدارىنىڭ ماڭىندا ءجيى كەزدەسەتىن بولعان. جىل باسىنان بەرى قاراقۇرت شاققاننان كەيىن 18 ادام مەديتسينالىق كومەككە جۇگىنگەن.
قاراقۇرتتاردىڭ كوبەيۋىنە بايلانىستى وبلىس اكىمدىگىندە ارنايى كەڭەس وتكىزىلىپ, وعان مەديتسينالىق ۇيىمداردىڭ باسشىلارى, سانيتاريالىق-ەپيدەميولوگيالىق باقىلاۋ دەپارتامەنتىنىڭ وكىلدەرى جانە سالالىق ماماندار قاتىستى.
ابايلاڭىز, قاراقۇرت: قازاقستاندا قاۋىپتى ورمەكشىلەر جاندانا باستادى
مامانداردىڭ مالىمەتىنشە, بيىل مول جاۋىن-شاشىننىڭ اسەرىنەن قاراقۇرتتار ادەتتەگىدەن ەرتەرەك جانە كوپ مولشەردە پايدا بولعان. سونىڭ سالدارىنان وڭىردە ۋلى ورمەكشىلەر شاققان تۇرعىندار سانى ارتىپ وتىر.
كەڭەس بارىسىندا وبلىستاعى كەيبىر مەديتسينالىق مەكەمەلەردە قاراقۇرت ۋىنا قارسى ارنايى سارىسۋ قورى جەتكىلىكسىز ەكەنى ايتىلدى. وسىعان بايلانىستى زارداپ شەككەندەردى وبلىس ورتالىعىنداعى اۋرۋحانالارعا تاسىمالداۋعا تۋرا كەلەدى.
«قالىپتاسقان جاعدايدى ەسكەرە وتىرىپ, اكىمدىك تاراپىنان زارداپ شەككەندەرگە دەر كەزىندە مەديتسينالىق كومەك كورسەتۋ جانە قاراقۇرت شاعۋىنىڭ الدىن الۋ بويىنشا ناقتى تاپسىرمالار بەرىلدى. اتاپ ايتقاندا, وبلىستىڭ بارلىق قالا مەن اۋدانىندا قاراقۇرتقا قارسى سارىسۋدىڭ قاجەتتى قورىن قالىپتاستىرۋ, تۇرعىندار اراسىندا ءتۇسىندىرۋ جۇمىستارىن كۇشەيتۋ, اۋلالار مەن شارۋاشىلىق اۋماقتارىن تازالاۋ, سونداي-اق دەزينسەكتسيالىق شارالاردى جۇرگىزۋ تاپسىرىلدى», دەپ حابارلادى وڭىرلىك قوعامدىق كوممۋنيكاتسيالار ورتالىعى.
سونداي-اق بالالار باقشالارىندا, جازعى ساۋىقتىرۋ لاگەرلەرىندە جانە وزگە دە بالالار مەكەمەلەرىندە قاۋىپسىزدىك شارالارىن كۇشەيتۋ تاپسىرىلدى.
ماڭعىستاۋ وبلىستىق بالالار اۋرۋحاناسىنىڭ ديرەكتورى جانار دوسجانوۆانىڭ ايتۋىنشا, سوڭعى ون كۇن ىشىندە قاراقۇرت شاقتى دەگەن كۇدىكپەن ەكى بالا اۋرۋحاناعا تۇسكەن.
«بالالاردا شاققان جەردىڭ قاتتى اۋىرۋى, دەنەنىڭ ءارتۇرلى بولىكتەرىندەگى اۋىرسىنۋ, جۇرەك اينۋ, قۇسۋ, دەنە قىزۋىنىڭ كوتەرىلۋى جانە قاتتى مازاسىزدىق بەلگىلەرى بايقالدى. سوندىقتان اتا-انالار بالالاردىڭ ويىن الاڭدارى مەن دەمالىس ورىندارىنداعى قاۋىپسىزدىگىنە ەرەكشە نازار اۋدارۋى قاجەت. قازىرگى ۋاقىتتا بالالار قاجەتتى ەم قابىلداپ جاتىر, ولاردىڭ جاعدايى تۇراقتاندى», دەدى جانار دوسجانوۆا.
