سۋرەتتى تۇسىرگەن – اۆتور
بۇل مەرەكەنى ساۋدا ۇيىندە وتكىزۋدىڭ دە ءمانى بار. نەگە دەسەڭىز, كىسى قاراسى قالىڭ. حالىقتىڭ كوبى كەشكى استارىن ىشۋگە, كينو كورۋگە, ساۋدا-ساتتىقتارىن جاساۋعا وسى جاققا اعىلادى. سويتە ءجۇرىپ ۇلتتىق كيىم كورمەسىن كورە قايتادى. قالا باسشىلىعى وسىنى ەسكەرىپ, رۋحاني, مادەني شارالاردى ارا-تۇرا ساۋدا ورتالىقتارىندا وتكىزىپ تۇرادى.
– ءاز ناۋرىز قارساڭىندا ءتۇرلى ءىس-شارالاردى قولعا الدىق. ءبارى ۇلتتىق بولمىسىمىزدى كورسەتۋگە باعىتتالعان. بايقاساڭىزدار, مەملەكەتتىك قىزمەتكەر بولسىن, ۇستاز بولسىن كۇندەلىكتى ويۋلى بەشپەت, شاپان كيىپ جۇمىسقا بارادى. قازاقي اشەكەي-بۇيىمدار دا موداعا اينالدى. بۇگىنگى ۇلتتىق كيىمدەر ۇلگىسى دە رۋحىمىزدى اسقاقتاتۋعا باعىتتالعان, – دەدى وبلىستىق مادەنيەت جانە تىلدەردى دامىتۋ باسقارماسىنىڭ باسشىسى سامات كاسەنوۆ.
قازاقيلىقتىڭ ءيىسى اڭقىپ تۇرعان ءسان-سالتاناتتى مەرەكەگە مادەنيەت سالاسىنىڭ قىزمەتكەرلەرى ءبىر كىسىدەي قاتىستى. كىرەبەرىستەن باستالعان شەرۋ تورگى جاقتاعى ساحنا ماڭىنا بارىپ توقتادى. دومبىرا شاناعىنان توگىلگەن اۋەن مەن كومەيدەن شىققان ءان اتشاپتىرىم زالدى سىلكىندىرىپ جىبەردى. ال زاماناۋي ۇلگىدەگى قازاقي شاپان مەن قامزول كيىپ شىققان قىز-جىگىتتەرگە كورەرمەن سۇيسىنە قاراستى. ناۋرىز قارساڭىنداعى ۇلتتىق كيىمدى ۇلىقتاعان وبلىس پەن قالا باسشىلىعىنا قاتىسۋشىلار مەن كورەرمەندەر العىستارىن جاۋدىرىپ جاتتى.
وسكەمەن
