كوكتەمدە كەلەتىن جىل قۇستارىنا قامقورلىق جاساۋعا جاستاردىڭ ىنتا-ىقىلاسى ارتىپ كەلەدى. بۇل باستاماعا بىلەك سىبانا كىرىسۋ اينىماس داستۇرگە اينالا باستاعانى اقيقات. ويتكەنى وڭىردە قاناتتىلارعا ۇيا جاساۋ شاراسى العاش رەت وتكەن جىلى باستاۋ الىپ, جان جادىراتارلىق شارۋا بيىل دا جالعاسىن تاۋىپ وتىر.
جاستاردىڭ ەكولوگيالىق مادەنيەتىن قالىپتاستىرۋعا, قۇستارعا قامقورلىق جاساۋعا, تابيعاتتى ايالاۋعا باۋلۋدى ماقسات ەتكەن اكتسيا بارىسىندا قولىنا اعاشىن, بالعا-شەگەسىن الىپ, ۇيا جاساۋعا كىرىسكەن قوناەۆ قالاسىنداعى شوقان ءۋاليحانوۆ اتىنداعى №2 گيمنازيانىڭ وقۋشىلارى جۇمىسىن تەز ارادا اياقتاپ, جاڭا ءارى ادەمى ۇيالارىن اعاش باستارىنا ءوز قولدارىمەن ورناتتى.
قورشاعان ورتانى قورعاۋ – ءار ادامنىڭ مىندەتى ەكەنىن ايتقان گيمنازيا وقۋشىسى ءالىمجان تۇرداليەۆ سىنىپتاستارىمەن بىرگە قۇستارعا قامقورلىق جاساۋعا اتسالىسقانىنا ريزاشىلىعىن ءبىلدىردى.
«كوكتەممەن بىرگە تۋعان ولكەگە قايتا ورالعان قۇستارعا قامقورلىق ەتۋ – قورشاعان ورتاعا دەگەن جاۋاپكەرشىلىكتىڭ ايقىن كورىنىسى. ەلىمىزدە مۇنداي اۋقىمدى اكتسيا وتكەن جىلى العاش رەت الماتى وبلىسىندا وتكىزىلدى. سول كەزدە مىڭعا جۋىق قۇس ۇياسى دايىندالىپ, ارنايى ورىندارعا ورناتىلدى. بيىل بۇل كورسەتكىش ودان دا جوعارى. باستاما وسكەلەڭ ۇرپاقتى تابيعاتتى قورعاۋعا, مەيىرىمدىلىك پەن ىزگىلىككە تاربيەلەيدى. اكتسيا وبلىستىڭ بارلىق اۋدانى مەن قالاسىندا ءساۋىر ايىنىڭ سوڭىنا دەيىن جالعاسادى», دەيدى وبلىستىق جاستار رەسۋرستىق ورتالىعىنىڭ ديرەكتورى ماقسات كەنەشوۆ.
الماتى وبلىسى
