مەديتسينا • 29 قاڭتار، 2020

ماڭعىستاۋدا ستوماتولوگتار بالالارعا ارناپ اكتسيا ۇيىمداستىردى

64 رەت كورسەتىلدى

ماڭعىستاۋ وبلىستىق ستوماتولوگيالىق ەمحاناسىنىڭ قىزمەتكەرلەرى «كوز جاۋىن الاتىن ءومىر بويىنا ارنالعان كۇلكى» اتتى اۋقىمدى اكتسياسىن وتكىزدى. بۇل جايىندا ماڭعىستاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.

سوڭعى ءبىر ايدا 1-سىنىپ وقۋشىلارىنا جالپى سانى 1751 ءتىس پاستاسى مەن ءتىس قىلشاعى سالىنعان پاكەتتەر، ال كەيبىر وقۋشىلارعا ماقتاۋ قاعازدارى بەرىلدى. شارا اياسىندا اقتاۋ قالاسىنداعى № 3، 5، 20، 21، 28 ورتا مەكتەپتەر جانە مۇنايلى اۋدانى قىزىلتوبە اۋىلىنداعى ورتا مەكتەپتىڭ ءبىرى قامتىلعان بولاتىن.

ماڭعىستاۋ وبلىستىق ستوماتولوگيالىق ورتالىعىنىڭ ديرەكتورى قۋات ماشىرىقوۆتىڭ ايتۋىنشا، «كوز جاۋىن الاتىن ءومىر بويى كۇلكى» - بۇل 1-3-سىنىپ وقۋشىلارىنا ارنالعان تاعىلىمدىق ستوماتولوگيالىق باعدارلاما. وسى ارالىقتا ءسۇت تىستەرى تۇراقتى تىستەرگە اۋىسا باستايدى، سول سەبەپتى ءوڭىرىمىزدىڭ كىشكەنتاي تۇرعىندارى ءۇشىن وسىنداي ءتۇسىندىرۋ جۇمىستارىن جۇرگىزۋ قاجەتتىلىگى تۋىنداپ وتىر. 

- الدىن الا تەكسەرۋ تاجىريبەلەرىنە سايكەس، 6 جاستاعى بالالاردىڭ 80% استامىندا ءتىس جەگى اۋرۋى انىقتالادى. سوندىقتان وسى جاستاعى بالالارعا اۋىز قۋىسىنىڭ تازالىعىن ساقتاۋ اسا ماڭىزدى، قۇرامىندا فتورى بار ءتىس پاستالارىن، ءتىس جىپتەرىن قولدانعانى دۇرىس، سونداي-اق، ستوماتولوگ دارىگەرگە جۇيەلى تۇردە قارالسا، ارتىق ەتپەيدى. ال اتا-انالار تاراپى اۋىز قۋىسىنىڭ ساۋلىعىنا قامقورلىقتى ءوز جاۋاپكەرشىلىگىنە الۋعا بالالاردى ۇيرەتكەنى ابزال. باعدارلامانىڭ ماقساتى - بالالار اراسىندا كەزدەسەتىن ستوماتولوگيالىق اۋرۋلاردىڭ تومەندەۋىنە ۇلەس قوسۋ، اۋىز قۋىسىن دۇرىس تازالاۋعا بالالاردى ۇيرەتۋ، - دەيدى ق.ماشىرىقوۆ.

الداعى ۋاقىتتا ءبىلىم بەرۋ وردالارىندا باستاپقى سىنىپتاردا ءتىس اۋرۋىنىڭ الدىن الۋ بويىنشا ساباقتار وتكىزۋ جوسپاردا بار. ال اتا-انالار تاراپى بولسا ءوز بالالارىنىڭ ەرتە كەزدەن باستاپ اۋىز قۋىسىن ۇنەمى تازالاۋ ماڭىزدىلىعى تۋرالى ۇيدە كۇندەلىكتى ايتىپ وتىرسا، ارتىق ەتپەيدى. ءوز كەزەگىندە دەنساۋلىق ساقشىلارى ءتىس اۋرۋىن بولدىرماۋ جولدارىن كەڭىنەن تۇسىندىرۋگە ءاردايىم دايىن ەكەندىكتەرىن جەتكىزدى.

سوڭعى جاڭالىقتار

Atmaca زىمىرانى سىناقتان ءساتتى ءوتتى

تەحنولوگيا • بۇگىن، 18:35

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار